دەستپێک (فیلم)

لە ئینسایکڵۆپیدیای ئازادی ویکیپیدیاوە
باز بدە بۆ: ڕێدۆزی، گەڕان
دەستپێک
Inception
دەرھێنان کریستۆفەر نۆلان
بەرھەمھێنان کریستۆفەر نۆلان
ئێمما تۆماس
نووسین کریستۆفەر نۆلان
کاست لیوناردۆ دیکاپریۆ
کێن واتانابی
جۆزێف گۆردۆن-لیڤیت
ماریۆن کۆتیارد
ئێلن پەیج
تۆم هاردی
دیلییپ رائۆ
سیلیان مۆرفی
تۆم بێرێنگەر
مایکڵ کەین
مۆسیقا هانس زیمەر [١]
وێنەگری سینەمایی واڵی فیستەر
دەستکاری لی سمیس
لێجەندەری پیکچەرز
سینکۆپی فیلمز
کۆمپانیای بڵاوکەرەوە وارنەر برۆس پیکچەرز
ڕێکەوتی دەرچوون ٨ی تەمموزی ٢٠١٠ (لەندەن)
١٦ی تەمموزی ٢٠١٠ (ویلایەتە یەکگرتووەکان)
ماوەی فیلم ١٤٨ خولەک [٢]
وڵات ویلایەتە یەکگرتووەکان
زمان ئینگلیزی
تێچوون ١٦٠ ملیۆن $
داھات ٨٢٥,٥٣٢,٧٦٤ $ [٣]

دەستپێک فیلمێکی زانستی خەیاڵی و هەستبزوێنە ، لەنووسین و بەرهەمهێنان و دەرهێنانی کریستۆفەر نۆلانە.

فیلمەکە لەنواندنی ئەکتەران لیۆناردۆ دی کاپریۆ،جۆسێف گۆردن-لێڤیت،ئێلن پەیج،ماریۆن کۆتیارد،کێن وەتانابی،تۆم هاڕدی ، سیلیان مەرفی و مایکڵ کەینە.دیکاپریۆ ڕۆڵی دزێکی پڕۆفیشناڵ دەبینێ کەوا کاری سیخووڕیکردنی پیشەسازیە لەڕێگای چوونە نێو بیری کەسە دەوڵەمەندەکان.دواتر هەلی ئەوەی دەدرەتێ کەوا تاوانەکانی بسڕێنەوە ئەگەر هاتوو سەرکەوتوو بێ لەچاندنی بیرۆکەیەک لەنێو مێشکی میراتگری یەکێک لەگەورەترین کۆمپانیاکان.

دوای ئەوەی لەساڵی ٢٠٠٠ فیلمی (Insomia) بەکۆتا هات ، نۆلان هەستا بەنووسینی چیڕۆکێکی ٨٠ لاپەڕەیی دەربارەی "خەون دزەکان" و ئەوکات بیرۆکەکەی بۆ فیلمێکی ترسێنەر دانابوو بیرۆکەکەی پێشکەشی کۆمپانیای وارنەر بردەرز کرد. کۆمپانیاکە پێیوابوو نۆلان پێویستی بەلێهاتوویی زیاتر هەیە بۆ مامەڵەکردن لەگەڵ ئەم فیلمە بودجە-زەبەلاحانە ، بۆیە نۆلان لەپڕۆژەکە کشایەوە هەستا بەکارکردنی لەسەر سیانەی فیلمی باتمان لەنێوان ساڵانی (٢٠٠٥-٢٠١٢) هەروەها فیلمی (The Prestige) لەساڵی ٢٠٠٦.لەم نێوانەدا و لەساڵی ٢٠٠٩ بۆ ماوەی شەش مانگ چاککاری بۆ سیناریۆکە کرد و پێشکەشی کرد.فیلمەکە لە شەش وڵاتی جیاواز و چوار کیشوەری جیاواز کاری وێنەگرتنی بۆ کراوە ، و کاری وێنەگرتنەکەی لە ١٩ی تەمووزی ٢٠٠٩ دەستیپێکرد و لە ٢٢ی نۆڤەمبەری ٢٠٠٩ بەکۆتا هات.تێچووی فیلمەکە ١٦٠ ملیۆن دۆلار بوو و بڕەکەی لەنێوان کۆمپانیای وارنەر برۆس و لێجندەری پیکجەرز دابەش کرا ، بەهۆی سەرکەوتنی نۆلان لەفیلمی (The Dark Knight) هەوادارێکی زۆر لەسەرەتا چاوەڕوان بوون و هەر زوو فیلمەکە نزیکەی ١٠٠ ملیۆن دۆلاری کۆکردەوە.

فیلمەکە لە ٨ی تەمووزی ٢٠١٠ لەشاری لەندەن نمایشکرا. و داهاتی فیلمەکەش گەیشت بە ٨٠٠ ملیۆن دۆلار و پلەی ٤٥ەمی گرت لەپڕداهاترین فیلمەکانی مێژوو ، هەروەها فیلمەکە تەنها لەڕێگای فرۆشتنی دیڤیدی و بلوڕەیەوە ٦٨ ملیۆن دۆلاری کۆکردەوە.لەڕوانگەی ڕەخەنگرانەوە فیلمەکە پێشوازیەکی سەرسورهێنەری لێکرا و ستیاشی سیناریۆ و کاستی فیلمەکە کرا و بەتایبەت دەرهێنەر کریستۆفەر نۆلان ، هەروەها توانی چوار خەڵاتی ئۆسکار بباتەوە بۆ باشترین سینەماتۆگرافی ، باشترین دەستکاری دەنگی ، باشترین تێکەڵکردنی دەنگی و باشترین کاریگەریە ڤیدیۆیەکان ، جگە لەوەش پاڵێوراو کرا بۆ چواری تر لەنێویاندا : باشترین فیلمی ساڵ ، باشترین سیناریۆی نووسراو باشترین دەرهێنەر و باشترین مۆسیقا.

چیڕۆک[دەستکاری]

دۆمنیک "دۆم" کۆب (لیۆناردۆ دی کاپریۆ) و ئارسەر (جۆسێپ گۆردۆن-لێڤیت) کەسانی "دەرهێنەر - ‌هێنانەدەر"ن ، کە کاریان دەرهێنان و دزینی بیرۆکەی سەرۆک کۆمپانیا پیشەسازیەکانە بەهۆی بەکارهێنانی ئامێرێکی پێشکەوتوو بۆ چوونە نێو بیرکردنەوەی خەڵک و هێنانەدەرەوەی زانیاری لەڕێاگای جیهانێکی کراوەی خەونەوە.دوایین ئامانجیان سایتۆ (کێن واتانابی) ، پێیان دەڵێ کەوا ئەو ئەرکێکی بۆیان هەیە ئەویش چاندنی بیرۆکەیەکە لەنێو میراتگری کۆمپانیا ڕکابەرەکەی.

بۆ ئەم کارەش دەبێ کوڕەکەی ماوریس فیشەر (پیت پۆستڵوەیت) بەناوی ڕۆبەرت فیشەر (سیلیان مەرفی) ڕازیبکات تاکو کۆمپانیاکەی باوکی تێکبدات ، لەبەرامبەر ئەوەشدا سایتۆ هەڵدەستێ بە سڕینەوەی حوکمی تاوانەکانی کۆب کەپێشتر تاوانی کوشتنی خرابووە پاڵ ، ئەمەش ڕێگەدەدات کەوا کۆب بگەڕێتەوە ماڵەوە بۆلای منداڵەکانی.کۆب ئەم ئەرکەی پێ قبوڵە و هەڵدەستێ بەپێکهێنانی تیمێک لە : ئیمس (تۆم هاڕدی) ، کە کەسێکی گرەوکەر و ساختەکاری ناسنامەیە ، و یوسف (دیلیپ ڕائۆ) ، کیمیاگەرێکە کەوا توانای درووستکردنی مادەیەکی کیمیاوی هەیە بۆ درێژکردنەوەی کاتی خەونەکان ، ئەدریان (ئێلن پەیج) ، قوتابیەکی ئەندازیاریە کەوا داوای لێدەکرێ نەخشەسازی بۆ خەونەکان بکات ، بە یارمەتی پرۆفیسۆر ستێفن مایڵس (مایکڵ کەین) کە لەهەمان کاتدا باوانی کۆبیشە.دوای ئەمە ئەدریان بۆی دەردەکەوێ کەوا لەنێو خەونەکانی کۆبدا ، کۆب هاوسەرەکەی خۆی بەناوی ماڵ دێتەوە بەرچاو کەزۆرجار کارەکانی لێ تێکدەدەن.

ماوریس فیشەری سەرۆک کۆمپانیا لە سیدنی دەمرێ ، ڕۆبەرت فیشەری کوڕی و میراتگری لەفڕۆکەی گواستنەوەی تەرمەکە دەبێ و بۆ ماوەی دە کاتژمێریان دەبێ تاکو تەرمەکە دەگەینەوە شوێنی مەبەست ، هەربۆیەش سایتۆ هەڵدەستێ بەکڕینەوەی فڕۆکەکە بەنهێنی و تیمەکەش دەباتە نێو هەمان فڕۆکە.تیمەکەش هەڵدەستن بە لەهۆشچواندی ڕۆبەرت و بردنی بۆ نێو خەونێکی هاوبەش.لە هەر قۆناغێکی خەونەکەدا ، کەسێکی تیمەکە نابێ بچێتە نێو خەونێکی تر و بەڵکو دەبێت لە خەونەکە بمێنێتەوە بۆ ئەوەی بتوانێ "لەقە"یەک بکات کە هاوتیمەکانی خۆی پێ لەخەونەکە بەئاگا بهێنێتەوە.

لەقۆناغی یەکەمی خەونەکە ، یوسف خاوەنی خەونەکە دەبێ کە لەکەشێکی باراناوی لۆس ئەنجلس دەستپێدەکات ، تیمەکە هەڵدەستن لەم قۆناغەی خەونەکەدا ڕۆبەرت فیشەر دەڕفێنن بەڵام لەلایەن سەربازە مێشکیەکانی فیشەرەوە بەرپەرچ دەدرێنەوە ، ئەم سەربازانەش بەهۆی ئەوە پەیدابوونە کەوا ڕۆبەرت فیشەر لە جیهانی ڕاستیدا مێشکی ڕاهێنانی پێکراوە بۆ ئەوەی نەتوانرێ بیرۆکەی نێو مێشکی دەستکاری بکرێ ، هەربۆیەش ئەم سەربازانە درووست دەبن لەناو خەونەکەی یوسف ، تیمەکە ڕۆبەرت دەبەنە شوێنێکی تایبەت و بۆشیان دەردەکەوێ کە سایتۆ برینداربووە ، لەوێشدا کۆب ئاشکرای دەکات کەوا مردن لەنێو خەونەکەدا وادەکات کەسە مردووەکە بگەڕێتەوە جیهانی ڕاستەقینە ، بەڵام بەهۆی بەهێزی ماددە کیمیاویە بێهۆشکەرەکان کە بۆ درێژکردنەوەی خەونەکە یوسف لەسەر هەمووانی دانابوو ، سایتۆ لەو حاڵەتەدا دەکەوێتە نێو جیهانی "لیمبۆ" ، کە جیهانێکی گەورە و بێکۆتای خەونە و هەلاتن لێی زۆر سەختە و زۆرجار لە وا لەکەسی خەونبین دەکات کە بیری بچێتەوە لەنێو جیهانی خەونە و جیهانە خەونەکەی لێ ببێتە ڕاستی ، سەرەرای ئەمەش تیمەکە بەردەوام دەبن لە ئەرکەکەیان.

ئیمس شێوەی خۆی دەگۆڕێتە سەر شێوەی باوانی ڕۆبەرت فیشەر کە پیتەر ىراونینگە ، بۆ ئەوەی داوا لەڕۆبەرت بکات کە دووبارە پێداچوونەوە بۆ وەسیەتی باوکی بکات و هەندێ زانیاری لێوەردەگرێ لەسەرشێوەی براونینگی باوانی.دوای ئەمە تیمەکە هەموویان دەچنە نێو پاسێکەوە و فیشەریش دەبەن بۆ ئەوەی هەموو تیمەکە بچنە نێو خەونێکی تر جگە لەیوسف کە ئەو دەمێنێتەوە بۆ ئەوەی بتوانێ لەکاتی پێویست "لەقە"کە لەتیمەکانی بدات و لەخەوەکە بەئاگایان بهێنێتەوە .

لەقۆناغی دووەمی خەونەکەدا ، هوتێلێک دێتە بەرچاو و خەوبینەکەش ئارسەرە ، کۆبیش وا لەڕۆبەرت دەکات کە وا بیربکاتەوە ڕفێندرابێت لەلایەن بڕاونینگی باوانیەوە و کۆب خۆی وەک پاسەوانی ڕۆبەرت دەناسێنێت.کۆب دوای گفتوگۆیەک ڕۆبەرت ڕازیدەکات کەوا بچێتە نێو قۆناغێکی تر خەون بۆ ئەوەی لەوڕێگایەوە ڕۆبەرت بچێتە نێو بیرکردنەوەی براونینگی باوانی تاکو بزانێ براونینگ نیازی چی بووە ، بەڵام لەڕاستیدا تیمەکە فێڵی لێدەکەن و دەچنە نێو بیرکردنەوەی خودی ڕۆبەرت و ئیمسیش دەکەنە خاوەن خەونەکە و ئارسەر بەجێدەهڵێدرێ بۆ ئەنجامدانی "لەقە"ەکە.

سێیەم قۆناغ بریتیە لە بینایەکی سەربازی لەنێو چیایەکی بەفراویە و خەونبیەنەکەش ئیمسە.تیمەکە دەبێ سەربازەکانی ئەو قۆناغە بوەستێنن لەوکاتەی کەوا کۆب ڕۆبەرت دەباتە هاوتای خەونەکەی خۆی (بریتیە لەقاسەیەک کەوا بەکردنەوەی ڕۆبەرت بیرۆکەکەی لەمێشکیدا دەچەسپێ).

یوسف،لەبەردەم هێرشی بەردەوامی سەربازە بیریەکانی ڕۆبەرتە لەقۆناغی یەکەمی خەونەکەدا ، بەوهۆیەشەوە لەوێ دەکەوێتە نێو ڕووبارێکەوە و ئەمەش "لەقە"ەکەی ئەو زۆر زوو چالاک دەکات.بۆیە هێزی کێشكردنی زەوی لەقۆناغی ئارسەر ناهێڵێت ، ئارسەریس دەبێ هەڵسێ بە ڕێکخستنی لەقەیەک بەرلەوەی پاسەکە بگاتە ئاوی ڕووبارەکە لەقۆناغی یەکەمدا و ببێتە هۆی دروستبونی هەرەسی بەفر لەقۆناغی خەونەکەی ئیمس تاکو ئاگاداریان بکاتەوە.کۆب ڕۆبەرت دەگەیێنێتە لای قاسەکە ، بەلام بەهۆی بیرەوەریەکانی هاوسەرەکەی ، "ماڵ"ی هاوسەری لەوێدا لێی پەیدا دەبێت و ڕۆبەرت دەکوژێ بەرلەوەی بگاتە قاسەکە،کۆبیش "ماڵ" دەکوژێتەوە و لەلایەکی تر "سایتۆ"ی برینداریش دەمرێ : هەرسێکیان دەچنە نێو جیهانی لیمبۆ ، لەوکاتەشدا ئیمس خەریکی درووستکردنی لەقەیەکە لەڕێگای دانانەوەی تەقەمەنیەوە لەچواردەوری بینایەکە ، کۆب و ئەدریان دەچنە نێو جیهانی لیمبۆ لەپێناوی ڕزگارکردنی ڕۆبەرت و سایتۆ.

کۆب ئەوە بۆ ئەدریان ئاشکرا دەکات کەوا ئەو "ماڵ"ی هاوسەری لەوکاتەی ئامێری خەونبینەکەیان تاقیدەکردەوە هاتبوونە نێو جیهانی لیمبۆ ، و بەکاتی جیهانی ڕاستەقینە چەند کاتژمێرێکی خایاندبوو بەڵام لەڕاستیدا ٥٠ ساڵیان لەجیهانی لیمبۆ بەسەربردبوو و جیهانێکیان لەبیرەوەریەکانی نێوان خۆی و ماڵ درووست کردبوو ، و کاتێکیش ماڵ بیری چۆبەوە کەوا لەنێو خەونە ڕەتی کردبەوە بگەڕێتەوە جیهانی ڕاستی ، بۆیە کۆب هەڵسابوو بەچاندنی بیرۆکەیەک لەڕێگای مزراعێکەوە (کەوا تایبەتە بەوەی خەونبینەکان لەڕێگای سوڕاندنی دەزانن کەوا لەجیهانی خەونن یان راستی) و ئەوەی بیرخستبەوە کەوا ئەوان لەجیهانی لیمبۆن نەوەک ڕاستی.دوای ئەوە ماڵ و کۆب گەڕابوونەوە جیهانی ڕاستی ، ماڵ هەر پێیوابووە کەوا جیهانەکەیان ڕاستی نییە ئەمەش بەهۆی کاریگەری چاندنی بیرۆکەکە لەمێشکی ، بۆیە ماڵ هەستا و خۆی کوشت چونکە پێیوابوو بەو خۆکوشتنەی دەگەڕیتەوە جیهانی ڕاستی ، نەیدەزانی کەوا خۆکوشتنەکەی هەتا هەتاییە و لەجیهانی ڕاستیە ، بەمشێوەیە کۆبیش بەکوشتنی ئەو تاوانبار کرابوو و ئەمەریکای جێهێشت و منداڵەکانیشی لای پرۆفیسەر مایڵس ، ئەم چیڕۆکە کاریگەری زۆر دەکاتە سەر ئەدریان و پێیوایە کۆب تاوانی نەبووە.

دوای ئەم گفتوگۆیە ، کۆب دەگاتە ئەو ئەنجامەی کەوا ئەو بێتاوان بوو لەمردنی ماڵ.کۆب و ئەدریان بەردەوامن بەگەڕان لەنێو جیهانی لیمبۆ ، کاتێ دەگەنە لای ماڵ ، ئەدریان ماڵ دەکوژێ و ڕۆبەرتیش لەجیهانەکە ڕزگار دەکات لەڕێگای لەقەیەکەوە ، بەم هۆیەشەوە ڕۆبەرت دەگەڕێتەوە قۆناغی سێیەمی خەونەکە کەتیایدا چیایە بەفراویەکە بوو و قاسەکە دەکاتەوە و بیرۆکە چێندراوەکە دەچێتە ناو مێشکی.کۆب هەر لەجیهانی لیمبۆ دەمێنێتەوە بۆ ڕزگارکردنی سایتۆ ، بەڵام ئەندامانی تری تیمەکە لەقەکە ئەنجامدەدەن دەگەڕێنەوە جیهانی ڕاستی.کۆب لەناکاو سایتۆ دەدۆزێتەوە بە تەمەنێکی پیرەوە و بیریدەخاتەوە کەوا بەیەکەوە کاریان کردووە و ڕێکەوتنیان لەنێواندا هەبووە.بەمشێوەیەش هەموو خەونیبنەکان بەئاگا دێنەوە و دەگەڕێنەوە جیهانی ڕاستەقینە بۆنێو فڕۆکەکە و لەوێشدا ڕاستەوخۆ سایتۆ پەیوەندیەک دەکات بۆ ئەوەی تاوانەکانی کۆب بسڕێنەوە.

دوای گەیشتنی بە فڕۆکەخانەی لۆس ئەنجلس ، کۆب وەک هاوڵاتیەکی ئاسایی ڕێگەی پێدەدرێ بروات و پڕۆفیسۆر مایڵس دەیباتەوە ماڵەکەی و بۆلای منداڵەکانی ، کۆب دەیەوێ لەڕێگای مزراعەکەوە ئەوە تاقی بکاتەوە کەوا لەجیهانی ڕاستیە یان خەون ، کاتی مزراعەکە دەسوڕێنێ (گەر هەر بەردەوام بێ لەسوڕان ئەوا جیهانی خەونە ، گەر بوەستێ ئەوا مانای ئەوەیە جیهانی ڕاستیە) ، بەڵام چاوەڕێی تەوابوونی سوڕانەکە ناکات و دەچێتە لای منداڵەکان و پڕۆفیسۆر مایلس لەنێو باخچەکەدا دادەنیشن.

ئەکتەران و ڕۆڵەکانیان[دەستکاری]

A man in a black suit, a woman in a pink dress, a man in a plaid suit, a woman in a black dress, a Japanese man in a black suit, and an old man in a blue suit clap their hands, while a man in a black suit stands. A microphone stand is in the foreground, and blue curtains are in the background.
کاستی فیلمەکە لە تەمووزی ٢٠١٠ لەلای چەپەوە : سیلیان مەرفی ، ماریۆن کۆتیارد،جۆسێپ گۆردن لێڤیت،ئێلن پەیج و کێن وەتانابی،مایکڵ کەین و لیۆناردۆ دیکاپریۆ.
  • لیۆناردۆ دیکاپریۆ لەڕۆلی دۆمنیک کۆب ، دزێکی پڕۆفیشناڵە کەوا شارەزای فێڵەکانی دزینە و دەچێتە نێو خەونی قوربانیەکانی و نهێنیەکانیان دەدزێ.دیکاپریۆ یەکەم ئەکتەر بوو کە بۆ ڕۆڵبینین لەفیلمەکەدا ڕازی بووە.نۆلان دەمێک بوو ویستی کارکردنی لەگەڵ دیکاپریۆ هەبووە ، بەڵام بەهۆی نەبوونی فیلمێکی گونجاو نەیانتوانیبوو بەیەکەوە کاربکەن تاکو فیلمی دەستپێک کاتی خۆی هات.بەپێی وێبسایتی باوەڕپێکراوی (The Hollywood Reporter) هەردوو ئەکتەران بڕاد پیت و ویل سمیتیش نزیک بوونە لەوەرگرتنی ئەم ڕۆڵە.
  • جۆسێف گۆردۆن لێڤیت لەڕۆلی ئارسەر ، هاوبەشی کۆبە و یارمەتی کۆب دەدات لەئەرکەکانی.گۆردۆن-لێڤیت ڕۆلی ئارسەر بە بەرهەمهێنەری کارەکانی کۆب وەسفکرد.گۆردۆن تەواوی دیمەنە ئاکشنیەکانی خۆی ئەنجامیداوە.جەیمس فڕانکۆ لەسەرەتادا قسەی لەگەڵ کریستۆفەر نۆلان کردبوو بۆ ئەم ڕۆڵە ، بەڵام بەهۆی کاری وێنەگرتنی فیلمێکی دیکەی نەیتوانی ئەم ڕۆڵە بگێڕێ.
  • ئێلن پەیج لەڕۆلی ئەدریان ، قوتابیەکی زانکۆی ئەندازیاریە کەوا کۆب دەیهێنێ تا خەونەکان دیزانی بکات ، کە بەشێوەی پێچ و پەنان.ناوی ئەدریان بۆیە هەڵبژێردرابوو ڕۆلی ئەم ئەکتەرە چونکە لە ئەدەبی یۆنانی کۆندا ئەدریان ئەو کەسە بوو کە یارمەتی پاڵەوانانی یۆنانی داوە لە زیندانیەکاندا هەڵبێن.هەریەکە لە ئێمیلی بڵەنت،ڕەیچل مەکادەمس،تەیلۆر سویفت ، لەسەرەتا نزیکبوون لەوەرگرتنی ئەم ڕۆڵە.
  • تۆم هاڕدی لەڕۆڵی ئیمس ، هاوڕێیەکی زیرەکی کۆبە.کاری سەرەکی ساختەکاری و گۆڕینی شێوەی خۆیەتی لەنێو خەونەکاندا.
  • کێن وەتانابی لەڕۆلی بەڕێز سایتۆ ، ئەو کەسەی کە گرەنتی بە کۆب دەدا بڕیاری لێخۆشبوونی بۆ دەربکات گەر هاتوو بتوانێ بیرۆکەکە لەمێشکی ڕۆبەرت فیشەر بچێنێت.
  • دیلێپ ڕائو لەڕۆلی یوسف ، کیمیاگەرێکی بەتوانایە کەوا لەنێو خەونەکاندا بەهۆی ماددە کیمیاویەکان ماوەی خەونەکە درێژ دەکاتەوە.
  • سیلیان مەرفی لەڕۆلی ڕۆبەرت فیشەر ، میراتگری ئەو کۆمپانیایەی کەوا تیمەکەی کۆب دەیانەوێ لەناوی ببەن و ئەو کەسەشە کە دەبێ بیرۆکەکەی لەناو مێشکی بچێندرێ.
  • ماریۆن کۆتیارد لەڕۆلی ماڵ ، هاوسەری مردووی کۆب.کەوا کۆب بەهۆی ئەوەوە تاوانی کوشتنی درابووە پاڵ و بەهۆی ئەوەی وایزانیبوو لەجیهانی خەونە خۆی کوشتبوو.
  • مایکڵ کەین لەڕۆلی پرۆفیسەر مایڵس ، مامۆستای کۆب و باوانیەتی ، کەوا هەر ئەویش ئەدریان دەخاتە تیمەکەوە.

بەرهەمهێنانی فیلمەکە[دەستکاری]

گەشەپێدان[دەستکاری]

ئێما تۆماس و کریستۆفەر نۆلان لەکاتی وەڵامدانەوەی پرسیاری ڕۆژنامەنووسان ، ئەم دوو هاوسەرە هەستاون بە بەرهەمهێنانی زۆربەی فیلمەکانیان بەیەکەوە.

نۆلان بەشێوەیەکی سەرەتایی ٨٠ لاپەڕەی دەربارەی چیڕۆکی خەون دزەکان نووسیبوو لەساڵی ٢٠٠٢.لەبنچینەدا نۆلان فیلمەکەی وەک فیلمێکی ترسناک نووسیبەوە ، بەڵام دواتر کردیە فیلمێکی دزین و ئاکشنی.لەکاتی پێداچوونەوەی بۆ چیڕۆکەکە نۆلان چەند گۆڕانکاریەکی گەورەی لەچیڕۆکەکە کرد لەساڵی ٢٠٠٧.نۆلان بۆ ماوەی نۆ ساڵ کاری لەسەر چیڕۆکەکە کردبوو ، هەروەها چیڕۆکەکەشی ئیلهامی لەفیلمە مەزنەکانی وەک (The Matrix) ، (Dark City) ، (Memento) و (The 13th Floor)ەوە وەرگرتبوو ، ئەمەش بەهۆی ئەوەی چیڕۆکەکانی ئەو فیلمانە باسی لەوە دەکرد کە جیهانی زەوی ڕاستەقینە نین و فیلمەکان خەیاڵیەکی زۆریان تێدابووە.

نۆلان لەساڵی ٢٠٠١ قسەی لەگەڵ کۆمپانیای وارنەر بڕۆس کردبوو ، بەڵام دواتر هەستی کرد پێویستی بەلێهاتوویی زیاتر لە بەرهەمهێنانی فیلمێک بەبودجەیەکی گەورەوە ، بۆیە پڕۆژەکەی دواخت و هەستا بە بەرهەمهێنانی سیانەی فیلمی باتمان.دوای ئەمانە نۆلان درکی بەوەکرد کە فیلمەکە پێویستی بە بودجەیەکی گەورە هەیە ، بەهۆی باسکردنی خەون و جیهانی تر.

دیکاپریۆ یەکەم ئەکتەر بوو کە بۆ ڕۆڵبینین لەفیلمەکەدا ڕازی بووە.نۆلان دەمێک بوو ویستی کارکردنی لەگەڵ دیکاپریۆ هەبووە ، بەڵام بەهۆی نەبوونی فیلمێکی گونجاو نەیانتوانیبوو بەیەکەوە کاربکەن تاکو فیلمی دەستپێک کاتی خۆی هات.بەپێی وێبسایتی باوەڕپێکراوی (The Hollywood Reporter) هەردوو ئەکتەران بڕاد پیت و ویل سمیتیش نزیک بوونە لەوەرگرتنی ئەم ڕۆڵە.

شوێنی وێنەگرتن[دەستکاری]

کاری وێنەگرتنی فیلمەکە لە ١٩ی حوزەیرانی ٢٠٠٩ دەستی پێکرد لەو دیمەنەی کەوا سایتۆ و کۆب لەنێو هەلیکۆپتەرێکن.

دواتر کاری وێنەگرتنەکە گوازریەوە بەڕیتانیا و لەنێو ستۆدیۆکانیش وێنەگرتنی لەوێ بۆ کرا.هەروەها هەر لەوێش دیزاینی دیمەنی هوتێلەکە کرابوو و بەیارمەتی تیمی کاریگەریەکانی فیلم توانیان دیمەنەکە ئەوێش وێنەبگرن.

دواتر کاری وێنەگرتنەکە گوازرایەوە فەڕەنسا لەو دیمەنەی کەوا کۆب دەچێتە کۆلێژی ئەندازیاری و دیمەنەکانی کۆب و ئەدریان لەوێ وێنەگیرا.بۆ دیمەنی تەقینەوەکان پۆلیسی فەڕەنسا ڕێگەی بە تیمی فیلمەکە نەدا کەوا تەقەمەنی ڕاستەقینە بەکاربهێندرێ ، هەربۆیەش تیمەکە لەڕێگای نایترۆجینی پەستان بەرزەوە و بەیارمەتی کاریگەریە ڤیدیۆیەکان توانیان تەقینەوەکان بەهۆی شەش کامێرای جیاواز و شەش گۆشەی جیاواز دیمەنەکە وێنەبگرن.

دواتریش کاری وێنەگرتنەکە گوازرایەوە شاری تەنجڕی وڵاتی مەغریب ، کە لەفیلمەکەدا بە شاری مومباسای کینیا ناودەهێنرێ ، کە تیایدا کۆب و ئیمس دەچن بۆ ئەوەی یوسف بهێننە نێو تیمەکە.

کاری وێنەگرتنی فیلمە دووبارە گوازرایەوە ئەمجارەیان بۆ لۆس ئەنجلس لەستۆدیۆکانی کۆمپانیای وارنەر بڕۆس ، لەنێویاندا دیمەنی قەڵاکەی سایتۆ وێنەگیرا لەوێدا.

دوایین قۆناغی وێنەگرتن لەپارێزگای ئەلبێرتای وڵاتی کەنەدا بوو لە مانگی نۆڤەمبەری ٢٠٠٩ ، لەوێدا دیمەنی قۆناغی سێیەمی خەونەکە لەلای چیایە بەفراویەکان وێنەگیرا.تیمی بەرهەمهێنانی فیلمەکە نزیکەی دوو هەفتە وەستان بۆ بەفر بارینێکی بەهێز بۆ وێنەگرتنەکە.

کاریگەریە ڤیدیۆیەکان[دەستکاری]

بۆ دیمەنی خەونەکان ، نۆلان پشتی بە کاریگەریە ڤیدیۆیەکان دەبەست بەشێوەیەکی بەردەوام ، هەروەها گوتی :"هەمیشە ئەم کاریگەریانە ئەو دیمانەنەت بۆ ڕێکدەخەن کەوا بەشێوەیەکی ئاسایی وێنەت گرتوون.سەرپەرشتیاری کاریگەریە ڤیدیۆیەکان پاول فرانکلین بوو ، کەوا بودجەیەکی باشی لەبەردەست دانرابوو بۆ بەرهەمهێنانی ئەو دیمەنانەی پێویستیان بە کاریگەریەکانە ، وەک دیمەنی تەقینەوەی بینای نێو چیایە بەفراویەکە و دیمەنی جیهانی لیمبۆ و دیمەنی نەمانی هێزی کێشکردنی زەوی لەلای ئارسەر.

مۆسیقا[دەستکاری]

مۆسیقای فیلمەکە لەلایەن هانس زیمەرەوە نووسرابوو و دارێژرابوو ، هانس کارە مۆسیقاییەکەی بە مۆسیقایەکی ئەکشنی و پڕ لەهەست و سۆزەکانی کۆب وەسفکرد. بۆ ئەم کارەی هانس پاڵێوراو کرا بۆ خەڵاتی ئۆسکاری باشترین مۆسیقای فیلم.

شێوازی فیلمەکە لەنێوان ڕاستی و خەون[دەستکاری]

A staircase in a square format. The stairs make four 90-degree turns in each corner, so they are in the format of a continuous loop.
پەیژە سێ لایەکان یەکێکن لەو شتانەی کە لەفیلمەکەدا لەنێو خەونەکەدا درووست دەکرێ.

نۆلان دەیویست لەم فیلمەدا بیرۆکەی خەڵک نیشانبدات لەنێو خەونێکی هاوبەشدا ، کە ڕێگەت پێدەدات بچیتە نێو ئەقڵی کەسێکی هۆشمەند.هەروەها فیلمەکە بەزۆری لەنێو خەونەکاندایە وەک نۆلان دەیویست ، هەروەها نۆلان دەربارەی خەونەکان ڕایگەیاند "خەونەکان هەمیشە گەشە دەکەن لە هەر قۆناغێکدا و تا ئەوکاتەی کەسەکە لەنێویدا دەگەڕێ".نۆلان پەیوەندی بە تیمی نووسەرانی فیلمی ماتریکسیش کردبوو بۆ وەرگرتنی بیرۆکە دەربارەی درووستکردنی جیهانێکی خەیاڵی کە پێکهاتبوونی لە مایکڵ فۆکاڵت و ژۆن باودیلارد.

دیدێ بارێت ، توێژەرەوەیەکی خەون لەزانکۆی هارڤارد گوتی کەوا نۆلان هەموو وردەکاریەکانی بینینی خەونی بەتەواوی باسنەکردبوو ، بەڵام ئامرازە خەیاڵیەکان توانی قەرەبووی ئەمە بکاتەوە ، جگە لەوە ئەو دیمەنەی کەوا کۆب دەکەوێتە نێو بانیۆیەکی پڕ ئاو و ئاوەکە دەکەوێتە نێو خەونەکە ئەمەیان دیمەنێکی سەرنجڕاکێشە چونکە کاتێک مرۆڤ خەون دەبینێ هەمیشە بەهۆی شتێکی نەخوازراوە بەهۆش خۆی دێتەوە ، ئەم دیمەنەش هەمان ڕاستی دەسەلمێنێت.


تەکنیکی سینەمایی[دەستکاری]

جۆری فیلمەکە[دەستکاری]

ماریۆن کۆتیارد لەڕۆلی ماڵ ، ئەو کەسەی لەخەونەکاندا دەبێتە بەربەستی کۆب ، بەهۆی ئەوەی یادەوەریەکی زۆریان بەیەکەوە هەیە.نۆلان ئەم ڕۆڵەی بەڕۆلی ئافرەتێکی چاونەترس وەسف کرد.

نۆلان چەندەها ئامرازی خەیاڵی و زانستی و ئاکشنی تێکەڵکردبوو لەفیلمەکەدا.ماڵیش بەشێک بوو لەزۆربەیان ، وەک شەڕانگێزی فیلمەکە زۆرجار لەخەونەکانی کۆبدا دەردەکەوت و کارەکانی لێی تێکدەدا و کۆبیش نەیدەتوانی کۆنتڕۆلی بکات. دیکاپریۆ ستایشتی ڕۆڵەکەی کۆتیاردی کرد و بە نواندنێکی شازی وەسفکرد کە تیایدا لەیەک کاتدا ئافرەتێکی چاونەترس و شەڕانگێزە و هەندێکجار دڵی بینەران بۆلای خۆی دەبات.

کۆتایی فیلمەکە[دەستکاری]

دیمەنی کۆتایی فیلمەکە پرسیاری ئەوەی دوای خۆی جێهێشت کە ئاخۆ هێشتا کۆب لەنێو خەونە یاخود جیهانی ڕاستی ، ئەمەش بەهۆی تەواونەبوونی سوڕانی مزراعەکە لەدیمەنەکەدا. نۆلان ڕایگەیاند کەوا پرسیاری ئەم دیمەنەی زۆر لێکراوە و گوتی ئەوەی بەلامەوە پێکەنیناویە ئەوەیە کە خەڵکی دەیانەوێ وەڵامێکیان بدەمێ بۆ ئەم دیمەنە.لە سکریپتی فیلمەکە دیمەنەکە بەمشێوەیە دارێژڕابوو " لەپشت ئەودا ، لەسەر مێزەکە ، مزراعەکە هەر بەردەوامە لەسوڕان و فیلمەکە بەکۆتا دێت".هەروەها مایکڵ کەین کە لەدیمەنی کۆتاییدا دەردەکەوێ گوتی "گەر من لەنێویدا بم ئەوا ڕاستیە ، چونکە من هەرگیز لەنێو خەونەکاندا نەبوومە ، من ئەو کەسەم کە خەونەکەم داهێناوە".

کاردانەوەکان[دەستکاری]

کاردانەوەی ڕەخنەگران[دەستکاری]

وێبسایتی Rotten Tomatoes ڕێژەی %86 بە فیلمەکەدا لەنێوان ٣٢٥ ڕەخنەگردا و بەشتێکی زیرەکانەی وەسفکرد ، هەروەها وێبسایتی Metacrtic 74 لە 100 بەفیلمەکدا و وێبسایتی IMDBیش 8.9/10 بە فیلمەکەدا و لەپلەی ١٤هەمی باشترین فیلمی مێژووی جێگیر کرد.

خەڵاتەکان[دەستکاری]

ئینسێپشن لەلایەن ٢٧٣ ڕەخنەگرەوە بە یەکێک لە باشترین فیلمەکانی ٢٠١٠ هەڵبژێردرا ، و لەنێویاندا ٥٥یان بەباشترین فیلمی ساڵ هەڵیانبژارد ، و زۆربەشیان بەپلەی دووەم هەڵیانبژاردبوو دوای فیلمی (The Social Network).فیلمەکە لەبەشەکانی تەکنیکاری خەڵاتی زۆری بردەوە ، وەک خەڵاتی ئۆسکار بۆ باشترین سینەماتۆگرافی،باشترین کاریگەریە دەنگیەکان ، باشترین تێکەڵکردنی دەنگی و باشترین کاریگەریە ڤیدیۆیەکان ، هەروەها خەڵاتی بافتا بۆ باشترین کاریگەریە ڤیدیۆیەکان و باشترین دەنگ و باشترین دیزاینی بەرهەمهێنان.

بەشەکانی داهاتوو[دەستکاری]

کاتێ پرسیار لەنۆلان کرا دەربارەی بەشێکی تری فیلمەکە ، نۆلان گوتی "ئەمە شتێک نییە کە بڵێم نەخێر بۆی ، بەلام شتێکیش نییە کەزۆر بیرم لێکردبێتەوە".تۆم هاڕدی گوتی " تەواوی ئەکتەران بۆ بەشێکی تر ئامادەن ، بەڵام جارێ دیارنییە کە بەشێکی تر دەبێت یاخود نا".

سەرچاوەکان[دەستکاری]

١.ماڵپەری کوردسینەما

  1. George (July 23, 2009). http://www.cinemarewind.com/2009/07/inception-cast-and-crew-updates.html Cinema Rewind. Retrieved August 31, 2009..
  2. Inception. BBFC (لە ڕێکەوتی June 29, 2010). سەردان لە ڕێکەوتی August 8, 2010.
  3. http://www.boxofficemojo.com/movies/?id=inception.htm Box Office Mojo. Retrieved January 16, 2011.