تەڤگەری گەنجانی شۆڕشگێڕی سووریا
تەڤگەری گەنجانی شۆڕشگێڕی سووریا یان تەڤگەرا جوانێن شۆرەشگەرێ سووریێ (بە کوردیی باکووری: Tevgera Ciwanên Şoreşger ê Sûriyê، بە عەرەبی: حركة الشبيبة الثورية السورية) کە پێشتر لەژێر ناوی یەکێتیی گەنجانی ڕۆژاوا (بە کوردیی باکووری: Yekîtiya Ciwanên Rojava, YCR) چالاک بوو، ڕێکخراوەیەکی گەنجانی سووریاوەیە کە لە گونجانی کورد، عەرەب، سووریانی و ئەرمەنی بە شێوەیەکی ھاوبەش پێک ھاتووە.
ئەم ڕێکخراوە تەنیا لە خاکی وڵاتی سووریادا چالاکی دەکات و لە تەڤگەری گەنجانی شۆڕشگێر کە لە باکووری کوردستان چالاکە سەربەخۆ و جیاوازە. بەڵام سەرەڕای ئەم سەربەخۆبوونەوە، لە بواری ئایدیۆلۆجیاوە ھەر دوو ڕێکخراوە لە بیرۆکەی ئاپۆییستی پەیڕەوی دەکەن و ھزر و ڕایەکانی عەبدوڵڵا ئۆجەلان بە بنەما دەگرن.
ئەندامانی تەڤگەری گەنجانی شۆڕشگێڕی سووریا لە خۆپێشاندانەکان دژ بە داعش و ھەڵمەتھێنانەکانی حکوومەتی تورکیا بۆ سەر خاکی ڕۆژاوای کوردستان، بەرگریکردن لە زیندانییە سیاسییەکان، ھەوڵدان بۆ ئازادکرانی عەبدوڵڵا ئۆجەلان و چالاکییەکانی ھاوتا بەشدارن.
کۆڤار[دەستکاری]
تەڤگەری گەنجانی شۆڕشگێڕی سووریا مانگانە کۆڤارێک لە ژێرناوی جوانێن شۆرەشگەر بڵاو دەکات.[١]
کۆنگرەکان[دەستکاری]
دوویەمین کۆنگرەی یەکێتیی گەنجانی ڕۆژاوا لە ڕۆژانی ١٠ و ١١ی تشرینی دووەمی ٢٠١٨ بە بەشداریکردنی ٥ ھەزار کەس لە گەنجانی ناوچەکانی باکوور و ڕۆژھەڵاتی سووریا لە ھۆلی ناوەندی چاند و ھونەری ئارام تیگران لە ڕمێلان بەڕێوەچوو. لەم کۆنگرەیە یەکێتیی گەنجانی ڕۆژاوا ناوی خۆی گۆڕاند بە تەڤگەری گەنجانی شۆڕشگێڕی سووریا و لۆگۆیەکی تازەیش بۆ خۆی پەسەند کرد و بۆ مەبەستی پێکھێنانی مەجلیسی ئەم تەڤگەرە ھەڵبژاردنێک بەڕێوەچوو کە لە تێدا ٤٩ گەنجی باکوور و ڕۆژھەڵاتی سووریا بە ئەندامێتیی مەجلیسی تەڤگەری گەنجانی شۆڕشگێڕی سووریا ھەڵبژێردران.[٢]
سەرچاوەکان[دەستکاری]
- ^ نووچە جوان: جوانێن شۆرەشگەر کەمپێنی «وەرن بۆ ئازادی شەڕ بکەین» ڕاگەیاند (بە تورکی)، نووسراو لە ١٠ی تەممووزی ٢٠٢١؛ ٢٩ی تشرینی یەکەمی ٢٠٢١ لە وەیبەک مەشین، ئەرشیڤ کراوە. سەردان لە ١٤ی تشرینی یەکەمی ٢٠٢١.
- ^ نووچە جوان: بریاڕەکانی نوێی تەڤگەری گەنجانی شۆڕشگێڕ (بە تورکی)، نووسراو لە ١١ی تشرینی دووەمی ٢٠١٨؛ ٢٩ی تشرینی یەکەمی ٢٠٢١ لە وەیبەک مەشین، ئەرشیڤ کراوە. سەردان لە ١٤ی تشرینی یەکەمی ٢٠٢١.
