کۆدەکەی دا ڤینچی

لە ئینسایکڵۆپیدیای ئازادی ویکیپیدیاوە
باز بدە بۆ: ڕێدۆزی، گەڕان
بەرگی چاپی کوردی

کۆدەکەی داڤینشی ڕۆمانێکی نهێنی ئامێزە لە نووسینی دان بڕاونە و لە ساڵی ٢٠٠٣ دەرچووە. ڕۆمانەکە بە چیڕۆکێکی نهێنی ئامێز لە ساتی کوشتنی بەڕێوبەری مۆزەخانەی لۆڤەرەوە دەستپێدەکا و لە دواساتەکانی ژیانی چەند تێبینییەک بەجێدەهێڵێ. لەگەڵ تێبینییەکاندا ڕۆبەرت لانگدنی هێماناس و پرۆفیسۆری هارڤارد تێوەدەگلێ و لەگەڵ سۆفی نیڤوی پۆلیسی کۆدشکێن و نەوەی بەڕێوبەری کوژراو، دەکەونە نێو جەنگێکی سەدەها ساڵەی دەسەڵاتدارانی کریستیانی و مریدانی سایۆنەوە. ڕۆمانەکە لە ئامارێکی ساڵی ٢٠٠٩دا دەرکەوت کە ٨٠ ملیۆن دانەی لێ فرۆشراوە و وەرگێڕدراوەتە سەر ٤٤ زمان و لە ٢٠١٦شدا وەرگێڕدرایە سەر زمانی کوردی. لە ساڵی ٢٠٠٦یشدا فیلمێک بە هەمان ناو دەرکرا کە چیڕۆکەکەی لە کتێبەکە وەرگیراوە و لە نواندنی ئەکتەری ناودار تۆم هانکسە.

چیڕۆکی ڕۆمانەکە[دەستکاری]

ئەمجارەیان ڕۆبەرت لانگدن لە فەڕەنسا دەدۆزینەوە. لەخۆوە و لەوگۆڕە چاوش دێنە دووی و گاسی دەکەن بۆ ئەوەی ڕوودانی کوشتنی بەڕێوبەری مۆزەی لۆڤەر ببینێ و هۆکارەکەی دیاریبکا. لەوێوە، ئافرەتێکی بلیمەت دەناسێ بەناوی سۆفی نیڤو کە پۆلیسێکی کۆدەشکێنە و لە هەمانکاتدا نەوەی بەڕێوبەری کوژراوە. بێ ئەوەی بیانەوێ زنجیرەیەک ڕووداوی تراژیدی و ناخۆش دێتە ڕێیان و ئەوانیش بەخۆیان و مێشکە بلیمەتەکانیانەوە چارەسەر دەدۆزنەوە. هەتاوەکو ئەوەیان بۆ دەردەکەوێ کە کەوتوونەتە نێو گێژاوێکی زۆر قووڵ. گێژاوی جەنگێکی مێژوویی. جەنگێک کە سەدان ساڵە بوونی هەیە و هەتا ئێستاکەش کۆتایی نەهاتووە. جەنگێک لە نێوان دەسەڵاتدارانی مەسیحی و مریدانی سایۆنەوە. مریدانی سایۆن ئەو دەستەیەی کە سەدان ساڵە دامەزراوە و پارێزگاری لە نهێنییەکی زۆر گرنگ دەکەن. لانگدنیش، بە یارمەتی سۆفی و کۆنە هاوڕێی سێر لای تیبینگ، لە ڕێی چەند تابلۆیەکی داڤینشییەوە دەبێ ئەو نهێنییە بدۆزنەوە، بەڵام چەندین لەمپەر دەکەوێتە پێشیان. لە ڕێگەی ئەم ڕۆمانە و بە درێژایی چیڕۆکەکە ئاشنای چەندین ڕووداوی مێژووی دەبین. ماری ماجدەلینا کێیە؟ ئایا عیسا کوڕی خوابوو، یان مرۆڤێکی ئاسایی؟ ئایا عیسا هاوسەرگیری کرد و منداڵی هەبوون؟ وەڵامی هەموو ئەم پرسیارانە لە خوێندنەوەی ڕۆمانەکە دەستدەکەون. دین چییە، ئەرێ پێش سەرهەڵدانی ئەو سێ دینە بەربڵاوەی جیهان (جولەکایەتی، کریستیانێتی، ئیسلام) ئاین چ شەقڵێکی بەخۆیەوە گرتبوو، لە دینە سەرەتاییەکاندا چی بە چەق، بە کرۆک و ماک دادەندرا؟ ڕۆڵی ژن، وەک مێینە، وەک شتێک توانای ئافەریدەکردنی شتی دیکەی هەبێ، چۆن بیندراوە؟ ئایا لەبەر سەرهەڵدانی دەسەڵاتی پیاوسالاری لە ڕێی هەر سێ دینەکانە، لەبەر سەرکوتکردن، گرتن، ڕاوەدوونان، کوشتن و سوتاندن. بیرمەندان، هونەرمەندان، ئەندازایاریان پەنایان نەبردۆتە بەر نیشانە و هێما کۆنەکان و لەگەڵ هی ئەمڕۆیان تێهەڵکێش کردبێ؟ شتێک تامی هەردوو بەرەکەی لێبێ؟ کۆدەکەی داڤینشی لەڕێی ئەو کۆدانەوە، یەک بەیەکی مەتەڵەکان هەڵدێنێ، بۆ ئەوەی ژیانی عیسای مەسیح وەک مرۆڤێکی ئاسایی نیشان بدا، بۆئەوەی مەزنێتی ئەو پیاوە و ڕۆڵی مێژووینی خۆی بخاتەوە چوارچێوە سروشتییەکە، بۆئەوەی ئەو ئاکارە خوایەتییە و ئاسمانییەی لێدابماڵێ و ئینجیلەکان بە دەستکردی مرۆڤ بزانێت و لەوێشەوە پەلوپۆ بۆ سەرجەم دیینەکان بهاوێژێ. یان بە واتایەکی دیکە پێوەری بە مرۆڤایەتیکردنی دیین و پێغەمبەرەکانیان دابڕێژێتەوە و بیانخاتەوە سەر ڕێڕەوە ڕاستەقینە مێژووینەکەی خۆیان، نەوەک ئەو تێگەیشتنە لە ئاوەز بەدەرەی کە پێی دەگوترێ ئیمان.

بە کوردی[دەستکاری]

ڕۆمانەکە لە ٢٠١٦دا لەلایەن شەفیقی حاجی خدرەوە لە ئینگلیزییەوە وەرگێڕدرایە سەر کوردی و ناوەندی ئاوێر چاپ و بڵاوی کردۆتەوە.

سەرچاوەکان[دەستکاری]

  • وەرگێڕی کتێبەکە.
  • چاپی وەرگێڕدراوی کوردی.
  • ویکی ئینگلیزی.