حەمەحسەین کەریمی

لە ئینسایکڵۆپیدیای ئازادی ویکیپیدیاوە
(ڕەوانەکراوە لە موحەممەدحسێن کەریمیەوە)
باز بدە بۆ: ڕێدۆزی، گەڕان



کاک حەمە حسەین کەریمی (لەدایکبوون ١٩٤٩ - کۆچی دوایی ١٩٧٩) تێکۆشەر و خەباتکەری سیاسی و یەکێک لە دامەزرێنەرانی کۆمەڵە بوو. ڕۆژی ١٤ی شوبات (٢٦ی ڕێبەندان) لە کێشەی گرتنی شارەبانی شاری سەقز گیانی بەختکرد. بە گیانبەختکردنی ئەو، ڕێکخرای کۆمەڵە کە تا ئەوکات نھێنی بوو، ئاشکرا کرا و لەو کاتەوە ڕۆژەکە بە ناوی ڕۆژی کۆمەڵە دەناسرێت.

ژیان[دەستکاری]

لە بنەماڵەیەکی بێبەش لە بواری ئابووری، لە شاری سەقز لە ڕۆژھەڵاتی کوردستان ھاتە دونیا. خوێندنی سەرەتایی و ناوەندی ھەر لەو شارەدا بردەسەر و بۆ خوێندنی ئەندازیاریی کشتووکاڵ ڕەوانەی زانکۆی کەرەج دەبێت. ماوەی خوێندنی لە زانکۆ دەرفەتی پێئەدات بۆ دیتن و بیرکردنەوە لە گەلە ژێردەستەکەی و چینی زەحمەتکێش و کرێکار؛ درووستکردنی ژیانی باشتر بۆ ئەوان دەبێتە ئامانجی. ھەر لەوێ چەن کەسی کوردی ھاو بیر و ڕای خۆی دەناسێت وەک فواد موستەفاسوڵتانی و عەبدوڵا موھتەدی و باس و لێدوانی ناویان دەبێتە ڕێخستن و ساماندانی بزووتنەوەی کرێکاری و دامەزراندنی ئایدیا سوسیالیستییەکان.

پاش تەواوبوونی زانکۆ لە ساڵانی ١٩٧٠-١٩٧١ کارێک لە شاری مەراغەی ئێران ئەگرێتە دەست و سەرقاڵی ئەوە دەبێت بەڵام ئامانجەکانی لەیاد ناکات. ھەر بۆیە بە چەندین جار ھاتووچۆی بۆ شاری مەھاباد و دیتن و ناسینی چەن کەسایەتی وەک ئیبراھیم عەلیزادە و خانەی موعینی لەگەڵ ھاوڕێیانی پێشو ھەوڵی ڕێخستنی ڕێکخراوێکی نھێنی بە ناوی کۆمەڵە ئەدەن بۆ دەستپێگەیشتنی ئامانجەکانیان . لە ساڵانی ١٩٧٧ - ١٩٧٩ واتە بۆ ماوەی ٢ساڵ لە گوندێک لە ناوچەی موکریان، نێوانی شارەکانی مەھاباد و سەردەشت، بە ناوی میراوێ خەریکی کرێکاری دەبێت. لەو سەردەمەدا تێکۆشانی نھێنی دەکرد و خەڵکی بە نازناوی وەستا ساڵح (وەسا ساڵە) دەیانناسی و کەسێک کەسایەتی ڕاستقینەی ئەوی نەدەزانی.

لە ١٣ی ڕێبەندانی ١٣٥٧ (١٩٧٩) ھەواڵی کوژرانی برایەکی (حەمە ڕەئووف کەریمی) لە شاری تاران، پێیدەگات و بۆ ڕێوڕەسمی سەرەخۆشی و دیتنی دایک و باوکی خەمباری سەردانی ماڵی خۆیان لە سەقز دەکات. لەو کاتانەدا دەسەڵاتی ناوەندی ڕژیمی پاشایەتی ئێران بە تەواوی لاواز ببو و لە ماوەی چەن ڕۆژی داھاتوودا شۆڕشی گەلانی ئێران بەرەو سەرکەوتن دەڕۆشت. ڕێبەندانی ١٣٥٧ شاری سەقزیش ھەر تووشی ھەمان بارودۆخ بوو؛ لە ڕۆژی ٢٤ی مانگدا پێگەی ژاندارمری کە تەنھا شوێنی دەسەڵاتی ناوەندی لە شاردا بوو خەریک بوو دەکەوتە دەستی خەڵک. ھەواڵی ھەوڵی ئاگرتێبەردانی ئەو شوێنە دەبێتە ھۆی ڕۆشتنی کاک حەمە حسەین بۆ بەرگری لەوە. کاتێ لەگەڵ جەماوەر ھەوڵی چوونەناوە دەدەن لە حەوشەی ژاندارمریدا، بەر تەقەی چەن فیشەک دەکەوێت. حەمە حسەین دگەیێننە نەخۆشخانە.

دوای تێپەڕبوونی دوو شەو، لە ڕێکەوتی ٢٦ی ڕیبەندانی ١٣٥٧ (١٤ی شوبات ١٩٧٩) لە نەخۆشخانەدا بەھۆی برینی فیشەک کۆچی دوایی دەکات و لە قەبرانی شاری سەقز دەنێژرێت و ئێستاش گۆڕەکەی ھەر لەوێیە. کۆمەڵە کە تا ئەو کات ڕێخراوێکی نھێنی بوو، خۆی ئاشکرا کرد و لە دوای ئەوە ٢٦ی ڕێبەندان بە ڕۆژی کۆمەڵە ناونرا.