ویکیپیدیا:وتاری ھەڵبژێردراوی ھەفتە/ھەفتانە
| سەرەکی | وتارەکانی ھەفتانە |
ھەفتانە ١
ویکیپیدیا:وتاری ھەڵبژێردراوی ھەفتە/ھەفتانە/١
.jpg)
ھاڵکی باوەڕپێنەکراو (بە ئینگلیزی: The Incredible Hulk) فیلمێکی سووپەرھیرۆی خەیاڵی زانستیی ئەمریکییە لە ساڵی ٢٠٠٨ کە لەسەر بنەمای کەسایەتیی کۆمیکەکانی ماڕڤڵ «ھاڵک» دروست کراوە. بەرھەمی ستۆدیۆکانی مارڤڵە و دابەشکردنی لەلایەن کۆمپانیای یوونیڤەرساڵ پیکچەرزەوە بووە، دووەم فیلمە لە گەردوونی سینەمایی مارڤڵ (MCU). لە دەرھێنانی لویس لێتەریەرە و لە سیناریۆی زاک پێنە، کە ئێدوارد نۆرتن ڕۆڵی بروس بانەر دەگێڕێت شانبەشانی لیڤ تایلەر، تیم ڕۆت، ویلیام ھارت، تیم بلەیک نێڵسن، تای باڕێڵ و کریستینا کەیبۆت. لە فیلمەکەدا بروس بانەر بەھۆی تیشکی گاماوە دەبێتە ھاڵک وەک پیاوێکی بێ ئاگا ھەڵسوکەوت دەکات، و لەدەستی سەربازەکانی ئەمریکا ھەڵدێت، کە دەیانەوێت بیگرن، و لەکاتێکدا کە بانەر خۆی دەیەوێت لەدەستی ھاڵک ڕزگاری بێت و بگەڕێتەوە دۆخەکەی جارانی خۆی.
دوای پێشوازییەکی تێکەڵاو لە فیلمی ھاڵک لە ساڵی ٢٠٠٣ی یوونیڤەرساڵ، ستۆدیۆکانی مارڤڵ مافی کارەکتەرەکەیان وەرگرتەوە، ھەرچەندە یوونیڤەرساڵ مافی دابەشکردنەکەی پاراست. لێتێریێر کە ئارەزووی دەرھێنانی فیلمی ئایرۆن مانی بۆ مارڤڵ دەربڕیبوو، بەڵام نەکرا، پێن دەستی بە کارکردن کرد لەسەر سیناریۆیەک کە زۆر نزیکتر بێت لە کۆمیکەکان و زنجیرە تەلەڤیزیۆنییەکەی ساڵی ١٩٧٨ بە ھەمان ناو. لە نیسانی ٢٠٠٧، نۆرتن بەکرێ گیرا بۆ ڕۆڵگێڕانی بانەر و دووبارە نووسینەوەی سیناریۆی پێن. وێنەگرتن لە مانگی تەممووز تا تشرینی دووەمی ٢٠٠٧ ئەنجامدرا، بە پلەی یەکەم لە تۆرۆنتۆی کەنەدا، لەگەڵ وێنەگرتنی زیادە لە شاری نیویۆرک و ڕیۆ دێ ژانێرۆ. زیاتر لە ٧٠٠ وێنەی کاریگەرییە بینراوەکان لە پۆست-پرۆدەکشندا دروستکراون بە بەکارھێنانی تێکەڵەیەک لە گرتنی جووڵە و وێنەی دروستکراوی کۆمپیوتەر بۆ تەواوکردنی فیلمەکە.
فیلمی ھاڵکی باوەڕپێنەکراو بۆ یەکەمجار لە شانۆی گیبسۆن لە یونێڤێرساڵ سیتی لە ویلایەتی کالیفۆرنیا لە ٨ی حوزەیرانی ٢٠٠٨ نمایشکرا و لە ١٣ی حوزەیران لە ئەمریکا نمایشکرا، وەک بەشێک لە قۆناغی یەکەمی MCU. فیلمەکە بەھۆی زنجیرە ئەکشنەکانییەوە ستایشی زۆری لێکرا و بە پێشکەوتنێک دادەنرا بە بەراورد بە فیلمەکەی ساڵی ٢٠٠٣، بەڵام ڕەخنەی زۆر لە کەمی قووڵبوونەوە لەچیرۆکی فیلمەکە گیرا. ئەم فیلمە داھاتی ٢٦٤٫٨ ملیۆن دۆلاری لە سەرانسەری جیھاندا بەدەستھێناوە، بەمەش دەبێتە کەمترین داھاتی فیلمی گەردوونی سینەمایی مارڤڵ MCU. نۆرتن لەگەڵ مارڤڵ ناکۆک بوو لەسەر مۆنتاژکردنی کۆتایی فیلمەکە، بۆیە ڕۆڵی بانەر لەلایەن مارک ڕوفالۆ جێگەی گرترایە و بۆ ناوەڕۆکی داھاتووی MCU کە لە ساڵی ٢٠١٢ لە فیلمی تۆڵەستێنەکان دەستی پێکرد.
خوێندنەوەی زیاتر...
ھەفتانە ٢
ویکیپیدیا:وتاری ھەڵبژێردراوی ھەفتە/ھەفتانە/٢
جامی جیھانیی فیفا یان مۆندیال ڕووداوێکی وەرزشی نێودەوڵەتییە کە لەلایەن یەکێتیی تۆپی پێی جیھانەوە سەرپەرشتی دەکرێت. لەوەتەی ساڵی ١٩٣٠یەوە، ھەر چوار ساڵێک بەڕێوەدەچێت، جگە لە ساڵاکانی ١٩٤٢ و ١٩٤٦ ھەڵوەشایەوە بەھۆی ڕووداوەکانی جەنگی جیھانیی دووەم. لە ساڵی ١٩٩٨ ژمارەی وڵاتە بەشداربووەکان بۆ ٣٢ ھەڵبژاردە بەرزکرایەوە و لە ساڵی ٢٠٢٦ بڕیارە ٤٨ هەڵبژاردە بەشداری بکەن بۆ یەکەمجار لە مێژووی پاڵەوانێتییەکەدا ئەو ھەڵبژاردانە لە ھەشت کۆمەڵەدا پۆلێن دەکرێن، بۆ ماوەی یەک مانگ لە یاریگاکانی وڵاتی میواندار ڕکابەری دەکەن لە پێناو بەدەست ھێنانی ئەم نازناوە، ھەڵبژاردەکان لە ڕێگای سیستەمی پاڵاوتنەوە لە ماوەی سێ ساڵدا سەردەکەون بۆ بەشداریکردن لە جامی جیھانیی فیفا وڵاتی میواندار بە شێوایەکی خۆکارانە لە کۆمەڵەی یەکەم جێگیردەبێت بەبێ پاڵاوتن ، لە بیست و یەک خولی پێشووی ئەم پاڵەوانییەتییە بە گشتی ٧٩ ھەڵبژاردەی نیشتمانی بەشدارییان کردووە و ھەشت ھەڵبژاردەی جیاواز نازناوی جامی فیفایان بردووەتەوە. ھەڵبژاردەی بەڕازیل بەشداریی لە سەرجەم خولەکان کردووە، واتە بەشداربوونی لە ھیچ خولێکی پاڵەوانییەتییەکە لەدەست نەداوە، لەھەمان کاتدا زۆرترین جار نازناوەکەی بەدەست ھێناوە، پێنج جار لە ساڵەکانی: ١٩٥٨، ١٩٦٢، ١٩٧٠، ١٩٩٤، ٢٠٠٢ بوون. ھەروەھا ھەڵبژاردەی ئیتالیا لە ساڵەکانی: ١٩٣٤، ١٩٣٨، ١٩٨٢، ٢٠٠٦. لەگەڵ ھەڵبژاردەی ئەڵمانیا لە ساڵەکانی :١٩٥٤، ١٩٧٤، ١٩٩٠، ٢٠١٤ چوار جار نازناوەکەیان بەدەست ھێناوە و ھەریەک لە ھەڵبژاردەکانی فەڕەنسا، ئۆروگوای دوو جار بوونە پاڵەوان ھەروەھا ھەڵبژاردەکانی ئینگلتەرا و ئیسپانیا یەک جار بوونەتە پاڵاوانی ئەم جامە. ھەڵبژاردەی ئیتالیا یەکەم ھەڵبژاردەبوو کە توانی دووجار لەسەر یەک ئەم نازناوە بباتەوە لە ساڵەکانی ١٩٣٤ و ١٩٣٨، دوای ئەو ھەڵبژاردەی بەڕازیل دێت ١٩٥٨ و ١٩٦٢. جامی جیھانیی فیفا یەکێکە لە گەورەترین ڕووداوە وەرزشییەکانی جیھان. لە یاریی کۆتاییی جامی جیھانیی فیفای ٢٠٠٦ کە لە ئەڵمانیا بەڕێوەچوو، بە نزیکەی ٧١٥ ملیۆن کەس سەیری یارییەکەیان کرد. پاڵەوانی ئێستا ھەڵبژاردەی ئەرجەنتینە کە لە دوایین خولی ئەم پاڵەوانییەتییە لە ٢٠٢٢ کە لە قەتەڕ بەڕێوەچوو نازناوەکەی بەدەست ھێنا بۆ سێیەم جار لە مێژوودا
١٧ وڵات میوانداریی جامی جیھانییان کردووە، ھەریەکەیان بەڕازیل، فەڕەنسا، ئیتاڵیا، ئەڵمانیا و مەکسیک دوو جار میواندارییان کردووە، لەکاتێکدا ئۆرۆگوای، سویس، سوێد، چیلی، ئینگلتەرا، ئەرژەنتین، ئیسپانیا، ئەمریکا، ژاپۆن و کۆریای باشوور (بە ھاوبەشی)، ئەفریقای باشوور و ڕووسیا ھەریەکەیان یەکجار میواندارییان کردووە. بۆ ساڵی ٢٠٢٦، بە ھاوبەشی لەلایەن کەنەدا و ئەمریکا و مەکسیکەوە میوانداری دەکەن، ئەمەش جیاوازی بە مەکسیک دەدات کە دەبێتە یەکەم وڵات سێ جار میوانداری یارییەکانی ئەم پاڵەوانییەتییە بکات.
خوێندنەوەی زیاتر...
ھەفتانە ٣
ویکیپیدیا:وتاری ھەڵبژێردراوی ھەفتە/ھەفتانە/٣
وزەی خۆری (بە ئینگلیزی: Solar Energy) وزەیەکە کە لە ڕووناکی و گەرمیی خۆرەوە وەردەگیرێت. ئەم وزەیە بە بەکارھێنانی کۆمەڵێک تەکنۆلۆژیای نوێ بەرھەم دێت کە ھەموو ڕۆژێک خەریکی گەشەکردن و پێشکەوتنن. بڕێک لەم تەکنۆلۆژیایانە بریتین لە بەکارھێنانی کۆکەرەوەی گەرمیی خۆری، تەکنۆلۆژیای (فۆتۆڤۆڵتایی یان تەختەخانەی ھەڵمژی خۆری)، وزەی گەرمی خۆر، تەلارسازیی خۆری، کێڵگەکانی وزەی خۆری و تەکنیکییەکانی توانەوەی خوێیە جۆربەجۆرەکان و فۆتۆسینتەسیزی دەستکرد.
سەرچاوەی سەرەکیی وزە نوێ و خاوێنەکەی جیھان تەکنەلۆژیا ئاڵۆز و پێشکەوتووەکانی بواری خۆرن، کە بەشێوەیەکی بەرچاو کاریان لەسەر دەکرێت و بەرەو پێش دەچن. ئەم تەکنەلۆژیایانە پشت بە چۆنییەتی ھەڵمژینی وزەی خۆر و چۆنییەتی کۆگاکردن و دواتر گۆڕینی بۆ وزەی گەرمی دەبەستن. تەکنیکییە چالاکەکانی بواری خۆر بریتیین لە بەکارھێنانی سیستەمی فۆڤۆڵتایک، وزەی خۆری چڕکراو، ئاوگەرمکەری خۆری و ھەموو ئەو ئامرازانەی کە بۆ ئیشپێکردنیان پەنا بۆ بەکارھێنانی وزە و تەکنیکی (Passive solar) دەبەن، وەک نموونە دیاریکردنی و ئاڕاستەکردنی ڕووی باڵاخانەیەک بە ڕووی خۆر یان دیاریکردنی ئەو ماددانەی کە بارستەی گەرمییان باشە یان تایبەتمەندیی بڵاوکردنەوەی ڕووناکییان ھەیە، ھەروەھا چۆنییەتی سوودبینینی ئەو گەرمییەی کە لە بۆشاییی ھەوادا ھەیە.
وزەی خۆری بەو گەورەییەی کە لە بەردەستدایە، بووەتە جێگای سەرنج کە بۆچی تەنھا لە بواری وزەی کارەبا سوودی لێ بینراوە. بەرنامەی گەشەپێدانی نەتەوە یەکگرتووەکان لە ھەڵسەنگاندنی وزەی جیھانی ساڵی ٢٠٠٠دا، ئەوەی بۆ دەرکەوت کە توانای ساڵانەی وزەی خۆر ١٫٥٧٥–٤٩٫٨٣٧ ئیجەبوول (EJ) بووە. ئەمە چەند جارێک لە کۆی بەکاربردنی ھەموو جۆرە وزە جۆربەجۆرەکانی تری جیھان گەورەترە، کە لە ساڵی ٢٠١٢دا ٨٫٥٥٩ ئی جەی بووە.
خوێندنەوەی زیاتر...
ھەفتانە ٤
ویکیپیدیا:وتاری ھەڵبژێردراوی ھەفتە/ھەفتانە/٤
مۆمیاکە (بە ئینگلیزی: The Mummy) فیلمێکی ئەکشنی سەرکێشیی ئەمریکییە، لە ساڵی ١٩٩٩ لە نووسین و دەرھێنانی ستیفن سۆمێرزە. دووبارە دروستکردنەوەی فیلمێکە لە ساڵی ١٩٣٢ بە ھەمان ناو، کە برێندان فرایزەر، ڕەیچڵ ڤایس، جۆن ھانا و ئارنۆڵد ڤۆسلۆ ڕۆڵی سەرەکی وەک مۆمیای زیندووکراوە دەگێڕن. فیلمەکە بەدوای سەرگەردانی ڕیک ئۆکۆنێلدا دەگەڕێت کە لەگەڵ کتێبخانەوانێک و برا گەورەکەی گەشت دەکات بۆ ھاموناپترا (شاری مردووەکان)، لەوێ بە ھەڵە ئیمھۆتێپ، سەرۆک قەشە نەفرەت لێکراوێکی خاوەن ھێزی سەرووسروشتی لە خەو ھەڵدەستێنن.
گەشەپێدان ساڵانێکی زۆری خایاند، چەندین سیناریۆ و دەرھێنەری تێدابوو. لە ساڵی ١٩٩٧ سۆمێرز بە سەرکەوتوویی وەشانێکی سەرگەردانتر و ڕۆمانسیتری ھێنا پێش چاو. وێنەگرتنی فیلمەکە لە مەغریب و بەریتانیا ئەنجامدرا، تیمەکە توانین وێنەی مار و زریان و خۆڵ و تۆزەکانی نێو بیابانەکان بگرن بۆ فیلمەکە. «ئیندستریال ئاند مەجیک» زۆرێک لە کاریگەرییە بینراوەکانی دابین کرد، بەتایبەت تێکەڵکردنی گرتە ڤیدیۆیییە ئەکشنە ڕاستەوخۆکان و وێنەی دروستکراوی کۆمپیوتەرییی بۆ دروستکردنی ئەھریمەنە تایبەتمەندەکە.
فیلمی مۆمیاکە لە ٧ی ئایاری ١٩٩٩ لە شانۆدا نمایشکرا، سەرەڕای پێداچوونەوەی ڕەخنەگرانی تێکەڵ، سەرکەوتنێکی بازرگانی بەدەستھێنا و داھاتی زیاتر لە ٤١٦٫٤ ملیۆن دۆلاری لە سەرانسەری جیھاندا بەدەستھێنا لە بەرامبەر بوودجەی بەرھەمھێنانی ٨٠ ملیۆن دۆلار. سەرکەوتنی فیلمەکە دوو بەدواداچوونی ڕاستەوخۆی لێکەوتەوە بە ناوەکانی گەڕانەوەی مۆمیاکە (٢٠٠١) و مۆمیاکە: گۆڕی ئیمپراتۆری ئەژدیھا (٢٠٠٨). ھەروەھا بووە ھۆی ئەوەی کە زنجیرەیەکی ئەنیمەیشنی و پێشبڕکێی فیلمی دووپشکە پاشاکە (٢٠٠٢) بەرھەم بھێنرێت، کە بەدواداچوونەکانی خۆی دروست کرد. ھەوڵەکان بۆ دووبارە دەستپێکردنەوەی موڵکەکە و دەستپێکردنی فیلمێکی نوێی میدیایی بووە ھۆی ئەوەی فیلمێکی ساڵی ٢٠١٧ بەم ناوە دروست بکرێت.
خوێندنەوەی زیاتر...
ھەفتانە ٥
ویکیپیدیا:وتاری ھەڵبژێردراوی ھەفتە/ھەفتانە/٥
یەکەم ئەفسەری پۆلیس «مارتن کریستۆفەر کیمی» (بە ئینگلیزی: First Sergeant Martin Christopher Keamy) کەسایەتییەکی خەیاڵییە کە کێڤن دوراند لە وەرزی چوارەم و شەشەمی زنجیرەی تەلەڤیزیۆنیی ئەمریکیی کەناڵی ئەی بی سی بەناوی ونبوو ڕۆڵی تێدا دەگێڕێت. کیمی لە ئەڵقەی پێنجەمی "وەرزی چوارەم"دا وەک ئەندامێکی تیمی کەشتییەکی بارھەڵگر بە ناوی کاھانا دەناسێنرێت، کە لە دەریای ئەو دوورگەیەدایە زۆربەی دیمەنەکانی زنجیرەی ونبوو تێیدا ڕوودەدات. لە نیوەی دووەمی وەرزەکەدا، کیمی وەک دژبەری سەرەکی کاری کرد. سەرۆکی تیمێکی بەکرێگیراوە کە لەلایەن ملیاردێر چارڵز ویدمۆرەوە بەکرێ گیراوە (کە ئالان دەیل ڕۆڵی تێدا دەگێڕێت). دەنێردرێتە دوورگەکە بۆ ئەرکێک بۆ گرتنی دوژمنی ویدمۆر (مایکل ئیمێرسن) لەماڵەکەی خۆیدا، و پاشان دوورگەکەش بسوتێنن.
بە پێچەوانەی کۆمەڵە کەسایەتییەکانی زنجیرەی ونبوو کە بە گوتەی نووسەران ھەریەکەیان نیازێکی باش و خراپیان ھەیە، نووسەران وتوویانە کە کیمی کەسایەتییەکی خراپە. پەیوەندی بە دوراندەوە کرا بۆ ئەو ڕۆڵە، ئەمەش لە دوای ئەوەی یەکێک لە ڕۆڵگێڕەکانی زنجیرەی ونبوو لە فیلمی «٣:١٠ بۆ یوما» لە ساڵی ٢٠٠٧دا ڕۆڵی بینی. دوراند وەک کەسایەتییەکانی تری زنجیرەی ونبوو کاتێک ڕۆڵەکەی پەسەند کرد، لە کەوانی ڕۆڵی کەسایەتییەکەی ئاگادار نەکرایەوە. بەدرێژایی ماوەی نۆ ئەڵقەی دوراند وەک ئەستێرەی میوان لە وەرزی چوارەمدا، شتێکی کەم ئاشکرا بوو سەبارەت بە ژیانی کیمی پێش ھاتنی بۆ دوورگەکە و دوراند ئەمەی وەک ھۆکارێک ھێنایەوە کە بینەران «خۆشیان دەویست لەبڕی ئەوەی ڕقیان لە کەسایەتییە خراپەکەی بێت». ڕەخنەگران ستایشی نووسەرانیان کرد کە نەریتی زنجیرەی ونبوویان شکاندووە و کەسایەتییەکی بەڕواڵەت بێ ھەستیان دروست کردووە، لە ھەمان کاتدا بە شێوەیەکی ئەرێنی پێداچوونەوە بە نمایش و دەرکەوتنی دورانددا کراوە. کیمی لە وەرزی کۆتاییدا گەڕایەوە بۆ دەیەم و یازدەھەمین دەرکەوتن.
خوێندنەوەی زیاتر...
ھەفتانە ٦
ویکیپیدیا:وتاری ھەڵبژێردراوی ھەفتە/ھەفتانە/٦
جامی کیشوەرەکان یان جامی کۆنفیدراسیۆنەکان (بە ئینگلیزی: FIFA Confederations Cup) پاڵەوانێتییەکی نێونەتەوەییی تۆپی پێ بوو کە لەلایەن فیفا سەرپەرشتی دەکرا. سەرەتا دووساڵ جارێک بەرێوە دەچوو بەڵام لە دوایی جامی کیشوەرەکان لە ساڵی ٢٠٠٥ کرا بە چوار ساڵ جارێک. پاڵەوانییەتییەکە لە نێوان پاڵەوانانی (جامی نەتەوەکانی ئەورووپا، کۆپا ئەمریکا، جامی نەتەوەکانی ئاسیا، جامی نەتەوەکانی ئەفریقا، جامی کۆنکاکاف و جامی ئۆقیانوسیا) جگە لە پاڵەوانی جامی جیھانیی فیفا و میوانداری جامی داھاتوو ئەنجام دەدرا.
پاڵەوانێتییەکە لە ساڵی ١٩٩٢ لەژێر ناوی جامی "شا فەھد" بوو بەناوی وەزیری وەرزشی عەرەبستانی سعوودی ئەمیر فەیسەڵ کوڕی فەھد دەستی پێکرد، یەکێتی تۆپی پێی عەرەبستانی سعوودی دووجار ئەم پاڵەوانییەتییەی لەسەر یەک ڕێکحست، لە ساڵی ١٩٩٧ فیفا بە فەرمی وەک پاڵەوانییەتییەکی نێودەوڵەتی ناساندی و ئەرکی ڕێکخستن و سەرپەرشتی کردنی لە ئەستۆ گرت لەژێر ناوی جامی کیشوەرەکان ساڵی ٢٠٠٥ بڕیاردرا سالێک پێش جامی جیھانیی فیفا، لە وڵاتی میواندار ئەنجام بدرێت وەک ئامادەکارییەک بۆ جامی جیھانی. ئەم پاڵەوانێتییە بە دووەم گرنگترین پاڵەوانێتی لە دوای مۆندیال دادەنرا، بە شێوەیەک خەریک بوو سەرنجی بینەرانی جیھانی زیاتری بۆخۆی ڕاکێشا، بەو پێیەی لە جامی کیشوەرەکانی ٢٠١٣ بینەرانی یارییەکانی بۆ ٧٠ ملیۆن کەس لە ١٠ وڵات بەرزبووەوە، لەکاتێکدا ژمارەکە ئامادەبوانی یارییەکانی پاڵەوانێتییەکە گەیشتە ٨٠٤ ھەزار و ٦٥٩ کەس.
ھەڵبژاردەی بەڕازیل چوارجار ئەم نازناوەی بەدەست ھێناوە لە ساڵەکانی ١٩٩٧، ٢٠٠٥، ٢٠٠٩ و ٢٠١٣ ھەڵبژاردەی فەڕەنسا دووجار (٢٠٠١ – ٢٠٠٣) و ھەریەکە لە ھەڵبژاردەی ئەرژەنتین (١٩٩٢)، ھەڵبژاردەی دانیمارک (١٩٩٥)، ھەڵبژاردەی مەکسیک (١٩٩٩)، ھەڵبژاردەی ئەڵمانیا (٢٠١٧)یەکی یەک جار ئەم نازناوەیان بەدەست ھێناوە. کواوتێمۆک بلانکۆ یاریزانی پێشووی مەکسیک و ڕۆناڵدینھۆ یاریزانی پێشووی بەڕازیل بە تۆمارکردنی ٩ گۆڵ بە گۆڵکاری پاڵەوانێتییەکە دادەنرێن. نێڵسۆن دیدا گۆڵپارێزی بەڕازیل ٢٢جار لە یارییەکان بەشداری کردووە.لە مانگی ئازاری ٢٠١٩ فیفا ڕاگرتنی ئەم پاڵەوانێتییە و گۆڕینی بە فراوانکردنی جامی جیھانی یانەکان بۆ ٢٤ یانە ڕاگەیاند.
خوێندنەوەی زیاتر...
ھەفتانە ٧
ویکیپیدیا:وتاری ھەڵبژێردراوی ھەفتە/ھەفتانە/٧
ئەمبەر لاورا ھێرد (بە ئینگلیزی: Amber Laura Heard، لەدایکبووی ٢٢ی نیسانی ١٩٨٦) ئەکتەرێکی ئەمریکی و چالاکوانێکی مرۆیی و کۆمەڵایەتییە. یەکەم ڕۆڵی سەرەکی لە فیلمێکی ترسناکدا بوو بەناوی "ھەموو کوڕەکان ماندی لەینیان خۆش دەوێت" (٢٠١٦)، هەروەها ڕۆڵی سەرەکی لە فیلمەکانی وەک: "قاوشەکە (٢٠١٠)، شۆفێریی بەتووڕەیی (٢٠١١)، گۆڕەپانی لەندەن (٢٠١٨)" بینیووە. ھەروەھا ڕۆڵی پاڵپشتی لەچەندین فیلمدا ھەبووە، لەوانە: "پاینئەپڵ ئێکسپرێس (٢٠٠٨)، ھەرگیز واز مەھێنە (٢٠٠٨)، جۆنسز (٢٠٠٩)، ڕۆژنامەی ڕۆم (٢٠١١)، پارانۆیا (٢٠١٣)، کوشتنەکانی ماچیتی (٢٠١٣)، مەجیک مایک ئێکس ئێکس ئێڵ (٢٠١٥)، کچە دانمارکییەکە (٢٠١٥)". ھێرد یەکێکە لە کەسایەتییەکانی گەردوونی فراوانکراوی دی سی و ڕۆڵی میرای لە فیلمی دەستەی دادپەروەری (٢٠١٧)، ئەکوامان (٢٠١٨) گێڕا، و لە داھاتوودا لە فیلمی ئەکوامان و دوورگە ونبووەکە (٢٠٢٣) دەردەکەوێتەوە.
ھەروەھا ڕۆڵی لە زنجیرە تەلەڤیزیۆنییەکانی وەک درامای ھەرزەکارانی سی دەبلیوو بەناوی دارخورمای شاراوە (٢٠٠٧)، و زنجیرەیەکی درامی لەسەر وێژەی کۆتایی جیھان بەناوی وەستاوەکە (٢٠٢٠) بینیوە. لە ساڵی ٢٠١٦، ھێرد بوو بە خۆبەخش لەگەڵ یەکێتی ئازادییە مەدەنییەکانی ئەمریکا (ACLU)، ڕۆڵێکە کە تەرخانکراوە بۆ ئەو کەسانەی کە داکۆکی لە مافە مەدەنییەکان و ئازادییە مەدەنییەکان دەکەن. ھێرد لە ساڵی ٢٠١٥ ھاوسەرگیری لەگەڵ ئەکتەری ناوداری ئەمریکی جۆنی دێپ کردووە تا ساڵی ٢٠١٦ ھاوسەرگیرییەکەی ھەڵوەشاندەوە. لەو کاتەوە ئەو دووانە یەکتریان بە دەستدرێژی خێزانی تۆمەتبار کردووە و بەشداری دوو دۆسیەی ناوزڕاندنی درێژخایەن و باڵایان کردووە، لەوانە دادگاییکردنی دێپ دژی ڕۆژنامەی نیووز گرووپ و دادگاییکردنی دێپ دژی ھێرد کە بە شێوەیەکی بەرفراوان بانگەشەی بۆ کراوە.
خوێندنەوەی زیاتر...
ھەفتانە ٨
ویکیپیدیا:وتاری ھەڵبژێردراوی ھەفتە/ھەفتانە/٨
ڕوەکەکان دژی زۆمبییەکان: شەڕی باخچە (بە ئینگلیزی: Plants Vs Zombies: Garden Warfare) کایەیەکی ڤیدیۆییی فرەیاریزانی تەقەکەری کەسی سێیەم و بەرگری لە بورجی ساڵی ٢٠١٤یە. لە لایەن پۆپ کاپ گەیمز پەرەی پێ دراوە و لە لایەن ئێلیکترۆنیک ئاڕتس بڵاو کراوەتەوە. سێیەمین کایەی فرەنچایزی ڕوەکەکان دژی زۆمبییەکانە. کایەکە بە دەوری کۆمەڵێک ڕوەک دەسووڕێتەوە کە مرۆڤایەتی لە داگیرکاریی زۆمبییەکان دەپارێزن. لە یارییەکەدا یاریزانەکان کۆنترۆڵی ڕوەکەکان (لەژێر دەستی کرەیزی دەیڤ) یان زۆمبییەکان (لەژێر دەستی دکتۆر زۆمبۆس) دەکەن، ئەمە لەکاتێکدایە بە چەندین شێوازی وەک "فرە یاریزان و کێبڕکێ"دا شەڕ دەکەن. دوای تەواوکردنی یارییەکان و تەواوکردنی ئامانجەکان، یاریزانەکان سکە بەدەستدەھێنن بۆ بەدەستھێنانی "چەسپ" کە شتە تایبەتەکان و جۆرەکانی کەسایەتییەکانی پێ دەکەنەوە. کۆمپانیای پۆپکەپ گەیمز لە سەرەتای ساڵی ٢٠١٢ دەستی بە پەرەپێدانی شەڕی باخچە کردووە. بڕیاریان دا لە ڕەگ و ڕیشەی بەرگریی بورجی زنجیرەکە دوور بکەونەوە، و یارییەکە بەکاربھێنن بۆ ناساندنی زنجیرەکە بە بینەرێکی فراوانتر. تیمەکە ئیلھامیان لە تیمی دروستکەری یارییەکانی تر وەرگرتووە کە شێوازی تەقەر بەکاردەھێنن، یەکێک لەو یاریانە بریتییە لە تیم فۆرترێس ٢.
لە کاتی دیزاینکردنی "ھەشت پۆل"ەکەی یارییەکەدا ڕووبەڕووی ڕەخنەی جیاواز بوونەتەوە. یارییەکە بە بزوێنەری فرۆستبایت ٣ کاردەکات. تیمەکە لە کاتی جێبەجێکردنی تەکنەلۆژیاکەیدا لە نزیکەوە ھاوکاری لەگەڵ گەشەپێدەری فرۆستبایت ئی ئەی دایسیان کردووە. یارییەکە لە ئی تری ٢٠١٣ ئاشکراکرا، و لە شوباتی ٢٠١٤ وەک ناونیشانێکی بوددجە بۆ ئێکس بۆکس ٣٦٠ و ئێکس بۆکس وەن بڵاوکرایەوە. دواتر وەشانی مایکرۆسۆفت ویندۆز و پلەیستەیشن ٣ و پلەیستەیشن ٤ لە کۆتایی ئەو ساڵەدا بڵاوکرایەوە. یارییەکە بەگشتی لەلایەن ڕەخنەگرانەوە پێشوازییەکی ئەرێنی لێکرا، ستایشی ئاڕاستەی تۆنی یاریزانانە و ھونەر و شەڕکردن و دیزاینی کەسایەتییەکانی کرا؛ بەڵام پێشکەوتنی یارییەکە و نەبوونی ڕەسەنایەتی و نەبوونی ناوەڕۆک بەتایبەتی ڕەخنەیان لێگیرا. یارییەکە لەگەڵ چەند پارچە ناوەڕۆکێکی بێبەرامبەر کە دەتوانرێت دابەزێنرێت لەگەڵ بڵاوبوونەوەیدا پشتگیری لێکرا. تا مانگی تشرینی دووەمی ٢٠١٥ زیاتر لە ھەشت ملیۆن یاریزان ئەم یارییەیان ئەنجامدابوو. بەدواداچوونێک بەناوی ڕوەکەکان دژی زۆمبییەکان: شەڕی باخچە ٢ لە مانگی شوباتی ٢٠١٦ بڵاوکرایەوە.
خوێندنەوەی زیاتر...
ھەفتانە ٩
ویکیپیدیا:وتاری ھەڵبژێردراوی ھەفتە/ھەفتانە/٩
.jpg)
چاوەڕێ (بە ئینگلیزی: Waiting) فیلمێکی درامیی ھیندیی ساڵی ٢٠١٥یە، لە دەرھێنانی ئانو مینۆن. فیلمەکە لەلایەن پریتی گوپتا و مانیش موندرە لەژێر ئاڵای ئیشکا فیلمز و دریشیام فیلمز بەرھەم ھێنراوە، و لەلایەن مێنۆن و جەیمز ڕوزیکا بە ھاوبەشی نووسراوە و نەسرەدین شا و کالکی کۆچلین ڕۆڵی سەرەکی تێدا دەگێڕن. فیلمی چاوەڕێ تیشک دەخاتە سەر پەیوەندی نێوان دوو کەس لە چین و توێژە جیاوازەکانی ژیان لە نەخۆشخانەیەکدا دەبنە ھاوڕێی یەکتر، لە ھەمان کاتدا چاودێری ھاوسەرکانیان دەکەن کە لە کۆمادان. لە فیلمەکەدا ڕاجات کاپوور، سوھاسینی مانیراتنام، ئارجون ماتوور، ڕاجیڤ ڕاڤیندراناتان و ڕاتنابالی بەتاچارجی ڕۆڵی پاڵپشت دەگێڕن. پەرەپێدانی فیلمەکە لە مانگی حوزەیرانی ٢٠١٤ دەستیپێکرد، کاتێک مێنۆن گرێبەستی لەگەڵ کۆچلین و شا بۆ پڕۆژەیەکی بێ ناونیشان واژووکرد. وێنەگرتنی سەرەکی لە تشرینی دووەمی ٢٠١٤ لە کەنار دەریای شاری کۆچی باشووری ھیندستان دەستی پێکردووە، نەھا پارتی وەک وێنەگری سینەمایی بۆ فیلمەکە کاری کردووە. گۆرانیبێژ و ئاوازدانەر مایکی ماککلێری کە دانیشتووی نیووزلەندایە، ئاوازی گۆرانییەکانی فیلمەکەی داناوە. نیتین بەید و ئەپورڤا ئەسرانی مۆنتاژیان بۆ فیلمەکە کردووە و ئاتیکا چۆھان دیالۆگەکەی نووسیوە. ھەروەھا یەکەم فیلمی ھیندی بوو کە دەرھێنەر و خانمەکتەری دیاری باشووری ھیندستان "سوھاسینی مانیراتنام" دەرکەوتنی تێدا ھەبوو. ھەروەھا کۆچلین یەکەم جار وەک ھۆنراوەنووسێک بۆ فیلمەکە دەرکەوت و گۆرانی "چاوەڕوانی تۆ"ی نووسی.
یەکەم نمایشی جیھانی لە فێستیڤاڵی نێونەتەوەییی فیلمی دوبەی لە ١١ی کانوونی دووەمی ٢٠١٥ ئەنجامدا و لەلایەن ڕەخنەگرانەوە پێداچوونەوەی ئەرێنی کرا. ھەروەھا لە ئاھەنگی کۆتایی فێستیڤاڵی فیلمی ئاسیای بەڕیتانیا نمایشکرا، کە مێنۆن خەڵاتی باشترین دەرھێنەری بەدەستھێنا. فیلمەکە لە ٢٧ی ئایاری ٢٠١٦ لە ھیندستان بە شێوەی شانۆیی نمایشکرا، لەگەڵ نمایشکردنی فیلمی چاوەڕێ لە ھیندستان لەلایەن ڕەخنەگرانەوە پێشوازییەکی باشی لێکرا، بە تایبەتی ستایشی ڕۆڵەکانی کۆچلین و شا، و دەرھێنانی مێنۆنیان کرد. فیلمەکە لەساتی نمایشکردنیدا لە بۆکس ئۆفیسدا کۆی گشتی ٣٥ ملیۆن کرۆر(٤٤٠ ھەزار دۆلار)ی کۆکردەوە.
خوێندنەوەی زیاتر...
ھەفتانە ١٠
ویکیپیدیا:وتاری ھەڵبژێردراوی ھەفتە/ھەفتانە/١٠
پەرەپێدانی جی تی ئەی ٥ تیمێکی نزیکەی ھەزار کەسی لە ماوەی چەند ساڵێکدا جی تی ئەی ٥ یان پەرەپێدا. کۆمپانیای ڕۆکستار گەیمز ئەم کایەی ئەکشن-سەرکێشییەی لە مانگی ئەیلوولی ٢٠١٣ بۆ پلەیستەیشن ٣ و ئێکس بۆکس ٣٦٠ و لە تشرینی دووەمی ٢٠١٤ بۆ پلەیستەیشن ٤ و ئێکس بۆکس وەن و لە نیسانی ٢٠١٥ بۆ مایکرۆسۆفت ویندۆز بڵاوکردەوە. وەشانی پلەیستەیشن ٥ و ئێکس بۆکس سیریز ئێکس و سیریز ئێس لە مانگی ئازاری ٢٠٢٢ بڵاوکرایەوە. تیمی پەرەپێدانی ٣٦٠ کەسی کە کاریان لەسەر جی تی ئەی ٤ کردووە، پەرەپێدانی وەشانی پێنجەمیان گرتە ئەستۆ. گرووپەکە ھاوکاری لەگەڵ چەندین ستۆدیۆی نێونەتەوەییی ڕۆکستاردا کردووە. گرووپەکە ئەم یارییەیان بە درێژەی ڕۆحی زۆرێک لە پڕۆژەکانی پێشوویان زانی، وەکو ڕێد دێد ڕیدێمپشن و ماکس پەین ٣. دوای ناساندنی یارییەکە بەشێوەیەکی سەرسووڕھێنەری لە ساڵی ٢٠١١، یارییەکە بە جەنجاڵی ڕۆژنامەوانی، ترەیلەری سینەمایی، ستراتیژییەکانی بازاڕکردنی ڤایرۆسی و چاپێکی سنووردار پەرەی پێدرا. وادەی بڵاوبوونەوەی ھەرچەندە ڕووبەڕووی دواکەوتنی زۆر بووەوە، بەڵام بە شێوەیەکی بەرفراوان پێشبینی دەکرا.
دروستکردنی جیھانی کراوە، کە مۆدێلەکەی لە لۆس ئانجلەس و ناوچەکانی تری باشووری کالیفۆرنیا وەرگرتووە، زۆربەی چالاکییەکانی گەشەپێدانی پێکھێناوە. ئەندامانی سەرەکی تیمەکە گەشتی مەیدانییان بە دەوروبەری باشووری کالیفۆرنیا ئەنجامدا بۆ کۆکردنەوەی توێژینەوە و وێنە، ھەروەھا گووگڵ ماپس بۆ لۆس ئانجلەس بەکارھێنرا بۆ یارمەتیدانی دیزاینکردنی تۆڕی ڕێگاوبانەکانی شارەکە. بۆ ئەوەی توانای دابینکردنی مەودای کێشان (Draw distance) لەسەر بزوێنەری یاری پێشکەوتووی ڕۆکستار (RAGE) زیاد بکەن، چاکسازییەکی گەورەیان ئەنجامدا بۆ یارییەکە. بۆ یەکەمجار لە زنجیرەکەدا یاریزانەکان لە دۆخی تاک یاریزاندا سێ کارەکتەری سەرەکی کۆنتڕۆڵ دەکەن. تیمی پەرەپێدان بۆیان دەرکەوت کە دیزاینی چەندین کارەکتەری سەرەکی پێویستی بە گۆڕانکارییەکی ڕیشەیی ھەیە لە چیرۆک و ئامێرەکانی یاریکردندا. میکانیکی تەقەکردن و لێخوڕینیان دیزاین کردەوە و خێرایی و مەودای گێڕانەوەکەیان چڕتر کردەوە.
ئەو ئەکتەرانەی کە بۆ وێناکردنی کارەکتەرە سەرەکییەکان ھەڵبژێردرابوون، کاتێکی زۆریان بە لێکۆڵینەوە لە کارەکتەری یارییەکە بەسەر برد. بۆ تۆمارکردنی جووڵەی دەموچاو و جەستەی کارەکتەرەکان، ھەروەھا مۆشن کەپچەر بەکارھێنرا. ئەم یارییە وەک یارییەکانی پێش خۆی ڕادیۆیەکی ناو یارییەکەی ھەیە کە ھەڵبژاردنی گۆرانی مۆڵەتپێدراو دەژەنێت. چەند ساڵێکی خایاند تا دەنگی یارییەکە بە ناوی «نمرەی ئەسڵی» لەلایەن تیمێکی ٥ بەرھەمھێنەری مۆسیقا دروست کرا. ئەوان بە ھاوکاری نزیک کاریان لەسەر بیرۆکەکانیان کردووە، نموونەیان وەرگرتووە و کاریگەرییان لەسەر دەنگە جیاوازەکان ھەبووە. لەساتی بڵاوکردنەوەی یارییەکە بە ڤێرژنی نوێ، یارییەکە لە ڕووی بینراو و تەکنیکییەوە بۆ نەوەی ھەشتەمی کۆنسۆڵەکان بەرزکرایەوە.
خوێندنەوەی زیاتر...
ھەفتانە ١١
ویکیپیدیا:وتاری ھەڵبژێردراوی ھەفتە/ھەفتانە/١١
.jpg)
کۆمپانیای تەکنەلۆژیی ئاشکراکەری بۆشاییگەری بە ناوی بازرگانیی بەربڵاوی سپەیس ئێکس (بە ئینگلیزی: SpaceX) کۆمپانیایەکی تایبەتی ئەمریکییە، کە کار دەکات لەسەر فڕینی بۆشایی و بەرھەمھێنەری بۆشایی. کۆمپانیایەکە لەلایەن ئیلۆن مەسکەوە لە ٦ی ئایاری ٢٠٠٢دا دامەزراوە بە ئامانجی کەمکردنی خەرجییە بۆشایییەکان و پڕۆژەکردنی تایبەتی لەسەر ھەسارەی مەریخ. کۆمپانیای سپەیس ئێکس چەندین مانگی دەستکردی ناردووەتە بۆشاییی ئاسمان بە ئامانجی گرێبەستنی تایبەتی ئینتەرنێت لە بۆشاییی ئاسمان بە ناوی پڕۆژەی ستارلینک. کۆمپانیایەکە پەرەی بە چەندین مەکۆی بۆشایی داوە، لەوانەش مەکۆی تایبەت و ناوازەییی سپەیس ئێکس دراگۆن، ھەروەھا چەندین کەشتیوانی گواستووەتەوە بۆ وێستگەی بۆشاییی نێونەتەوەیی بە ھەڵگری تایبەتی سپەیس ئێکس دراگۆن ٢. سپەیس ئێکس یەکەمین کۆمپانیایە کە بتوانێت مەکۆی بۆشایی بگەیەنێتە شوێنی مەبەست و بتوانێت بیگەڕێنێتەوە شوێنی خۆشی، یەکەمین کۆمپانیاش بوو توانی چەند کەشتیوانێک بگەیەنێتە وێستگەی بۆشاییی نێونەتەوەیی، ھەروەھا یەکەمین بوو لە فڕاندنی مووشەکی خولگەیی بە شێوەیەکی ستوونی و دابەزندنی بەشێوەیەکی ستوونی، ھەروەھا کۆمپانیایەکە توانی ٢٠ گەشتی تایبەت ڕەوانەی وێستگەی بۆشاییی نێونەتەوەیی بکات بە ھاوکاری و ھەماھەنگی لەگەڵ دەزگای بۆشاییی ئەمریکیی ناسا، ھەتا کانوونی دووەمی ٢٠٢٣، بەھای کۆمپانیای سپەیس ئێکس نزیکەی ١٨٠ ملیارد دۆلاری ئەمریکی بەراورد کراوە.
خوێندنەوەی زیاتر...
ھەفتانە ١٢
ویکیپیدیا:وتاری ھەڵبژێردراوی ھەفتە/ھەفتانە/١٢
_PAL_cover.jpg)
دێترۆو (بە ئینگلیزی: Deathrow) کایەیەکی ڤیدیۆییی وەرزشییە کە لە ساڵی ٢٠٠٢ لەلایەن کۆمپانیای ساوتێند ئینتەرەکتیڤەوە پەرەی پێدراوە و بەتایبەتی بۆ ئێکس بۆکس لەلایەن یوبی سۆفت بڵاوکراوەتەوە. پەرەپێدانی دێترۆو لە مانگی ئایاری ساڵی ١٩٩٩ وەک یارییەکی کۆمپیوتەرییی سەرھێڵ دەستیپێکرد. لە سەرەتای ساڵی ٢٠٠١ کۆمپانیای ساوتێند گۆڕا بۆ بڵاوکراوەکانی کارپێکەری ئێکس بۆکس، ئەمەش ڕێگەی بە تیمەکە دا کە «سێبەری پێکسڵ» و «نەخشەی بەرکەوتن» و «ڕووناکی ئاوێنەیی» بەکاربھێنێت. کایەی دێترۆو لەسەر بزوێنەری کایەی سێ ڕەھەندی نێوخۆیی دروست کرابوو و یەکەم بەرھەمی گەورەی ساوتێند بوو.
یارییەکە لەسەر بنەمای وەرزشی توندی خەیاڵی بلیتز دامەزراوە، کە تێکەڵەیەکی داھاتووی ھەموو بەرکەوتنەکانە لە ھۆکی و باسکە و بە پەپکەی فڕندە یاری دەکرێت. دوو تیپی چوار یاریزان ھەوڵدەدەن پەپکەکە بە گۆڵی بەرامبەردا تێپەڕێنن، تیپەکان دەتوانن خاڵ بەدەستبھێنن یان تیپی بەرامبەرەکەیان دەربکەن. ١٥٠ کارەکتەری تاکەکەسی لە ١٨ تیپدا ھەن. ھەڵمەتی تاک یاریزان لە سەدەی بیست و سێیەمدا دادەنرێت، کاتێک بلیتز وەرزشێکی بەناوبانگ و تەلەڤیزیۆنییە و تیپەکان شەڕ دەکەن بۆ سەرکەوتن لەم یارییەدا و بردنەوەی پاڵەوانێتییەکە. یاریزانان پارە لە گۆڵەکانیان و لێدانی لە بەرامبەرەکانیان و چەپڵە لێدانی ھەواداران بەدەستدەھێنن بۆ ئەوەی خەرجی بکەن بۆ بەرزکردنەوەی ئاستی یاریزانەکان و گرەوکردن و کردنەوەی کەسایەتی نوێ. ھەروەھا یارییەکە پشتگیری لە شاشەی دابەشکراو و فرە یاریزانی «سیستەم لینک» دەکات بۆ تا ھەشت یاریزان لە سەرانسەری تا ھەشت ئێکس بۆکس.
دێترۆو تاڕادەیەکی زۆر پێداچوونەوەی لەباری لێکرا. پێداچوونەوەکاران ستایشی کردارە خێراکانی یارییەکە و دەنگی دەوروبەریان کرد، ھەروەھا گلەیییان لە یاریکردنە سەختییەکەی و ژاوەژاوی گشتی و نەبوونی فرە یاریزانی سەرھێڵیان کرد. ھەندێک لە ڕەخنەگران ھەستیان بەوە دەکرد کە بەکارھێنانی قسەی ناشرین لە یارییەکەدا زیادەڕۆیییە، ھەندێکی دیکەش پێیانوابوو کە یارییەکە سەرنجڕاکێشە. پێداچوونەوەکاران چەمک و میکانیکی یارییەکە بە ھاوشێوەی زنجیرەکانی تر دەزانن، بەتایبەتی سپیدبۆڵ. ھەردوو کۆمپانیای ئای جی ئێن و تیم ئێکس بۆکس ناوی دێترۆویان ناوە وەک ھەڵبژاردەی سەرنوسەران. یارییەکە خەڵاتی باشترین یاری پێشکەوتنی ساڵی تیم ئێکس بۆکس ٢٠٠٢ و خەڵاتی باشترین یاری ئای جی ئێن ٢٠٠٢ی بەدەستھێنا.
خوێندنەوەی زیاتر...
ھەفتانە ١٣
ویکیپیدیا:وتاری ھەڵبژێردراوی ھەفتە/ھەفتانە/١٣
جومانجی: ئاستی دواتر (بە ئینگلیزی: Jumanji: The Next Level) فیلمێکی سەرکێشیی خەیاڵیی ئەمریکیی ساڵی ٢٠١٩یە، لە دەرھێنانی جەیک کاسدان، کە لەگەڵ جێف پینکنەر و سکۆت ڕۆزنبێرگ سیناریۆکەیان نووسیووە. ئەم فیلمە قۆناغی چوارەمی زنجیرەفیلمی جومانجییە و درێژەی فیلمی جومانجی: بەخێربێیت بۆ دارستانە. دوەین جانسن، جاک بلاک، کێڤن ھارت، کارین گیلان، نیک جۆناس، ئەلێکس وۆڵف، مۆرگان تەرنەر، سێرداریوس بلەین و مادیسۆن ئیسمان ڕۆڵەکانیان لە فیلمی پێشوودا دووبارە دەکەنەوە لەکاتێکدا ئاکوافینا و دانی گلۆڤەر و دانی دێڤیتۆ ئەکتەری نوێن و پەیوەندی بە کاستەکەوە دەکەن. چیرۆکی فیلمەکە دوای دوو ساڵ لە فیلمی بەخێرھاتن بۆ دارستان ڕوودەدات، کە ھەمان گرووپی ھەرزەکار لەگەڵ ھاوڕێیەکی دێرین و دوو کەسی دیکەدا، بە ھەڵە جارێکی دیکە تووشی جومانجی دەبنەوە. لەوێ ھەموویان خۆیان لەگەڵ کەسایەتیی (ئەڤەتار)ی کۆن و نوێدا ڕووبەڕووی کێشە و دژایەتی دەبنەوە، لەکاتێکدا دەبێت ھەڵبێن بۆ ئەوەی خاکەکە لە خراپەکارێکی نوێ ڕزگار بکەن.
وێنەگرییی سەرەکی لە نێوان ٢١ی ١ تا ١١ی ئایاری ٢٠١٩ لە شوێنەکانی وەک ئەتلەنتا، نیو مەکسیکۆ، ئەلبێرتای ئەمریکا و ھاوایی ئەنجامدراوە. فیلمی جومانجی: ئاستی دواتر لە ئەمریکا لە ١٣ی کانوونی دووەمی ٢٠١٩ لەلایەن گرووپی سینەمایی سۆنی پیکچەرز بڵاوکرایەوە. فیلمەکە بەگشتی لەلایەن ڕەخنەگرانەوە پێداچوونەوەی ئەرێنی وەرگرت و لە سەرانسەری جیھاندا ٨٠١٫٧ ملیۆن دۆلاری بەدەستھێنا لە بەرامبەر بوودجەی ١٢٥–١٣٢ ملیۆن دۆلار، ئەمەش بووە دەیەمین فیلمی زۆرترین داھاتی ساڵی ٢٠١٩. بەدواداچوونێکی تری لەژێر پەرەپێداندایە.
خوێندنەوەی زیاتر...
ھەفتانە ١٤
ویکیپیدیا:وتاری ھەڵبژێردراوی ھەفتە/ھەفتانە/١٤
.jpg)
دابەشکردنی خۆراک (بە ئینگلیزی: Food Distribution) ئەو پرۆسەیەیە کە دانیشتووانێکی گشتی خۆراکیان بۆ دابین دەکرێت. ڕێکخراوی خۆراک و کشتوکاڵ (FAO) دابەشکردنی خۆراک وەک ژێرکۆمەڵەیەکی سیستەمی خۆراک دەزانێت. پرۆسە و میتۆدۆلۆژیای پشت دابەشکردنی خۆراک بەپێی شوێنەکان دەگۆڕێت. دابەشکردنی خۆراک تایبەتمەندییەکی دیاریکەری ڕەفتاری مرۆڤ بووە لە ھەموو کۆمەڵگاکاندا و تۆمارەکانی دابەشکردنی خۆراک مێژووەکەی دەگەڕێتەوە بۆ ھەزاران ساڵ پێش ئێستا. زۆربەی حکوومەت و کۆمەڵگاکان بە شێوەیەکی بەرز لە قاڵب دراون بەھۆی ئەو سیستەمەی کە بۆ پشتگیریکردن لە دابەشکردنی خۆراک دروستکراون.
کۆمەڵێک ھۆکاری مەترسیدار ھەن کە دەتوانن کاریگەرییان لەسەر دابەشکردنی خۆراک ھەبێت. شەڕ، شکستی ئابووری، کێشە سیاسییەکان، و بارودۆخی کەشوھەوا ھەموویان ڕۆڵ دەگێڕن لە دیاریکردنی کارایی ھەر سیستەمێکی خۆراک. دوو نموونەی ئەم دوایییەی شەڕ و شکستی ئابووری کە کاریگەری لەسەر دابەشکردنی خۆراک ھەبووە بریتین لە دابەزینی دابەشکردنی خۆراک لە ژاپۆن لە کاتی جەنگی جیھانی دووەم و پاشەکشەی خۆراک لە ئەفریقای ژێر سەحرا لە کۆتایییەکانی حەفتاکان و سەرەتای ھەشتاکانی سەدەی ڕابردوودا. لە ھەردوو حاڵەتەکەدا دابەشکردنی خۆراک ڕێگری لێکرا و لە ئەنجامدا دانیشتوانی ئەم ناوچانە زیانیان بەرکەوت.
ئەمڕۆ ڕێکخراوی تایبەت ھەن بۆ ڕێگریکردن لە ھەر داڕمانی کۆی گشتی لە دابەشکردنی خۆراکدا، ھاوکاریکردن لە پەرەپێدانی دابەشکردنی خۆراک و سیستەمی خۆراک لە ناوچە دواکەوتووەکاندا، و وەڵامدانەوەی قەیرانەکانی دابەشکردنی خۆراک. لەسەر ئاستی نێودەوڵەتی، ڕێکخراوی خۆراک و کشتوکاڵ (FAO) ڕۆڵێکی سەرەکی دەگێڕێت لە ئاسانکاری بۆ گەشەکردنی سیستەمی دابەشکردنی خۆراک لە سەرانسەری جیھاندا. لەسەر ئاستی نیشتمانی وڵاتانی جیاواز سیستەمی پشتیوانی ئاڵۆزتریان پەرەپێداوە؛ بۆ نموونە، تێکەڵەیەک لە ڕێکخراوە فیدراڵی، قازانج نەویستەکان و خۆبەخشەکان لە ئەمریکا کاردەکەن بۆ پاراستنی خۆشگوزەرانی سیستەمی دابەشکردنی خۆراک لە ئەمریکا. لەناو ئەمریکادا پرسێکی نائاسایشی خۆراک ھەیە کە دابەشکردنی خۆراک یەکێکە لە چارەسەرە سەرەکییەکان بۆ بەئامانجگرتنی نائاسایشی خۆراک. ئەمەش «پیشەسازی بانکی خۆراک» دروست دەکات کە زۆرێک لە ڕێکخراوەکان تاکتیکی کارامەیی بازرگانی و توجارەت لەناو کەرتی دابەشکردنی خۆراکدا بەکاردەھێنن بۆ پێدانی خۆراک بەو کۆمەڵگایانەی کە پێویستیان پێیەتی.
خوێندنەوەی زیاتر...