ئەحمەد ڕازی

لە ئینسایکڵۆپیدیای ئازادی ویکیپیدیاوە
Jump to navigation Jump to search

ئەحمەد ڕازی ھمەیش (لەدایکبووی ٢١ی ئازاری ١٩٦٤–مردووی ٢١ی حوزەیرانی ٢٠٢٠) یاریزانێکی تۆپی پێی عێراقی بوو. و یەکێک لە بەناوبانگترین یاریزانەکانی سەردەمی زێڕینی تۆپی پێی عێراق بوو. سەرەتا لەگەڵ یانەی زەورا دەستی بەیاریکردن کردووە و وەکو ھێرشبەر ناوبانگی دەرکرووە و دواتر لە ساڵی ١٩٨٣ لە جامی فەڵەستین بۆ گەنجان سەرەتای ناو پەیداکردنی بووە لە وڵاتە عەرەبییەکان. ئەحمەد ڕازی لەگەڵ ھەڵبژاردەی تۆپی پێی عێراق یاری کردووە و بەھۆی گۆڵە جوانەکانییەوە عێراقی گەیاندووە بە قۆناغی کۆتایی جامی جیھانی، ھەروەھا ڕۆڵێکی بەرچاوی ھەبووە لە بردنەوەی عێراق لەجامی کەنداو بەتایبەتی لە ساڵی ١٩٨٨ کە نازناوی گۆڵکەری جامەکەی بەدەستھێناوە و ھەر لەھەمان ساڵیش نازناوی باشترین یاریزانی لەئاسیا بەدەستھێناوە و ڕۆڵێکی بەرچاوی گێڕاوە لە نەوەدەکاندا و دوا یاریشی لەگەڵ ھەڵبژاردەی عێراق بەرامبەر بە پاکستان بووە لە ساڵی ١٩٩٧.

ئەحمەد ڕازی لە ساڵی ١٩٩٣ بۆ ساڵی ١٩٩٦ بۆ یانەی قەتەری یاری کردووە و ڕۆڵێکی گرنگی بینیوە لەو یانەیەدا و لەماوەی ژیانی یاریکردنیدا ١٢٥ یاری لەسەر ئاستی عێراق کردووە و زیاتر لە ١٠٠ گۆڵی تۆمارکردووە و لە ساڵی ١٩٨٨ وازی لەیاریکردن ھێناوە و بۆتە ڕاھێنەری یانەکانی عێراق.

ئەحمەد ڕازی یەکەم یاریزان بووە لەمێژووی عێراقدا لەجامی جیھانی گۆڵ تۆماربکات دژ بە بەلجیکا و دووەم گۆڵکەری تیپی عێراق کە ٦٥ گۆڵی بۆ تیپەکەی تۆمارکردووە و بەیەکەم گۆڵکەریش دەژمێردرێت لە تیپی گەنجانی عێراق و ١٧ گۆڵی بۆ ئەو تیپە تۆمارکردووە، لەخولەکانی کەنداویشدا نازناوی گۆڵکەری جامی کەنداوی بەدەستھێناوە و ھەروەھا نازناوی یاریزانی سەدەی لەعێراقدا وەرگرتووە و بەباشترین یاریزانی تۆپی پێی ئاسیا ناوی دەرکردووە.

ئەحمەد ڕازی لەساڵانی دواییدا بۆتە سیاسەتمەدارێکی عێراقی و لە ساڵی ٢٠٠٨ وەکو ئەندامی ئەنجومەنی نوێنەرانی عێراق لەسەر لیستی بەرەی تەوافوقی عێراقی ھەڵبژێردراوە و بۆتە ئەندامی لیژنەی وەرزش و لاوانی ئەنجومەنی نوێنەرانی عێراق و دواتر بۆتە ئەندامی ئەنجومەنی نوێنەرانی عێراقە لەسەر لیستی عێراقییە کە ئەیاد عەلاوی سەرۆکایەتی دەکات.

مردن[دەستکاری]

ڕازی لە ١٦ی حوزەیرانی ٢٠٢٠، نیشانەکانی نەخۆشیی ڤایرۆسی کۆرۆنای لێ دەرکەوت، و لە ٢١ی حوزەیران بەھۆی نەخۆشییەکەوە گیانی لەدەستدا.[١]

پەراوێزەکان[دەستکاری]

  1. ^ سۆما ئەحمەد (لە ڕێکەوتی ٢١ی حوزەیرانی ٢٠٢٠). ئەستێرەی پێشووی هەڵبژاردەی عێراق، ئەحمەد ڕازی بەهۆی ڤایرۆسی كۆرۆناوە كۆچی دوایی كرد(کوردی). سەردان لە ڕێکەوتی ٢٧ی حوزەیرانی ٢٠٢٠.

سەرچاوەکان[دەستکاری]

  • ویکیپیدیای عەرەبی.