بێرنی ساندەرس

بێرنارد ساندەرس

بێرنارد ساندەرس (لەدایکبووی ٨ی ئەیلوولی ١٩٤١) سیاسەتمەدارێکی ئەمەریکیە کەوا وەک سیناتۆری ڤێرمۆنت کاری دەکات لەوەتەی ساڵی ٢٠٠٧ەوە. ساندەرس لە ھەریەک لە ھەڵبژاردنەکانی ٢٠١٦ و ٢٠٢٠ی سەرۆکایەتی ئەمریکا خۆ پاڵاوتووە بۆ سەرۆکایەتی. ساندەرس لە زاری خۆیەوە خۆی بە کەسێکی دیموکراتی سۆشیالیست و چاکساز دەناسێنێ، و ھەروەھا بە یەکێک لەو کەسانە دەناسرێت کە ھەوڵی زۆری بۆ ھێنانەدی یەکسانی ئابووری داوە. لەڕووی سیاسەتی ناوخۆوە، ئەو بەشێوەیەکی چر پشتگیری لە مافی کرێکاران، بەخۆڕایی کردنی زانکۆکان، و دابینکردنی چارەسەری تەندروستی خۆڕایی کردودوە. لەڕووی سیاسەتی دەرەوەوە، ساندەرس داوای کەمکردنەوەی خەرجیە سەربازیەکانی ئەمریکا دەکات، و داواکارە کەوا ئەمریکا بەشداربێت لە ڕێکەوتنە نێودەوڵەتیەکانی تایبەت بە کەمکردنەوەی بەکارھێنانی زۆری کاربۆن و پاراستنی ژینگە.

ساندەرس لە بڕوکلین، نیویۆڕک لەدایکبووە و گەورە بووە، و دەرچووی زانکۆی شیکاگۆی ساڵی ١٩٦٤ە. ئەوکاتەی قوتابی زانکۆ بووە، ساندەرس بەشداربووە لە چەندین خۆپیشاندنی جیاوازی تایبەت بە مافی ڕەشپێستەکان. دوای نیشتەجێبوونی لە ڤێرمۆنت، بووە پارێزگاری بێرلینگتن لەنێوەندی حەفتاکان، و بۆ سێ جاری تری دەرچوویەوە. دواتر لە ساڵی ١٩٩٠، لە دەنگدانی تایبەت بە ئەنجومەنی پیران توانی دەنگی زۆرینەی ڤێرمۆنگت بەدەستبێنێ بۆ نوێنەرایەتی کردنیان، و لەوکاتەوە بەردەوامە.

لە نیسانی ٢٠١٥دا، ساندەرس ڕایگەیاند کەوا خۆی پاڵاوتووە بۆ سەرۆکایەتی ٢٠١٦ی ئەمریکا. سەرەڕای ئەوەی چاوەڕوانی بەدەستھێنانی دەنگێکی کەمی لێدەکرا، توانی ٤٣٪ی دەنگی دیموکراتەکان بەدەستبێنێ بەرامبەر ٥٥٪ی دەنگەکانی ھیلاری کلینتن، و سەرکەوتوو نەبوو لە بوونە نوێنەری سەرەکی ھەڵبژاردنەکە، بەڵام پشتگیری خۆی بۆ ھیلاری دووپات کردەوە دژی دۆناڵد تڕەمپ و داوای لە لایەنگرانی کرد کەوا درێژەبدەن بە «شۆڕشە سیاسیەکە». لە شوباتی ٢٠١٩شدا، ساندەرس ڕایگەیاند کەوا دووبارە خۆی بۆ سەرۆکایەتی ئەمریکا دەپاڵێوێت.

سەرچاوەکان

https://en.wikipedia.org/wiki/Bernie_Sanders