سولەیمان موعینی

لە ئینسایکڵۆپیدیای ئازادی ویکیپیدیاوە
Jump to navigation Jump to search

سلێمان موعینی (١٨ی کانوونی دووەمی ١٩٣٣ لە مەھاباد- ١٥ی گوڵانی ١٩٦٨) کەسایەتییەکی سیاسیی کورد بوو.

لە سەرەتای منداڵییەوە و بە ھۆی گیرانی باوکی و دوورخستنەوەی، ئاوێتەی سیاسەت بوو. لە شاری مەھاباد، تەورێز و تاران خوێندنی خۆی بەردەوام کرد و لە ھەڕەتی گەنجیدا بووە کەسایەتی ناسراوی سیاسی شاری مەھاباد و یەک لە ئەندامی گەنجانی حیزبی دیموکراتی کوردستان بوو. لە سەردەمی موسەدیقیشدا لە سەرجەم چالاکی و جوڵانەوەکانی دژ بە حکوومەتی پاشایەتی پەھلەوی بەشداری بەرچاوی دەکرد. دوای کودەتای ٢٨ ی مورداد و گەڕانەوەی شا، سەرکوتی تووندی لایەنگرانی موسەدق و سەرجەم ئازادیخوازان، بە تایبەت لە کوردستان دەستی پێکرد. ئەو چالاکە کوردە لە ھەوڵی سەرلەنوێ دارشتنەوەی حیزبی دیموکراتدا دەبێت و دوابەدوای ھێرش و گووشارەکانی ڕژێمی پاشایەتی لە ڕۆژھەڵاتی کوردستان ھەژمارێکی بەرچاو لە گەنجانیش بەشداری ڕیزەکانیان دەبن، کە ئەو بابەتە دەبێتە ھۆکاری ترس و دڵەڕاوکێی ڕژێم و ساواک (ئیتڵاعاتی سەردەمی شا).

بەڵام سات و سەودا و بەڵێنەکانی ڕژێمی ئەو کاتی ئێران نەیتوانی ئەو شۆڕشگێڕە لە سەر ڕێبازی خۆی لا بدات. شەھید سلێمان موعینی مەیدانی چالاکی و خەباتی خۆی لە ڕێزی کوردانی باشوری کوردستان دا و لە گەڵ مەلا مستەفای بارزانی بەردەوام دەکا. دوابەدوای پەرەسەندنی شەڕ لە نێوان کوردانی باشووری کوردستان و ڕژێمی عێراق و پشتگری کردنی شای ئێران لە کوردانی باشووری کوردستان و ھاوکات زۆر بوونی پێداویستی ھێزەکانی بارزانی بە کەرەستەی شەڕ لە لایەن ئێرانەوە، گوشارەکان بۆ سەر شۆڕشگێڕانی ڕۆژھەڵاتی کوردستان زۆرتر بوون. لەو کاتەدا، ڕژێمی ئێران، بە کەڵک وەرگرتن لەو ھەلومەرجە، ئەرتەشبۆد ئوەیسی یەک لە جینایتکارترین ژێنەراڵەکانی خۆی بە مەبەستی سەرکوتکردنی شۆڕشی کوردانی ڕۆژھەڵاتی کوردستان ڕەوانەی ڕۆژھەڵات کرد.

ئەو ژێنەراڵە ئێران ییە شۆڕشگێڕانی کوردی بە ھاوکاری سیخۆڕە خۆجێیەکان و ھێزە ھەواڵگرییەکان و ھاوکات چەندین کەس لە ناو ھێزەکانی بارزانیدا، لەناوبرد. کە شەھید سولەیمانیش یەک لەوان بوو.

شەھید سولەیمان موعینی دوای دەسبەسەرکرانی لە لایەن ھێزەکانی بارزانییەوە لە کاتێکدا کە ئامادە نابێت خۆی ڕادەستی ھێزەکانی ئێران بکاتەوە و داوای لیبووردن بکات، لە ڕۆژی ١٥ی مانگی گوڵانی ١٩٦٨ دا گولەباران و دواتر ڕادەستی ھێزەکانی ڕژێمی ئێران دەکرێتەوە.

تەرمی ئەو ڕۆڵە قارەمانەی گەلی کورد، دوای چەند ڕۆژ کە لە شارەکانی ڕۆژھەڵاتی کوردستان دا گەڕێندرا، لە گۆڕستانی شاری مەھاباد بە خاک سپێررا. مەسعوود بارزانی لە کتێبی «بارزانی و جوڵانەوەی ئازادیخوازانەی کورد» نووسیویەتی: ھەرچەندە سولەیمان موعینی بە پێچەوانەی بەرژەوەندییەکانی جوڵانەوی کورد ھەڵسووکەوتی کرد بەڵام کوشتنی ئەو یەکێک لە ڕووداوە ناخۆشەکانی ساڵی ٦٨ بوو.

وێنەیەکی شەھید سولەیمان موعینی https://rojpress.files.wordpress.com/2012/05/silemanmoeini.jpg?w=450

سەرچاوە:

[١]

  1. ^ http://rojpress.wordpress.com/2012/05/15/sileman-moini/#more-7765