سیبیریا

لە ئینسایکڵۆپیدیای ئازادی ویکیپیدیاوە
سیبیریا

سیبیریا ناوچەیەکی جوگرافی فراوانە، ھەموو باکووری ئاسیا پێکدەھێنێت، لە چیاکانی ئۆڕاڵ لە ڕۆژاوا تا ئۆقیانووسی ئارام لە ڕۆژھەڵات.[١] لە نیوەی کۆتایی سەدەی شازدەھەمەوە بەشێکە لە ڕووسیا، دوای ئەوەی ڕووسەکان زەوییەکانیان لە ڕۆژھەڵاتی چیای ئۆرال داگیرکرد. سیبیریا فراوانە و دانیشتووانێکی کەمی تێدایە، ڕووبەرەکەی زیاتر لە ١٣٫١ ملیۆن کیلۆمەتر چوارگۆشەیە (٥١٠٠ ھەزار میل چوارگۆشە)، بەڵام تەنیا یەک لەسەر پێنجی دانیشتووانی ڕووسیای تێدایە. نۆڤۆسیبیرسک و ئۆمسک گەورەترین شارەکانی ناوچەکەن.

بەھۆی ئەوەی سیبیریا ناوچەیەکی جوگرافی و مێژوویییە و قەوارەیەکی سیاسی نییە، تاکە پێناسەیەکی ورد بۆ سنوورە خاکییەکانی نییە. بە شێوەیەکی نەریتی، سیبیریا بەرەو ڕۆژھەڵات لە چیای ئۆراڵەوە تا زەریای ھێمن درێژ دەبێتەوە، و زۆربەی حەوزی ئاوەڕۆی زەریای جەمسەری باکوور دەگرێتەوە. ڕووباری یەنیسی سیبیریا بەسەر دوو بەشدا دابەش دەکات، ڕۆژاوایی و ڕۆژھەڵات. سیبیریا لە زەریای جەمسەری باکوورەوە بەرەو باشوور درێژ دەبێتەوە تا گردەکانی باکووری ناوەڕاستی کازاخستان و تا بەشەکانی باکووری مەنگۆلیا و چین.[٢][٣][١] بەشی ناوەڕاستی سیبیریا (ناوچە ئابوورییەکانی ڕۆژاوا و ڕۆژھەڵاتی سیبیریا) بە بەشێکی ناوەکی ناوچەکە لە یەکێتی سۆڤیەت دادەنرا. لە دەرەوەی ناوەکی سیبیریا، بەشی ڕۆژاوای سیبیریا ھەندێک خاکی ناوچەی ئۆرال لەخۆدەگرێت و بەشی ڕۆژھەڵاتی دوور لە مێژوودا بە ڕۆژھەڵاتی دووری ڕووسیا ناوزەد کراوە.[١]

سیبیریا بە پلەی یەکەم بە زستانە درێژ و سەختەکانی لە سەرانسەری جیھاندا ناسراوە، کە تێکڕای پلەی گەرمی لە مانگی یەکدا -٢٥ پلەی سەدییە.[٤] لە ڕووی جوگرافییەوە لە ئاسیا ھەڵکەوتووە؛ بەڵام بەھۆی ئەوەی کە کۆلۆنی کراوە و لە ڕووسیا جێگیر کراوە، لە ڕووی کولتووری و سیاسییەوە بەشێکە لە ئەورووپا.[٥] کاریگەرییە کولتوورییەکانی ئەورووپا، بە تایبەتی ڕووسی، لە سەرانسەری ناوچەکەدا زاڵن، بەھۆی ئەوەی لە سەدەی ١٦ەوە کۆچی ڕووسی لە ئەورووپاوە ھەبووە، کە گرووپی ژێر نەتەوەیی ڕووسی سیبیریای پێکھێناوە.[٥] زیاتر لە ٨٥٪ی دانیشتووانی ناوچەکە بە ڕەچەڵەک ئەورووپین.[٦][٧]

سەرچاوەکان[دەستکاری]

  1. ^ ئ ا ب "Siberia". Encyclopædia Britannica Online. Retrieved 2021-09-22.
  2. ^ Сибирь — Большая советская энциклопедия (The Great Soviet Encyclopedia, in Russian)
  3. ^ Сибирь- Словарь современных географических названий (in Russian)
  4. ^ "Arctic Oscillation and Polar Vortex Analysis and Forecasts". Atmospheric and Environmental Research, Verisk Analytics. Retrieved 20 May 2018.
  5. ^ ئ ا Haywood, A. J. (2010). Siberia: A Cultural History. Oxford University Press. ISBN 978-0-19-975418-2.
  6. ^ "ВПН-2010". Perepis-2010.ru (بە ڕووسی). Archived from the original on 2012-01-18. Retrieved 2016-04-03. ١٨ی کانوونی دووەمی ٢٠١٢ لە وەیبەک مەشین، ئەرشیڤ کراوە.
  7. ^ "ВПН-2010". Gks.ru (بە ڕووسی). Retrieved 2016-04-03. ١٥ی ئازاری ٢٠١٣ لە وەیبەک مەشین، ئەرشیڤ کراوە.