فەرموودەی موعەلەق
فەرموودەی موعەلەق بریتییە لەو فەرموودەیەی کە لە سەرەتای ڕشتەکەیەوە کەسێک یان زیاتر لابرا بێت.[١]
شێوەکەی ئەوەیە ئەو کەسەی فەرموودەکە دەگێڕێتەوە ڕاستەوخۆ بڵێت پێغەمبەر یان فڵان ھاوەڵ وایگوت. بۆ نموونە ئیمامی بوخاری دەڵێت (وقال أبوو موسی: غطی النبی صلی اللە علییە وسلم ڕکبتییە حین دخل عثمان).[٢] واتا ئەبوو موسای ئەشعەری دەڵێت "پێغەمبەر صلی اللە علییە وسلم ئەژنۆکانی داپۆشی کاتێک ئیمامی عوسمان ھاتە ژوورەوە " لەم فەرموودەیەدا ئیمامی بوخاری ڕشتەی فەرموودەکەی ھەموو لابردووە تەنیا ھاوەڵەکە نەبێت کە ئەبو موسای ئەشعەرییە.
حوکمی فەرموودەی موعەلەق
[دەستکاری]فەرموودەی موعەلەق فەرموودەیەکی زەعیفە و ڕەت دەکرێتەوە، بەھۆی لەدەستدانی یەکێک لە مەرجەکانی فەرموودەی سەحیح؛ بەڵام ئەو فەرمودە موعەلەقانەی لە ھەردووک سەحیحی بوخاری و موسلیم دا ھاتوون حوکمی تایبەتیان ھەیە بەم شێوەیە:
- ئەگەر بە دەستەواژەی دڵنیاکەرەوە باس کرا وەک: (گوتی) و (باسی کرد) و (گێڕایەوە) بە عەرەبی (قال) و (ذکر) و (حَکی) ئەوا فەرموودەکە سەحیحە و دەبێت کاری پێبکرێت.
- ئەگەر بە دەستەواژەی لاوازکەر باس کرا وەک: (گوترا) (باسکرا) (گێڕدرایەوە) بە عەرەبی (قیل) و (حُکی) و (ذُکِر) ئەوا دەکرێت فەرموودەکە فەرموودەی سەحیح یان فەرموودەی حەسەن یان فەرموودەی زەعیف بێت.
