پارتی لیبراڵ دێموکراتی کوردستان
| پارتی لیبراڵ دێموکراتی کوردستان | |
|---|---|
| وتەبێژ | محەممەد جەمشیدی |
| دامەزرێنەر | عەلی زیرەک |
| دامەزراندن | ٢٠٠٩ |
| شوێنگەی سەرەکی | ڕۆژھەڵاتی کوردستان باشووری کوردستان |
| ئایدۆلۆژیا | لیبرالیزم ناسیۆنالیزم کوردایەتی |
| ماڵپەر | |
| rojhelatnews | |
پارتی لیبراڵ دێموکراتی کوردستان پارتێکی سیاسی لە ڕۆژھەڵاتی کوردستانە. ئەم حیزبە لە ساڵی ٢٠٠٩ دامەزرا و ئێستاکە چالاکییەکی نەماوەتەوە. میدیای ئەم پارتە ماڵپەڕی ڕۆژھەڵات نیوزە.[١]
مێژوو
[دەستکاری]پارتی لیبراڵ دێموکراتی کوردستان لە ڕۆژی ٦ی تەممووزی ٢٠٠٩ دامەزرا. دامەزرێنەرانی پارتەکە سێ کەس بریتی لە عەلی زیرەک، سمایل ڕەسووڵی و نەجمەدین ڕەسووڵی بوون. عەلی زیرەک بە نووسینی مانیفێستی لیبراڵی کورد و مانیفێستی شین: لیبرالیزمی ئینسانی وەکوو تیۆریسیەنی ئەم پارتە ڕۆڵێکی سەرەکیی لە دامەزراندنی پارتەکە ھەبوو.[٢] پاشان چەند کەسێکی دیکە وەکوو محەممەد بیگلەری و محەممەد خزری بوون بە ئەندامی ئەم پارتە، بەڵام ڕێژەی ئەندامانی زیادی نەکرد و پارتی لیبراڵ وەکوو پارتێکی بچووک ماوەتەوە. زۆرینەی سەرکردایەتی ئەم پارتە لە ئەندامانی حیزبی دێموکراتی کوردستان (حەدەکە) بوون.[١]
پارتی لیبراڵ دێموکراتی کوردستان لە ماوەی ساڵەکانی ٢٠٠٩ ھەتا ٢٠١١ دا چالاک بوو، بەڵام لە کۆتاییەکانی ٢٠١١ تووشی ناکۆکیی ناوخۆیی بوو و لەنێوان ھەندیک لە ئەندامانی جیایی داکەوت.[١] لە تشرینی یەکەمی ٢٠١١ چەندین کەس لە ئەندامانی ڕێبەرایەتیی پارتی لیبراڵ دێموکراتی کوردستان ڕایانگەیاند کە پارتەکە تێکەڵی پارتی سەربەستیی کوردستان بووەتەوە، بەڵام پارتی لیبراڵ ڕەتی کردەوە و درێژەی بە کاری خۆی دا.[٣] لە ١٧ی کانوونی یەکەمی ٢٠١٢ لە ھەولێردا کۆمیتەیەکی ساخکەرەوە پێکھات کە دەیویست درێژە بە کار و چالاکییەکانی پارتەکە بدات، بەڵام ئەم پرۆسەیە باش بەڕێوە نەچوو. لەم قۆناخەش چەندین کەس لە ئەندامانی پارتەکە لەلایەن ڕێبەرایەتیی پارتی لیبراڵ لادران.[١]
کۆنفرانسەکانی پارتی لیبراڵ
[دەستکاری]پارتی لیبراڵ دێمۆکراتی کوردستان لە سەردەمی دامەزراندا ٤ کۆنفرانسی بەڕێوەبردووە.[١]
ھاوپەیمانیی نەتەوە بندەستەکانی ئێران
[دەستکاری]پارتی لیبراڵ دێموکراتی کوردستان لەگەڵ کۆمەڵەی سۆسیالدێمۆکرات و پارتی سەربەستیی کوردستان ھاوپەیمانیەکیان دامەزراند کە لە سەرەتادا لە ژێر ناوی ھاوپەیمانی سەربەخۆخوازانی کوردستان بوو و دواتر گوڕاو بۆ ھاوپەیمانیی نەتەوە بندەستەکانی ئێران.[١]
بەڵام دواتر لەو ھاوپەیمانییە ھاتە دەرەوە و بە پێشنیاری عەلی زیرەک لەگەڵ یەکێتی شۆڕشگێڕانی کوردستان و پارتی ئازادی و دێموکراسی کوردستان ھاوپەیمانییەکی تازەتر دامەزراند.[١]
خەباتی چەکدارانە
[دەستکاری]پارتی لیبراڵ دێمۆکراتی کوردستان لە مانگی شوباتی ٢٠١٥دا ڕاگەیاند کە باشووری کوردستان چۆڵ دەکات و لە رۆژھەڵاتی کوردستان دەست بە خەباتی سیاسی و سەربازیی خۆی دەکاتەوە. ھەروەھا ڕاگەیاند کە خەباتی چەکداری وەکوو یەکێک لە باشترین ئەگەرەکانی بەردەمی خۆی دەستنیشان دەکات.[١]
سەرچاوەکان
[دەستکاری]- ^ ئ ا ب پ ت ج چ ح «پارتی لیبڕاڵ دێموکراتی کوردستان». کوردیپێدیا. ١٠ی تشرینی یەکەمی ٢٠١١. لە ١٩ی حوزەیرانی ٢٠٢١ ھێنراوە.
- ^ «عەلی زیرەک». کوردیپێدیا. ٣١ی کانوونی دووەمی ٢٠١٢. لە ١٩ی حوزەیرانی ٢٠٢١ ھێنراوە.
- ^ «حیزب، ڕێکخراوە و پارتە سیاسییەکانی ڕۆژھەڵاتی کوردستان». کوردستان پۆست. ٥ی تشرینی دووەمی ٢٠٢٠. لە ڕەسەنەکە لە ٢٤ی حوزەیرانی ٢٠٢١ ئەرشیڤ کراوە. لە ١٩ی حوزەیرانی ٢٠٢١ ھێنراوە.