ڕەشید نەجیب

لە ئینسایکڵۆپیدیای ئازادی ویکیپیدیاوە
Jump to navigation Jump to search

رەشید نەجیب رۆشنبیرە گەورەیەی کورد ناوی رەشیدی کوڕی نەجیب ئەفەندی کوڕی مەحمود ئاغای کوڕی ھەمزە ئاغای کوڕی محەممەد ئاغایە.

ساڵی ١٩٠٦ لە بنەماڵەیەکی نیشتمانپەروەر و ناسراوی شاری سلێمانی لەدایکبووە.

باوو باپیرانی ئەم نوسەرە خاوەن ھەڵوێستە لەسەردەمی میرنیشینی باباندا ناودارو دەست رۆیشتوو بوون.

رەشید نەجیب بەمنداڵی خراوەتە بەر خوێندن و لەحوجرەی مزگەوتەکان‌و پاشان لە قوتابخانە سەرەتایی‌و ناوەندییەکانی ئەو سەردەمەدا درێژەی بەخوێندن داوە.

کتێبخانە گەورەکەی مامۆستا حسێن نازمی مێژونووس رۆڵی گەورەی بینیوە لەرۆشنبیرکردنی رەشید نەجیب دا و ھەر لەڕێی خوێندنەوەو خۆپێگەیاندنەوە شارەزاییەکی تەواوی لەزمانی عەرەبی و فارسی و کوردی و ئینگلیزی دا پەیدا کردووە.

رەشید نەجیب زوو کەوتۆتە ناو ژیانی مووچە خۆرییەوە و لەئاکامی تواناو لێھاتوویی خۆیدا پلە بەپلە بەرزبۆتەوە.

ماوەیەک لێپرسراوی ھەردوو بەشی عەرەبی و کوردی رادیۆی بەغدا بووەو دواتر کراوە بە موتەسەریف‌و تا رۆژی خانەنشین بوونی لەھەولێر و کەرکوک و موسڵ و بەسرە موتەسەریفێتی کردووە.

ئەم خوێندەوارە گەورەیە لە ساڵانی ١٩٢٧ و ١٩٢٨دا بەرپرس و سەرنووسەری رۆژنامەی ژیان بووە و ساڵی ١٩٣٠یش ھاوڕێ لەگەڵ چەند شەخسییەتێکی نیشتمانپەروەری تردا، لەقوتابخانەی زانستی، بەخۆڕایی مامۆستاییان کردووە.

رەشید نەجیب لەبوارەکانی شیعر و چیرۆک و رەخنەی ئەدەبی و وتاری کۆمەڵایەتی و وەرگێراندا دەیان بەرھەم و بابەتی بەپێزی لە (ژیان) و (دیاری لاوان) و (یادگاری لاوان) و گۆڤاری (گەلاوێژ) دا بڵاو کردۆتەوە.

ھەڵوێستێکی گەورەی ئەم نووسەرە فرە بەرھەمە ئەوە بوو کە کتێبخانە تایبەتەکەی خۆی پێشکەش بە کتێبخانەی گشتی سلێمانی کرد.

مامۆستا رەشید نەجیب ساڵی ١٩٦٨ لە بەغدا کۆچی دوایی کرد.

سەرچاوەکان[دەستکاری]