عوسمانە سوور

لە ئینسایکڵۆپیدیای ئازادی ویکیپیدیاوە
Jump to navigation Jump to search

عوسمان محەممەدی ناسراو بە عوسمانە سوور، لەدایکبووی ١٩٤٠ لە بۆکانی ڕۆژھەڵاتی کوردستان نایەژەنی ناوداری کوردە. زیاتر لە نیوسەدەیە خزمەتی ھونەری فۆلکلۆری کوردەواریی دەکات و خاوەنی چەندین خەڵاتی ناوخۆ و دەرەوەی وڵاتە.

عوسمانە سوور
لەدایکبووی١٩٤٠
بۆکان
بنەچە کوردستان
پیشەکاننایەژەن، دووزەلەژەن
ئامێرەکاننایە، دووزەلە
ساڵانی چالاکبوون١٩٦٥ تا ئێستا

ژیان[دەستکاری]

مامۆستا عوسمانە سوور شەوی نەورۆزی ساڵی ١٣١٩ ی کۆچی ھەتاوی (١٩٤٠ زایینی) لە ئاوایی "ھەباساوا"ی نێوان بۆکان و میاندواو لە ڕۆژھەڵاتی کوردستان لە دایک بووە. دواتر ماڵیان دەگوێزنەوە بۆ ئاوایی "قەرەکەند"ی سەر ڕێی بۆکان مەھاباد. عوسمانە سوور بە لاوێتی بە دیتنی مامۆستا قالەمەڕە کە ھامووشۆی ماڵە باوکی کردووە عاشقی شمشاڵ دەبێ. قالەمەڕە شمشاڵێکی بۆ دێنێ و دەڵێ دەبێ ببی بە شوان و لە بەر مەڕان خۆت فێر کەی. عوسمانەسوور دەڵێ ھەر کە بەھار داھات لە خۆشیی شمشاڵ بوومە شوان و ھەتا لە پاییزێکی سارددا شەرتم پەڕی ھەر فووم بە شمشاڵ‌دا کرد و فێری زۆر شت بووم. ساڵی دواتریش دیسان بوومەوە شوان و ئیدی تەواوێک فێری شمشاڵ لێدان بووم. ساڵەودوا بەڕێکەوت لە قاوەخانەی قەرەکەند خوالێ‌خۆشبوو قالەبەلەنجەی دووزەلەژەن دەبینێ و شەیدای دووزەلە و نایە دەبێ. شمشاڵ وەلا دەنێ و دێتە بۆکان و دەچێتە میاندواو و لەوێندەرێ دووزەلە و نایەیەک دەکڕێ. ساڵێک خۆیان پێوە ماندوو دەکا و تا ڕادەیەک ڕادێ. عوسمانی مینە مۆزی تەپڵچی پێشنیازی پێ دەکا بچنە عێڕاق. وێکڕا دەچنە سلێمانی. عوسمانەسوور لەوێ ڕەگەڵ مامۆستا حەسەنی نەی و ھاوڕێیانی دەکەوێ و شتیان لێوە فێر دەبێ. پاش ھەشت مانگان دەگەڕێتەوە. عوسمانی مینە مۆز و عەبەچکۆڵی تەپڵچی نێوی "عوسمانە سوور"ی لێ دەنێن. بۆخۆی دەڵێ ئێستا ئەگەر پێم دەڵێن کاک عوسمان، یان ئاغای محەممەدی پێم ناخۆشە! عوسمانە سوور نیوسەدەیە لە ڕۆژھەڵاتی کوردستان و بەتایبەتی لە موکریان دەنگی نایەی دەبیسترێ و دڵی تینووی کوردەواریی پاراو دەکات. لەگەڵ زۆر ھونەرمەندی وەک حەسەن زیرەک، عەلی خەندان، برایمی قادری، خەباتی مەولوودی و... ھاوکاری کردووە و دووزەلە و نایەی بۆ لێداون. لە گەلێک کۆڕ و کۆبوونەوەی ناوخۆ و دەرەوەی وڵاتدا بەشداری کردووە و ھەمیشە لە ڕیزی پێشەوە خەڵات کراوە. وەک بۆخۆی دەڵێ ھیچ ماڵ و حاڵێکی پێکەوە نەناوە و خاوەنی ھیچ سامانێک نییە، بەڵام خۆشەویستیی خەڵک و ئەو حورمەتەی لێی دەگرن بۆ ئەو بارتەقای ھەموو سامانی دنیایە و دڵی پێی خۆشە.[١][٢][٣] عوسمانە سوور لە تەمەنی سی و چەند ساڵەیی‌دا دەگەڵ پوورزایەکی خۆی ژیانی ھاوبەشی پێکەوە ناوە و خاوەنی چوار کوڕە.

سەرچاوەکان[دەستکاری]

  1. ^ ماڵپەڕی ئیدارەی سەبتی ئەحواڵی بۆکان: http://bokan.sabteahval-ag.ir/mods.php?id=Info_Center&task=readpage&pid=28
  2. ^ سفر عوسمانە سوور در موسیقی موکریان با آلبوم نرمە نی. ماڵپەڕی زریان: http://ziryan.ir/NewsDetail.aspx?itemid=8026 Archived ١٨ی ئازاری ٢٠١٥, لە وەیبەک مەشین.
  3. ^ عوسمانە سوور از بوکان در ردیف بھترین ھا قرار گرفت، مالپە ری زریان؛ http://www.ziryan.ir/NewsDetail.aspx?itemid=906 Archived ٧ی کانوونی دووەمی ٢٠١٣, لە وەیبەک مەشین.