حەسەن دەرزی
حەسەن دەرزی ساڵی ١٩٥٧، لە شاری بۆکان لەدایک بووە. ھەر لە منداڵییەوە خولیای گۆرانی گوتن و فێربوونی موسیقا بووە. گوێی بە دەنگی مامۆستا حەسەن زیرەک و ... و فۆلکلۆری پڕ لە حەز و تاسە و خۆشەویستی ناوچەی فەیزوڵڵابەگی بۆکان کراوەتەوە.
برای گەورەی، محەممەد، کە خاوەنی دەنگیکی بە سۆز بوو، کاریگەریەکی یەکجار زۆری لە سەر دانا و ھاندەر و سەرچاوەی حەز و خۆشەویستی بووە بۆ دونیای گۆرانی. دەکرێ بگوترێ ئەو ھەوەڵین مامۆستای بووە کە بە داخەوە بۆ خۆی درێژەی بەم رێبازە نەداوە.
ژەندنی ئامێرەی کەمان، لای مامۆستایان ئەمیر مینایی و رەشید فەیز نیژاد فێر بووە. ساڵی ١٩٧٦ بۆ ماوەی بیست ساڵ مامۆستای قوتابخانە بووە. لە ١٩٨٦ تا ١٩٩١ چوار بەرھەمی ھونەریی پێشکەش کردوە. ساڵی ١٩٩١ بەھۆی دەست بەسەری و نەبوونی ئازادی لە لایان رژێمی ئێران دەرفەتی گۆرانیی لێ ستێندرا و لە کاری مامۆستاییش لا بردرا و ئێستا دوور لە نیشتیمان لە بریتانیا دەژی. سەرجەمی ئاڵبۆمەکانی تا ئێستا (٢٠٠٧) پێنج دانەن.
