ئەردەڵان بەکر

ئەردەڵان بەکر
لەدایکبووی	ھەولێر، کوردستان
مردووی	١٠ی تشرینی یەکەمی ٢٠٠٩ ستۆکھۆڵم
ساڵانی چالاکبوون	١٩٩٧ تا ٢٠٠٧

ئەردەڵان بەکر گۆرانیبێژێکی کورد بوو. لە ساڵی ١٩٦٧ لە گەڕەکی خانەقای شاری ھەولێری پایتەختی ھەرێمی کوردستان لە نێو بنەماڵەیەکی کوردپەروەر و شۆرشگێڕ لەدایک بووە.

کورتەی ژیان

ئەردەڵان لە سەردەمی تەمەنی لاویدا پەیوەندی بە ڕیزەکانی شۆڕشی ئازادیخوازی کوردستان دەکات و دەبێتە پێشمەرگە. ماوەی چەند ساڵێک لە ڕیزی پێشمەرگەدا خەبات دەکات، پاشان دەست بە کاری ھونەری گۆرانیوتن دەکات.

ژیانی ھونەری

ئەردەڵان خاوەنی چەندین بەرھەمی گۆرانییە. لە سەرەتایی ساڵانی ١٩٩١ لە دوای ڕاپەڕینە مەزنەکەی کوردستان، لەگەڵ کۆڕەوە جەماوەریەکی ٣١ ئازاری ئەو ساڵە کوردستانی بەجێھێشت و ڕووی کردە دەرەوەی وڵات. پاش ماوەیەک لە وڵاتی سوید گیرسایەوە. ئەردەڵان شان بە شانی دەستەیەکی دیار و بەرچاو لە ھونەرمەندانی گۆرانیبێژی کورد لە وڵاتی سوید درێژەی بە کارە ھونەرییەکانی دا و توانی ٥ ئەلبومی گۆرانی بەرھەم بھێنێت. جگە لەوانەش بەشداریی چەندین ئاھەنگ و بۆنەی جیاجیای لە وڵاتانی ئەورووپا کردووە، بەتایبەتی لە جەژنی نەورۆز و بۆنە تایبەتییەکان بۆ ڕەوەندی کورد لە تاراوگە.

ئەردەڵان لە نەورۆزی ٢٠٠٨دا لەلایەن کۆمپانایای کۆڕەک میوزیک بۆ یەکەمین جار دوای ئەوەندە ساڵە دوورەوڵاتییە گەڕایەوە بۆ کوردستان و چەند ئاھەنگێکی لە شاری ھەولێر ساز کرد.

بەرھەمەکان

ئەلبومەکان

• کچی گاور (١٩٩٧)
• بەینۆ (١٩٩٨)
• ھەورامان (٢٠٠٠)
• زۆر دەترسم (٢٠٠٣)
• خەونێک بوو (٢٠٠٧)

مردن

ئەم ھونەرمەندە لە رێکەوتی ١٠ی تشرینی یەکەمی ٢٠٠٩دا بەھۆی نەخۆشیی شێرپەنجە لە نەخۆشخانەی کارۆلینسکای ستۆکھۆڵم کۆچی دوایی کرد.