زەکەریا عەبدوڵڵا
| زەکەریا عەبدوڵڵا | |
|---|---|
| ناوی لەدایکبوون | زەکەریا عەبدوڵڵا |
| لەدایکبووی | ھەولێر، باشووری کوردستان |
| پیشەکان | گۆرانیبێژ، ئاوازدانەر |
| ئامێرەکان | تەختەکلیل (کیبۆرد) |
| ساڵانی چالاکبوون | ١٩٩٧ - تائێستا |
| کۆمپانیای تۆمارکردن | Zakaria Music Production |
| ماڵپەڕ | www.zakariamusic.com |
زەکەریا عەبدوڵڵا گۆرانیبێژێکی بەناوبانگی کوردە، لە گەڕەکی تەیراوەی شاری ھەولێر لەدایکبووە. لە ساڵی ١٩٩٣ کۆچی کرد بۆ سوید و کاری مۆسیقای دەست پێ کرد، ھەر لەوێ دەستی بە ژەنینی کیبۆرد کرد لەگەڵ سترانبێژانی ناوداری کورد، لە ساڵی ١٩٩٨ یەکەم ئەلبومی خۆی بە ناوی تۆ ھاتی بڵاوکردەوە و بوو بە سەکۆیەکی پەڕینەوە بۆ ناو دونیای مۆسیقا و توانی ناوی خۆی لەوێدا دیاری بکات.
لە ساڵی ١٩٩٩ دووەمین ئەلبومی بەناوی بگەڕێوە بڵاوکردەوە، پاشان پەرەی بە کارەکانی دا و بە ھۆی بڵاوکردنەوەی ئەلبومی بگەڕێوە لە ساڵی ٢٠٠٠ـدا لایەنگری زیاتری پەیداکرد. ھەر لەوە بە دواوە گەشەسەندن و پێشکەوتنی بەردەوامی ھەبووە تا ئەو ڕادەیە کە ھەموو کات بەئاسانی دەیتوانی لایەنگرانی زۆر لە دەوری خۆی کۆ بکاتەوە.
لە ساڵی ٢٠٠٢دا ئەلبومی ڕۆژگاری بڵاوکردەوە و لایەنگرانی بۆ لای خۆی ڕاکێشا. ئەم ئەلبومە تا ئێستا ١٫٥ میلیۆن کۆپی لێ کراوە. ئەم ئەلبومە کە ١٤ ستران لە خۆی دەگرێ و ھەروەھا کلیپ و ڤیدیۆی زۆری بۆ سترانەکانی کراوە و لە ھەموو کەناڵە کوردییەکان وەکوو: کوردستان تیڤی و کوردسات بڵاوکراونەتەوە. زەکەریا ئەلبومی "تیلیناز" ی لە ساڵی ٢٠٠٤ بڵاوکردەوە کە سێ میلیۆن کۆپی لێ بڵاوکرایەوە.
زەکەریاش ئەلبومی گەنجی پیری لەگەڵ دەستپێکردنی ساڵی نوێی ٢٠٠٧ بڵاوکردەوە و تێیدا ھەوڵی داوە لە ھەموو ڕوویەکەوە چ وەک مۆسیقا، چ وەک تەکنیک و نووسینی گۆرانییەکان شێوازێکی تازە و ھەندێک جیاواز لە بەرھەمەکانی پێشووی پێشکەش بکات.
نووترین بەرھەمی زەکەریاش ئەلبومی لاپەڕەی سپییە کە پێکدێت لە ١٤ گۆرانی، ھەموو قازانجی ئەم ئەلبومەش بەخشرایە ھەتیوان و منداڵانی ھەژار بە تایبەتی لێقەوماوانی جەنگ.
وێڕای ھۆنراوەکانی شاڵاو عەلی کە لە ھەموو ئەلبومەکانی زەکەریادا جێ پەنجەی بەرچاو و دیارە، لەم بەرھەمەدا بۆ جاری یەکەم لە کۆی ١٢ گۆرانی؛ نۆ ھۆنراوەی سامی ئەرگۆشی کردووەتە گۆرانی کە ناوی ئەلبومەکە گەنجی پیر و کلیپی گوڵێ دوو لەو ھۆنراوانەن.
