| بوو بە هەزار و چوارسەد ساڵ لەگەڵ عارەب بووینە یەک ماڵ | | خێوی قیبلە و کیتابێکین، وەک دەڵێن بەرە بابێکین |
| بەڵام ئەو برای ئیسلامەم، ئەو کاکە نێرە زەلامەم | | هەرچی هەمبوو بردی بۆ خۆ، منی کوشت بە هەرزن و جۆ |
| بە فەرموودەی ئەو لە ژینا هاوبەشین لە شایی و شینا | | شین بۆ من و شایی بۆ ئەو، من ئەبێ لەڕ بم ئەو قەڵەو |
| ئەگەر داوای نان و ئاو کەم ئارەزووی بەرگ و پێڵاو کەم | | بڵێم برای هاودینەکەم هاوڕێکەی لە مێژینەکەم |
| بە ناشکوری ناڵێم براین ناچاریان کردم تێک خراین | | لە ڕێگەی خوا و قورعانەکەت، خێری دین و ئیمانەکەت |
| سەد یەکێ لە داهاتەکەم چۆڕێک شیری وڵساتەکەم | | هەزار یەکێ لە نەوتی خۆم، پێم کەرەم بکە بێ نان و دۆم |
| با بەس کوێر بم بێ ڕووناکی، با پێت بڵێم کاکی چاکی | | ئەڵێ: هەی لە دین وەرگەڕاو، کورد و بەرگ و نان و پێڵاو! |
وە دیارە بوویتە «شعووبی».. ئەبێ لە ڕێگە دەرچووبی.. |
| هەر لە شێخی ئەزهەرەوە، کێ مێزەری بە سەرەوە | | مڕ دەکرێن لە گۆشت و پڵاو، پڕ دەکرێن لە پارە و دراو |
| وەها تیژ دەبن سەردەکەن فتوای کافریم دەردەکەن | | پاش فتوا لەم کوردستانە، فڕۆکە و بۆمبابارانە |
| تۆپ و دەبابە و شێست تیرە، خوێن ڕشتنی لاو و پیرە | | کوشتنی ژن و منداڵە، بژیومان هەر خوێنی ئاڵە |
| مزگەوتەکەم دەڕووخێنن، قورئانەکەم دەسووتێنن | | سەرلەنوێ تاڵانم دەکەن، هەرزن و جۆیەکەش دەبەن |
| ناچارم ئەکەن بێمە دەنگ، پەلامار بەرم بۆ تفەنگ | | کە ئەشچم تۆڵە بستێنم، وەک پڵنگی چەنگ بەخوێنم |
| دوژمن خۆ ناگرێ لە بەرم، خوێنیان ڕادەماڵێ، تەرم | | ئەبێتە قیڕقیڕی یابا، یابا کە زانی دەرنابا |
| ئەمجارەش وەک چەند هەزار جار، قەوانە شڕ ئەخاتە کار | | دیسان مەلا و ئایەت دێنن، لەسەر ئیزگە بۆم دەخوێنن |
| «عەرەب و کورد برای دینن، هەردووک دوعای یەک ئامینن» | | «کەی ڕەوایە ئیسلام کوشتن، حەرام کراوە خوێن ڕشتن»! |
| منیش بەستەزمان و فەقیر، دیسان لە تەپکە ئەکەم گیر | | بە دوو درۆ دەم خافڵێنن، هەتا دەرفەت وەدەس دێنن |
دیسان ئەو زوڕنا و ئەو پیکە، دیسان هەمان فاک و فیکە! |
| ئاخر ناڵێم جارێک و دوان.. تاکەی ببمە مەڕی بێ شوان؟ | | تاکەی بەدرۆ دەسخەڕۆ بم؟ هەتاکەی هەر ڕەنجەڕۆ بم؟ |
| بۆ چ من بکوژرێم ڕەوایە! تاکەی سەما بەو هەوایە! | | بۆ چ نەبمە خێوی نانی خۆم! بۆ نەخوێنم بە زمانی خۆم! |
| بۆ نەوتی خۆم دەس خۆم نەخەم! بۆ خۆم ڕزگار نەکەم لە خەم! | | بۆ چ ماڵی خۆم دیاری نەبێ! بۆ بەشم یەکجاری نەبێ! |
| من چم هەیە با لە لام بێ، عەرەب بڕوا و هەر ئیسلام بێ | | لە خاکم دەرچێ و لە ڕێدا، قەوانە شڕەی خۆی لێدا |
| ئەو ڕۆژەی چارەی نابینم خاوەنی ژیان و دینم | | تا کەنگێ برسی و لەژێر بم! با تاوێک ئیسلامی تێر بم |
| — ھەژار موکریانی |
