ئاڵوگۆڕی بەندکراوانی ڕووسی (٢٠٢٤)

لە ١ی ئابی ٢٠٢٤، گەورەترین ئاڵوگۆڕی بەندکراوانی پەیوەندیدار بە ویلایەتە یەکگرتووەکانی ئەمریکا لە سەردەمی دوای شەڕی ساردەوە ڕوویدا، کە تێیدا بیست و شەش کەس ئازاد کران. دوای لانیکەم شەش مانگ لە دانوستانە نھێنییە فرەلایەنییەکان، ڕووسیا و بیلاڕووس شازدە بەندکراویان ئازاد کرد، لەکاتێکدا ویلایەتە یەکگرتووەکان، ئەڵمانیا، پۆڵەندا، سلۆڤێنیا و نەرویژ سەرجەم ھەشت بەندکراو و دوو کەسی کەمتەمەنیان ئازاد کرد. ئیڤان گێرشکۆڤیچ، پەیامنێری وۆڵ ستریت جۆرناڵ و پۆڵ ویلان، ئەندامی پێشووی ھێزی دەریاییی ئەمریکا لەو کەسانە بوون کە ئازاد کران کە ھەر کامیان سزای شازدە ساڵ بەندکرانیان بەھۆی سیخوڕیکردن بەسەردا سەپێنرابووو.

ئاڵوگۆڕی بەندکراوەکان کە بە یەکێک لە ئاڵۆزترین ئاڵوگۆڕەکان لە مێژوودا دادەنرێت، لە فڕۆکەخانەی ئیسەنبۆغای ئەنقەرە لە تورکیا ئەنجام درا. بەپێی مەرجەکانی ڕێککەوتنەکە، ھەشت ھاووڵاتیی ڕووس و دوو منداڵی کەمتەمەن بۆ ڕووسیا گوازرانەوە و سێزدە بەندکراو لە ڕووسیا بۆ ئەڵمانیا و سێ بەندکراوی تر بۆ ویلایەتە یەکگرتووەکانی ئەمریکا گەڕێندرانەوە.