میر (کتێب)

لە ئینسایکڵۆپیدیای ئازادی ویکیپیدیاوە
باز بدە بۆ: ڕێدۆزی، گەڕان
«میر»، چاپی 1532

کتێبی «میر» Il principe شابەرهەمی مەکیاڤێللی (Niccolò Machiavelli (1469-1527 بیرمەند و مێژوونووسی ئیتالییە، ساڵی ١٥١٣ نووسیویەتی بەڵام ١٥٣٢ ئەوجا بڵاو کرایەوە.

لە «میر» دا نووسەر بە وردی خەتوخالی فەرمانڕەوایی دادەڕێژێت، شاڕێی هەم سەرکەوتن و هەم شکەستی فەرمانڕەوایەتی پیشان دەدات. لەم بوارەدا «میر» بە شرۆڤەکارییەوە دەربارەی هێز و هۆکاری ملکەچبوونی خەلک بۆ دەسەڵات دەدوێ و بۆ دەسەڵاتیشی ڕوون دەکاتەوە چۆن ئەو ملکەچییەی میللەت دابین بکەن.

مەکیاڤێللی لەم بەرهەمەدا پەنا دەباتە بەر نموونەی مێژووکرد، هەم کۆن و هەم هاوچەرخ، بۆ نەخشاندنی تابلۆی میری نموونەیی: میر دەبێ دڕندە بێت بەڵام تەنها ئەو کاتەی هیچ چارەیەکی دیکەی نییە، بەڵام هەرگیز نابێت میهرەبانی و بەخشەندەیی خۆی لەدەست بدات.[١]


نموونەی مێژووکرد[دەستکاری]

«میر» لە چاپتەری چوارەمدا، بەدەم ڕوون کردنەوەی هونەری فەرمانڕەوایی، ئاماژە بە سێ نموونە دەکات دووانیان پەیوەندی بە دونیای کوردستانەوە هەیە. سەردێڕی چاپتەری چوارەمی «میر» دەڵێ‌‌: [٢]


«هۆکار چییە وەڵاتی داریۆش، کە ئەسکەندەر داگیری کردبوو، پاش مردنی ئەسکەندەر، بەڕووی جێنشینەکانیدا ڕانەپەڕی؟». [٣]


دوو جۆر فەرمانڕەوایی[دەستکاری]

لێرەدا مەکیاڤێللی بۆ شرۆڤەی ئەم دیاردەی نەبزاوتنی میللەتی داگیرکراو، دیدی خۆی بەم جۆرە ڕوون دەکاتەوە: بەگشتی دوو جۆر فەرمانڕەوایی هەیە:

- جۆری یەکەم: بریتییە لەوەی میر تاکڕەوانە فەرمانڕەوایی میللەتێکی ژێردەستە دەکات و بۆ جێبەجێ کردنی ئەم ئەرکەش میر خۆی چەند وەزیر و فەرمانبەرێک دیاری دەکات.

داگیر کردنی وەڵاتێک خاوەن فەرمانڕەوایی جۆری یەکەم، کارێکی سەختە چونکە گشت پێگەداری ئەو وەڵاتە کەسانی فەرمانبەرن و گوێڕایەڵی میرن. بەڵام پاش لەنێو بردنی ئەو میرە و داگیر کردنی وەڵات، خۆسەپاندن و بەردەوامبوونی دەسەڵاتی نوێ ئاسانە دیسان چونکە وەڵات کەسی دیکەی تێدا نییە شکۆمەند و سەردار.


- جۆری دووەم: میر لە ڕێی چەند سەردارێکی شکۆمەندەوە فەرمانڕەوایی دەکات کە سەرچاوەی پێگەیان ناگەڕێتەوە بۆ خێری میر بەڵکوو بۆ خودی خۆیان. ئەم سەردارانە خاوەن بنگە و پەیڕەوانی وەهان خۆڕسکانە سەردارەتیان لێ دەسەلمێنن.

جۆری دووەم داگیر کردنی ئاسانە چونکە سەردارانی جودا، خاوەنی بەرژەوەندی و خواستی جودان و دەکرێ دۆست و لایەنگیریان لە نێودا پەیدا بکەیت. بەڵام پاش داگیر کردن، خۆسەپاندن و بەردەوامبوون کارێکی سەختە، چونکە سەرداری خاوەن شکۆ، هەڵوێست، ویست و خواستی خۆی هەیە، چ هاوکار بووبێت لە نەمانی دەسەڵاتی کۆندا، چ نەیار. بنەبڕ کردنی دەسەڵاتداری کۆنیش سوودی نییە، چونکە هەر سەردارێک بۆ خۆی سەروەرە.


دارای هەخامەنشی[دەستکاری]

بۆ باشتر ڕوون کردنەوەی ئەم بۆچوونە، مێکیاڤێللی دێت فەرمانڕەوایی «دارای هەخامەنشی» دەکاتە سەرەباس. بە کوشتنی دارا، سەرلەبەری وەڵات بۆ ئەسکەندەر و پاشان بۆ جێنشینانی ئەسکەندەر تەخت دەبێت. دارای هەخامەنشی لە فەرمانڕەوایی خۆیدا کارێکی نەکردبوو میللەت لە داگیرکەری نوێ ڕاپەڕن، پێگەداری سەروەری تێدا نەهێشتبوو.

مەکیاڤێللی بەدەم شرۆڤەکارییەوە دەوڵەتی تورک - مەبەست دەوڵەتی عوسمانییە بەڵام مەکیاڤێللی هەر بە تورک ناوی دەبات- دەکاتە نموونەیەک لە جۆری یەکەمی فەرمانڕەوایی، واتە خونکاری تاکڕەو و فەرمانبەری نۆکەر. بۆ جۆری دووەم - واتە فەرمانڕەوایی میر و دەستەی سەرداران - پەنا دەباتە بەر وەڵاتی فرانسەی ئەو دەمە.

سوڵتانی عوسمانی[دەستکاری]

سوڵتانی عوسمانی وەڵاتەکەی کردۆتە چەندین «سەنجەق» و هەریەکەیانی داوەتە دەست فەرمانبەرێکی گوێڕایەڵ و خزمەتچیی خۆی. زاڵبوون بەسەر ئەمانەدا سەختە چونکە گشتیان بە یەک فەرمان و یەک ئاڕاستە دەبزوێن. بەڵام پاش بنەبڕ کردنی بنەماڵەی سوڵتان، فەرمانبەری کۆیلە ویست و توانای ڕاپەڕینی نییە. گەر دەسەڵاتی کۆن ڕما، بە ئاسانی جڵەوی دەکێشرێت.


فەرمانڕەوایی فرانسە[دەستکاری]

وەڵاتانی وەک فرانسە سازمانیان جودایە. بە ئاسانی دەگیرێن، چونکە سەرداری دەسەڵاتداری زۆرن، بەڵام پاش داگیر کردن دەسەڵات جێگیر نابێت چونکە هەر یەک لەم سەردارانە داکۆکی لە ویست و بەرژەوەندیی خۆی دەکات. ڕاپەڕینی بەردەوامی فرانسە، سپانیا و یۆنان بەرانبەر ڕۆمانییەکان دەگەڕێتەوە بۆ هەموو ئەو میرنشینانەی لەو وەڵاتانەدا هەبوون.


پەراوێز[دەستکاری]

  1. ^ Nationalencyklopedin[بەستەری مردوو]
  2. ^ «سازمانگەری» ٢٠٠-٢٠٢
  3. ^ Machiavelli, Niccolò. Fursten. Natur & Kultur. 2009: 59


سەرچاوە[دەستکاری]

Nationalencyklopedin

«سازمانگەری»

[Machiavelli, Niccolò. Fursten. Natur & Kultur. 2009]

به‌سته‌ری ده‌ره‌کی‌[دەستکاری]

Machiavelli[بەستەری مردوو][بەستەری مردوو]


[The Prince by Niccolò Machiavelli Project Gutenberg]