خادیم

لە ئینسایکڵۆپیدیای ئازادی ویکیپیدیاوە
Jump to navigation Jump to search

خادیم یان حاجی میرزا عەبدوڵڵا کوڕی محەمەد مەولودە، ساڵی ١٨٩٥ لە شاری کۆیە ھاتۆتە دنیاوە و پێش ھاوتەمەنەکانی خۆی خراوەتە بەر خوێندن. لە تەمەنی ١٢ ساڵیدا زۆرینەی کتێبەکانی سەردەمی خۆی خوێندۆتەوە، پاش مردنی باوکی ئەرکی سەرپەرشتی کردنی خێزانەکەی کەوتۆتە ئەستۆ. لە ژیانیدا تووشی گەلێ گیروگرفت ھاتووە و بە ناچاری شاری کۆیەی جێھێشتووەو ماوەیەک لە قەڵادزێ ژیاوە.

ساڵی ١٩٤٦ لە سلێمانی نیشتەجێ بووە، شوێنی کارەکەی خۆی کردبووە کۆڕی ئەدیبان و نووسەرانی ئەو سەردەمە، لە دنیای ئەدەبیاتدا شاعیرێکی بەتوانا بووە و لە بوارە نیشتمانی و کۆمەڵایەتییەکاندا زۆر شیعری بەپێزی نووسیوە. دواتر بەھۆی تێکەڵاوبوونی لەگەڵ ئەدەبیاتی فارسیدا چۆتە ناو دنیای تەسەوف کە ئەمەش لە بەرھەمە شیعرییەکانیدا ڕەنگی داوەتەوە.

لە سەردەمی سەفەربەلکدا ئەشکەنجە و دەربەدەری زۆری دیوە، گەلێک لەو چەرمەسەرییانەشی بە شیعر دەربڕیوە، ئاشنایەکی تەواوی شیعری مەحوی بووە بەڕادەیەک ھەندێک زاراوەی نێو شیعرەکانی ئەوی دووبارە کردۆتەوە. مەرگی حاجی تاھیری ھاوڕێی کارێکی زۆری لێکردووە و شیعری بۆ ئەو ڕووداوەش نووسیوە، ئەم شاعیرە ناسراوە ڕۆژی (٥/ ١/ ١٩٧١) کۆچی دوایی کرد و لە (گردی جۆگە)ی شاری سلێمانی بە خاک سپێردرا.

نموونە شیعر[دەستکاری]

عومرێکە کە عومرم بە جەفا سەرفی غەمت کرد دەورێکە نەشاتم بە خەیاڵی ئەلەمت کرد
قابیل بە تۆ ھیچم نەبوو تاکو بە فیدات کەم ڕۆحی بوو ئەویشم بە نیساری قەدەمت کرد
جەورت ھەموو ئەلتافە وە زوڵمت ھەموو عەدڵە ھەرچەند لە مەنعی نیگەھێکم ستەمت کرد
دڵ مایلی قەندی لەبی لەعلەت بوو مەگەسوار نایەیتەوە لام خۆی بە فیدای قەندی دەمت کرد
بۆ زامی جگەر زامی ترە مەرھەمی قوربان چەند خۆشە جەفاو ئەلەمت بۆچی کەمت کرد؟
نەززارە بە ڕووتا ئەڕژێ وەک عەرەقی گوڵ دەرحەق بە منی ڕووت لە ڕووتا کەرەمت کرد
گاھێ بە غەزەب، گاھێ بە خەندەم دەدوێنی خادیم دڵی قوربانی دڵی دەم بە دەمت کرد[١]

سەرچاوەکان[دەستکاری]

  1. ^ "عومرێکە کە عومرم بە جەفا سەرفی غەمت کرد". books.vejin.net. Retrieved 2021-06-20.

کوردیپێدیا[بەستەری مردوو]