| کوردینە تا کەی ئێمە لە کێوان میسالی دێو | | بێین و بچین و بۆ مە نەبێ قەت خودان و خێو؟ |
| خەڵکی ھەموو لە باغ و لە شارانە کەیف خۆش | | ئێمەش بڵاو و بێسەرە ماوین لە دەشت و کێو |
| بۆ ئاسمان دەڕۆن و لە بەحرا دەکەن سەفەر | | ھەر عەرزە نیشتگاھی مە، سەنعاتە وەردو شێو |
| ڕێی وانە کەھکەشان و ڕێی ئێمە بەردەڵان | | جێی وانە تەخت و بەخت و جێی ئێمە بەرد و چێو |
| ڕەشماڵە ماڵ و کەشک و پەنیرە مەتاعی مە | | قەسر و سەرای خەڵکی دییە پڕ لە زێڕ و زێو |
| لا ھەڵدڕاو و جەرگ بڕاو و فڕێدراو | | بێ شوێن و بێ نیشان، پەرێشانن و پەشێو |
| فیکرێ لە کاری خۆ کەن و بگرین بە حاڵی خۆو | | ھەر بێ سەری و عەداوەتی خۆتانە دێتە ڕێو |
| ژێردەستی و ئیتاعەتی بێگانە تا بەکەی؟ | | شەرمە لەبۆمە ھێندە ژیان بێ نیشان و نێو |
| مەغبوونی ھەر موعامەلە، مەحکومی ھەر کەمێک | | شاھان بە مەحوی ئێمە دەبەستن گرێ و گرێو |
| گوردانی کوردەکان! بە خودا ڕۆژی ڕۆژی غیرەتە | | دەست دەینە خەنجەران و پیاوانە بێینە نێو |
| ھەر کەس کە بیری تۆڵە و جێی بابی خۆی نەبێ | | ئەو بێ بەشە لە کوردی، دەریکەن نەیێتە دێو |
| بۆچمانە ماڵ و سەر کە لەسەر سەروەری نەچێ؟ | | کوڕ نابێ قەت بترسێ لە زیندان و دار و چێو |
| پێ ھەڵگرن بگەینێ، کە شەڕ، بۆمە شایییە | | دەست تێکگرن، درەنگە، جحێڵانە بچنە نێو |
| چون دوژمنن لەگەڵ یەک و بێ دەرس و مەدرەسەن | | ڕاوو و دەدەن بە جارێ، لە ھەورازێ بۆ نشێو |
| ئەو ژینی بەو ڕەزاڵەتە بۆ چیتە چاوەکەم؟ | | بپسێین لە ڕێی نەجاتی وەتەن با بە نێر و مێو |
| سەرچوونی تەختی، ڕۆینی سەرداری پێ دەوێ | | خۆشیمە بەو شەھادەتی شێخانە نێو بەنێو |
| کوان گوردی کوردەکان، کە لە ترسیان دەلەرزی عەرز؟ | | کێ بوو لە شام شا بوو، لە میسرێ ببوو خەدێو؟ |
| ئازادی، سەربەخۆیی، میری و گەورەیی | | داوا بکەن بە زار و زمان و ددان و لێو |
| تا کەی لە باغی خەڵکی بە زیزی و بە مل کەچی | | خۆشە لە باغی عێلی چیننی ھەنار و سێو |
| بۆ وانە ھەر چی جوانە لە جێ و دێ و لە ژن، لە ماڵ | | ھەر شاخ و داخە بۆمە، کوڕی ڕەش، کچی دزێو |
| ھەر میللەتێ لە لاوە حەقی خۆی بەدەستەوە | | کوردێ کە سەر ھەڵێنێ، دەڵێن بۆتە سەربزێو |
| ھەر چی دەبێ، بڵا ببێ، قسەی حەق "حەسەن" دەڵێ | | نیمە لە ڕێی وەتەن غەمی دەرکردن و جنێو |
