ئێبی

ئێبی
لەدایکبوون	ئیبراھیم حامیدی  ١٩ی حوزەیرانی ١٩٤٩  (تەمەن ٧٧ ساڵ) تاران
پیشە	گۆرانیبێژ، گۆرانینووس، مۆسیقاژەن
شێواز	مۆسیقای پۆپ
وێبگە	http://www.ebihamedi.com/، https://naslemusic.com/tag/دانلود-جدیدترین-آهنگ-ها

ئیبراھیم حامیدی (بە فارسی: ابراهیم حامدی؛ لەدایکبووی ١٩ی حوزەیرانی ١٩٤٩) ناسراو بە ئێبی (بە فارسی: اِبی) گۆرانیبێژێکی پۆپی ئێرانییە. ئەو لە جۆرەکانی ڕۆک، فۆڵک، پۆپ، سەما، ھاوس و ترانسدا شارەزایی ھەیە.

ژیانی سەرەتایی

باوکی ئیبی خەڵکی ئەراک بوو و دایکی خەڵکی کەرەج بوو. ئەو گەورەترینی شەش خوشک و برا یە کە لە خوڕەمدەرە لەدایکبووە.

لە چاوپێکەوتنێکدا لەگەڵ ڕادیۆ زەمانە لە ساڵی ٢٠٠٨دا، ئیبی گوتی کە خولیای گۆرانیگوتن بووە و بۆ خەڵکی لە ماڵەوە، ھاوپۆلەکانی و منداڵانی گەڕەکەکەی گۆرانیی گوتووە. ھەروەھا باسی لەوەش کرد کە لە گەنجیدا بە خوێندنی قورئان، دەستی بە کارامەییەکانی شێوازی گۆرانیگوتن کردووە.

ژیانی پیشەیی

ئیبی لە گرووپی بلاک کاتس (دەیەی ١٩٦٠ەکان)

بە ئیلھاموەرگرتن لە بیتڵز، لە ناوەڕاستی دەیەی ١٩٦٠دا گرووپێکی مۆسیقای بێتی بە ناوی «ڕێبڵز» لەگەڵ شەھرام شەبپەرە و سیاوەش قومەیشی پێکھێنا. ھەروەھا پێش ئەوەی دەست بە کاروانی ھونەریی خۆی وەک گۆرانیبێژێکی تاکەکەسی بکات، ئەندامی گرووپەکانی «سانبۆیز» و بلاک کاتس بووە.

لە ساڵی ١٩٧٧دا، پێش شۆڕشی ئیسلامی لە ساڵی ١٩٧٩، ئێرانی بۆ گەشتێکی ھونەری بەرەو ویلایەتە یەکگرتووەکان بەجێھێشت و دوای شۆڕش لەوێ مایەوە.

لە ساڵی ١٩٩٠دا، ئەلبوومی ھاوبەشی «نوون و پەنیر و سەبزی» لەگەڵ داریوش بڵاوکردەوە. لە ھەمان ساڵدا، کۆنسێرتێکی ھاوبەشی لەگەڵ داریوش لە یۆنیڤێرساڵ ئەمفیتیاتەر سازکرد.

گۆرانیی «خەلیجی ھەمیشەگیی فارس» (کەنداوی فارس بۆ ھەمیشە) یەکێکە لە بەناوبانگترین گۆرانییەکانی ئیبی، تێکستی ئەم گۆرانییە لە نووسینی عادل حەسەنییە و ئاوازدانەری ئەم گۆرانییەش محەممەد شەمسە. ناوی ئەلبوومی خەلیج بەھۆی ئەم گۆرانییەوەیە. ئیبی ڕای گەیاند کە ئەم گۆرانییە یەکێکە لەو کەمە گۆرانییانەی کە شانازی بە پێشکەشکردنیانەوە دەکات.

لە ساڵی ١٩٩٥دا، ئیبی ئەلبوومی «ستارەھای سەربی» بە تێکستی ئێرەج جەنەتی عەتایی و ئاوازی سیاوەش قومەیشی بڵاوکردەوە. لە بەرنامەی «باشترینی باشترینەکان»ی منوتۆدا، کە ٢٠ باشترین گۆرانیی ئیبی بەپێی ھەڵبژاردنی خەڵک پیشان دەدا، گۆرانیی «کی ئەشکاتو پاک میکونی» و «ستارەھای سەربی» بەدوای یەکدا پلەی یەکەم و دووەمیان بەدەستھێنا، و ھەردوو گۆرانییەکە لەم ئەلبوومەن. ھەروەھا گۆرانیی «قیبلە» لەم ئەلبوومە لە پلەی ١٧ەمدا بوو.

لەنێوان گۆرانییە «ڕامیارییە» بەھێزەکانیدا، گۆرانیی «ھەڵا» (١٩٩٩) ھەیە کە لە نووسینی شاعیری ئێرانی مینا ئەسەدی و بەرھەمھێنانی ئەسفەندیار مۆنفەردزادەیە. لە چاوپێکەوتنێکدا لە ساڵی ٢٠١٣ لەگەڵ کەناڵی تەلەڤیزیۆنیی منوتۆ، ئەم گۆرانییەی بە گرنگترین گۆرانیی ڕامیاریی خۆی ناوبرد.

لە ساڵی ٢٠٠٩دا، ئیبی جارێکی دیکە سەرنجی خستە سەر ڕامیاریی ناوخۆی ئێران بە گوتنی گۆرانیی تەسمیم (بڕیار) وەک وەڵامێک بۆ ھەڵبژاردنی سەرۆککۆماریی ساڵی ٢٠٠٩.

ئیبی لە چەندین گۆرانیدا ھاوکاریی لەگەڵ شادمێھر عەقیلی کردووە. لە ساڵی ٢٠١٢دا، گەشتێکی ھونەریی جیھانیی ھاوبەشی لەگەڵ شادمێھر بە ناوی «ڕۆیای ما» ئەنجامدا.

ئیبی گۆرانیی ھاوبەشی «نۆستالژیا»ی لەگەڵ گوگوش لە ڕێگەی ڕادیۆ جەوانەوە لە ساڵی ٢٠١٤دا بڵاوکردەوە. ئیبی و گوگوش گەشتی کۆنسێرتی جیھانیی ھاوبەشی خۆیان بە ناوی «نۆستالژیا» دەستپێکرد. گەشتەکە بە کۆنسێرتی دوبەی دەستیپێکرد.

ئەلبوومی «جانی جەوانی» (٢٠١٤)ی بڵاوکردەوە. ھەروەھا دەستی بە گەشتە جیھانییەکەی ئەم ئەلبوومە کرد.

ئیبی لە کاتی پێشکەشکردنی بەرھەم لە لاس ڤێگاس (٢٠٠٨)

ئیبی دوایین ئەلبوومی خۆی بە ناوی «لالەزار» لە ساڵی ٢٠١٩دا بڵاوکردەوە. گۆرانیی «کوچەی نەستەرەن» لەم ئەلبوومەدا، کە گۆرانییەکی ڕامیارییە و دەربارەی شەڕی ئێران و عێراقە، جێی مشتومڕ بوو.

لە ساڵی ٢٠٢٠دا، ئیبی لە بەرنامەی پێرشیاز گات تالێنتدا دەرکەوت.

ئیبی بەشداریی لە خۆپیشاندانەکانی دژی ئامادەبوونی ئیبراھیم ڕەئیسی لەبەردەم نەتەوە یەکگرتووەکاندا کرد و پشتگیریی لە خۆپیشاندانەکانی ئێران کرد.

لە ساڵی ٢٠٢٢دا، گەشتە نوێیەکەی جیھانیی خۆی بە ناوی «پڕۆژەی عەشق» دەستپێکرد. ئەم گەشتە بەھۆی کۆڤید-١٩ەوە دواخرا.

ژیانی تایبەتی

ئیبی سێ کچی لە ھاوسەری یەکەمی، فەیروزە میقدادی ھەیە. دوای ٢٥ ساڵ لە ھاوسەرگیری جیابوونەوە.

کاتەکانی خۆی لەنێوان ماربێیا لە ئیسپانیا و لۆس ئانجلەس لەگەڵ ھاوسەری دووەمی، مەھشید بۆروومەند دابەش دەکات. لە سەرەتای دەیەی ٢٠٠٠دا، لە سوێد دەژیا. ئیبی زڕکوڕێکی لە مەھشید ھەیە.

ئەلبووم

«ساڵەکان بە ڕۆژژمێری کۆچیی ھەتاوییە»

• تەپش (١٣٥٣)
• نازی ناز بکە (١٣٥٤)
• شەبزەدە (١٣٥٦)
• چیای یەخ (١٣٦٤)
• «نوون و پەنیر و سەبزی» (لەگەڵ داریوش) (١٣٦٥)
• غەریبە (١٣٦٨)
• خەلیج (١٣٦٩)
• موعەلیمی بەد (١٣٧١)
• ئەستێرەی کلکدار (١٣٧٢)
• ئەتەل مەتەل (١٣٧٣)
• ستارەھای سەربی (١٣٧٤)
• عەتری تۆ (١٣٧٥)
• لەگەڵ تۆ (١٣٧٥)
• تاجی تەرانە (١٣٧٦)
• پیر (١٣٧٨)
• ھەڵبێ (١٣٧٧)
• شەوی نیلووفەری (١٣٨٢)
• حەسرەتی پەرواز (١٣٨٥)
• «یادگاری» (لەگەڵ کامەران و ھومەن) (١٣٨٨)
• ھەستی تەنیایی (١٣٨٩)
• جانی جەوانی (١٣٩٣)
• لالەزار (١٣٩٨)

ڕیزبەندیی ئەلبوومەکان لەسەر بنەمای ساڵی بڵاوبوونەوەی سی دییەکانە.

ئیبی کە دوای بڵاوکردنەوەی ئەلبوومی شەوی نیلووفەری باسی لە خانەنشینبوونی خۆی کردبوو، تا ئێستاش لە بواری بەرھەمھێنانی ئەلبووم و سازکردنی کۆنسێرتدا بەھاندان و چالاکییەوە بەردەوامە. ئەو پێیوایە کە چوونەسەر شانۆ یان بڵاوکردنەوەی ئەلبووم، دەرفەتێکی فێربوونی پێ دەبەخشێت و دەبێتە ھۆی بەدەستھێنانی ئەزموونی زیاتر، و ئەمەش بە لای ئەوەوە باشترین پاڵنەر و ھاندەر بووە بۆ بەردەوامبوون لە کارەکەیدا. ئەو گۆرانیگوتن بە عەشقێک دەزانێت کە ھەرگیز لێی جیا نابێتەوە.

بەستەرە دەرەکییەکان

• وێبگەی فەرمی
• ئێبی لە ئینستاگرام
• ئێبی لە فەیسبووک
• ئێبی لە تویتەر
• ئێبی لە بنکەدراوەی ئینتەرنێتیی فیلمەکان
• ئێبی لە سپاتیفای