غەفوور ڕەشید داراغا
غەفوور ڕەشید داراغا :(١٩٢٣-١٩٧٩) چالاكی سیاسی، بازرگان ، نووسەر و شاعیر
سەرەتای ژیان و خوێندنی[دەستکاری]
غەفوور کوڕی ڕەشید کوڕی مەحموود و لە بنەماڵەی ئەوڵاغای داراغایە، بنەماڵانەی دێی دەرگەزێن ی لای ھەمەدانە کە سەردەمی قاجاری کۆچیان کردووە بۆ ناوچەی سلێمانی و دێی (داراغا)یان لە باشووری ڕۆژئاوای سلێمانی ئاوەدان کردووەتەوە، ئیدی ئەو ناوەیان بەسەردا بڕاوە. باووباپیرانی بە کشتوکاڵ و مەڕدارییەوە خەریک بوون، پاشان ھاتوونەتە سلێمانی. ساڵی ١٩٢٣ لە گەڕەکی دەرگەزێن ی شاری سلێمانی لەناو خێزانێکی کەم دەرامەتدا لەدایک بووە. سێ ساڵان بووە کە دایکی مردووە، پوور و مامی بەخێکردنییان گرتووەتە ئەستۆ. ١٩٣١ خراوەتە حوجرە بۆ خوێندن. ١٩٣٦ لە پۆلی دووەمی قوتابخانەی سەرەتاییی ئەییووبییە وەرگیراوە. ١٩٤٦ دواناوەندیی بڕیوە و چوووەتە (خانەی بەرزی مامۆستایان) لە بەغدا.[١][٢]
زیندانی كردنی[دەستکاری]
کە پۆلی دووەمی بڕیوە، ١٩٤٨ لەبەر چالاکیی سیاسیی ساڵێک لە خوێندن دەرکراوە و بۆی تەواونەکراوە. ئەوەبەدوایش کە دەستی داوەتە کاسبی و بازرگانی، چەند جارێک لەبەر کاری سیاسی خراوەتە بەندیخانە.[١][٢]
نەقلییاتی گۆیژە[دەستکاری]
سەرەتا (نەقلییاتی گۆیژە)ی لە بەردەرکی سەرا لەگەڵ عومەری حاجی فەتاح کردووەتەوە و چەند ساڵێک پێیەوە خەریک بووە. پاشان بووە بە کاتب لای وەستای ئەرمەن "گەرەبێت نەعلبەندییان"، کە ئەو دەمە ڕێی سلێمانی- ھەڵەبجەی قیرتاو کردووە. ١٩٥٩ بووە بە ھاوبەشی کارەکەی وەستا گەرەبێت و لە ماوەی چەند ساڵێکی دیکەدا بووەتە برکاری تراکتۆر و تایە و پاتری و ئامێری ئەلەکتریکی و تاسەر ژیانیی پێ بەڕێوەبردووە.[١][٢]
پارتی دیموکراتی کوردستان[دەستکاری]
پاش ١٤/٧/١٩٥٨ کە مۆڵەتی کارکردن دراوە بە (پارتی دیموکراتی کوردستان)، وەک کادرێکی پێشکەوتوو سەرقاڵی حیزبایەتی بووە و پلەکەی گەیشتووەتە ئەندامی لیژنەی ناوچە.
نووسین و شعرەكانی[دەستکاری]
غەفوور ڕەشید لە لاوێتیدا شیعری نووسیوە و نووسەرێکی چالاک بووە، عەرەبی و فارسی و تورکی و ئینگلیزیی زانیون،[١][٢]
بە نووسین بەشداریی لە گۆڤارەکانی :[١][٢]
ھەبووە و جگە لە ناوی ئاشکرای خۆی، بە ناوەکانی (غەفوور، غ. ر، باوکی زەردەشت، خەپە، کرمانج، خلە، کوێستانی، شەفەق، ..)ەوە پێی بڵاوکردووەتەوە. ئەندامی (یەکێتیی نووسەرانی کورد)یش بووە. گەلێک بەرھەمی خۆیشی بە نیوەناچڵی و دەستلێنھدراوی لێ بەجێماوە.[١][٢]
بەرھەمی بڵاوکراوەی بە کتێب:
- ئەحەی ناسری ھونەرمەند، چاپخانەی کامەرانی- سلێمانی، ١٩٧١ .[١][٢]
یەکێتیی لاوانی دیموکراتی عیراق[دەستکاری]
ڕۆشنبیرێکی کوردپەروەریش بووە، چەند جارێک لەبەر جموجووڵی سیاسی گیراوە و دوورخراوەتەوە، لەوانە لە ڕەشبگیرەکەی ١٩٦٣دا چەند مانگێک زیندان کراوە. ١/٦/١٩٥٩ ھەڵبژێردراوە بۆ دەستەی دامەزرێنی یەکێتیی لاوانی دیموکراتی عیراق.[١][٢]
ژیانی هاوسەرگیریی[دەستکاری]
غەفوور ڕەشید، ڕۆژی ٢/٢/١٩٥٦ لەگەڵ سەبیحە ئەحمەد ساڵح خێزانی پێک ھێناوە و چوار کچ و سێ کوڕی لێ بووە.[١][٢]
كۆچی دوایی[دەستکاری]
ھەر لە لاویشەوە تەندروستیی باش نەبووە، تا ڕۆژی ٢/١٢/١٩٧٩ بە نەخۆشی کۆچی دواییی کردووە.[١][٢]
ئەلبوومی وێنەكانی[دەستکاری]
-
گەڕەکی وەزیرییە، بەغدا ، ٢. غەفوور ڕەشید داراغا -
باخێکی گەڕەکی وەزیرییە، بەغدا، ١٩٤٧/١٢/١٣ ، ٢. غەفوور ڕەشید داراغا -
گەڕەکی وەزیرییە، بەغدا، ١٩٤٦/١٢/١٤ ، ٧. غەفوور ڕەشید داراغا -
بەهاری ١٩٧٦ ، ٢. غەفوور ڕەشید داراغا -
یه‌كه‌م هه‌ڵبژارده‌ی یه كێتی نوسه‌رانی كورد لقی سلێمانی ، ڕیزی پێشەوە: ٤. غەفوور ڕەشید داراغا
سەرچاوەکان[دەستکاری]
- ^ ئ ا ب پ ت ج چ ح خ د گۆڤاری گەلاوێژ (بەرگی یازدەهەم / بەشی یەكەم ) ژیاننامە و پێڕست ، ئامادەكردنی ( سدیق ساڵح ، ڕەفیق ساڵح ، عبدوڵڵا زەنگەنە ) لە بڵاوكراوەكانی بنكەی ژین بۆ بووژاندنەوەی كەلەپووری و بەڵگەنامەیی و ڕۆژنامەوانیی كوردی .ل 8147-8148
- ^ ئ ا ب پ ت ج چ ح خ د غفور رشید داراغا، ئەحەی ناسری ھونەرمەند، چاپخانەی کامەرانی- سلێمانی، ل٥-٧؛ مارف ناسراو، غەفوور رەشید داراغا پیاوی نووسەر و تێکۆشەر و ناسراوی شار ١٩٢٣-١٩٧٦)، گۆڤاری "سلێمانی"، ژمارە ٥٩، حوزەیرانی ٢٠٠٥، ل٥٢؛ سێ لاپەڕەی ژیاننامەکەی، ئامادەکراوی بەڕێز میر ئاکۆ عەلیی کچەزای.