دەرکردنی ئێران لە کۆمیسیۆنی نەتەوە یەکگرتووەکان بۆ دۆخی ژنان

١٤ی کانوونی یەکەمی ٢٠٢٢ ئێران لە کۆمیسیۆنی دۆخی ژنان سەر بە نەتەوە یەکگرتووەکان بەھۆی پێشلکارییەکانی دژی خۆپیشاندانەکانی ٢٠٢٢ی ئێران و پاش ڕاپۆرتەکانی توندوتیژی جەستەیی، سێکسی و زارەکی لەلایەن کۆماری ئیسلامییەوە لە دژی ژنان. ئەنجومەنی ئابووری و کۆمەڵایەتیی نەتەوە یەکگرتووەکان بە زۆرینەی دەنگ لە ١٥ی کانوونی ٢٠٢٢، ئێرانی لە کۆمیسیۆنی نەتەوە یەکگرتووەکان بۆ دۆخی ژنان دەرکرد. بڕیارنامەی پێشنیارکراو بۆ ئەمە لە لایەن ئەمریکاوە پێشکەش کرا و ٢٩ ئەندامی ئەم ئەنجومەنە پشتگیریان لە بڕیارنامە پێشنیار کراوەکە کرد.

ئەم کارە بۆ یەکەمجار لە مێژووی ئەم کۆمیسیۆنە ڕوویدا، وەک کاردانەوەی نەتەوە یەکگرتووەکان سەبارەت بە کوژرانی ژینا ئەمینی و سەرکوتکردنی ناڕەزایەتیی ژنانی ئێران کە بەھۆی کوژرانی ژینا ئەمینییەوە سەری ھەڵدابوو. ھاووڵاتیان و چالاکانی سیاسیی نەیاری کۆماری ئیسلامی پێشوازییان لە دەرکردنی ئێران لە کۆمیسیۆنی نەتەوە یەکگرتووەکان بۆ ژنان کرد و لە بەرامبەردا وتەبێژی وەزارەتی دەرەوەی کۆماری ئیسلامیی ئێران ئەم کارەی بە «نایاسایی» ناوبرد.

کۆبوونەوە

ئەم کۆبوونەوەیە ڕۆژی چوارشەممە، ڕێکەوتی ١٤ی کانوونی دووەمی ٢٠٢٢ لە ئەنجومەنی ئابووری و کۆمەڵایەتیی نەتەوە یەکگرتووەکان و بە سەرۆکایەتیی لاشزارا ئۆسۆڤا بەڕێوەچوو. لە دەنگدانەکەدا ٢٩ وڵات لە کۆی ٥٢ ئەندام کە لەم کۆبوونەوەیەدا ئامادەبوون، دەنگی بەڵێیان دا، ٨ وڵاتیش دەنگی نەخێریان دا و ١٦ وڵاتیش دەنگیان نەدا.

ئەرژەنتین، نەمسا، بەلجیکا، بێنین، بولگاریا، کەنەدا، چیلی، کۆلۆمبیا، کرواتیا، کۆماری چیک، دانمارک، فینلاند، فەڕەنسا، یۆنان، گواتیمالا، ئیسرائیل، ئیتالیا، ژاپۆن، لاتڤیا، لیبیا، لیبێریا، مۆنتینیگرۆ، نیوزیلاند، پەنەما، پێروو، پورتوگال، کۆریای باشوور، شانشینی یەکگرتوو و ویلایەتە یەکگرتووەکانی ئەمریکا ٢٩ وڵات بوون کە دەنگیان بە ڕەشنووسی بڕیارنامەکە دا.

بۆلیڤیا، چین، کازاخستان، نیکاراگوا، نێجیریا، عومان، ڕووسیا و زیمبابوی دەنگی نەخێریان دا و بەنگلادێش، بۆتسوانا، کۆماری کۆنگۆ، کۆتدیڤوار، ئێسواتینی، گابۆن، ھیندستان، ئیندۆنیزیا، ماداگاسکار، مۆریس، مەکسیک، دوورگەکانی سولەیمان، تایلەند، توونس و تانزانیا شازدە وڵات بوون کە بەشداریان نەکرد.