ھێرشکردنە سەر باڵیۆزخانەی سوێد لە بەغدا (٢٠٢٣)

ھێرشکردنە سەر باڵیۆزخانەی سوێد لە بەغدا
بەشێکە لە	سوتاندنی قورئان لە سوێد
وڵات	عێراق
جێ	بەغدا
ناوچەی جوگرافی	باڵیۆزخانەی سوێد لە عێراق
کاتی ڕوودان	٢٠ی تەممووزی ٢٠٢٣
لە ویکیدراوە دەستکاریی زانیارییەکان بکە

ھێرشکردنە سەر باڵیۆزخانەی سوێد لە بەغدا ٢٠٢٣ ھێرشێکە کە لە بەرەبەیانی ڕۆژی پێنجشەممە ٢٠ی تەممووزی ٢٠٢٣ بۆ سەر بارەگای باڵیۆزخانەی سوێد لە بەغدای پایتەختی عێراق ڕوویدا، کە دەیان خۆپیشاندەر ھەڵیانکوتایە سەر باڵەخانەی باڵیۆزخانەی سوێد وەک ناڕەزایەتییەک بەرامبەر بە سووتاندنی قورئان لە سوێد لەلایەن سەلوان مۆمیکاوە، بیناکە ئاگری گرت و دووکەڵ تێیدا بەرزبووەوە و بە سەدان لایەنگری سەرۆکی ڕەوتی سەدر دەورە درا.

ھەڵکووتان

لە ٢٠ی تەممووزی ٢٠٢٣، نزیکەی کاتژمێر ٢ی بەیانی بە کاتی فەرمی (٢٣:٠٠ بە کاتی جیھانیی، ١٩ی تەممووز)، سەدان خۆپیشاندەر ھێرشیان کردە سەر باڵیۆزخانەکە، دوای ئەوەی پۆلیس لە ستۆکھۆڵم بۆ جاری دووەم مۆڵەتی سووتاندنی قورئانی بە سەلوان مۆمیکا دا. ئاگر و دووکەڵ بینرا لە بینای باڵیۆزخانەکەدا، و وەزارەتی دەرەوەی عێراق بەیاننامەیەکی بڵاوکردەوە و تێیدا سەرکۆنەی ڕووداوەکەی کرد و ھێزە ئەمنییەکان ڕێنمایییان پێگەیشت سەبارەت بە لێکۆڵینەوە لە ڕووداوەکە، وەزیری دەرەوەی سوێد تۆبیاس بیۆلسترۆم ڕای گەیاند کە کارمەندانی باڵیۆزخانەکە سەلامەت بوون، و وتی: «حکوومەتی عێراق بەرپرسیارێتی یاسایی خۆی بەپێی ڕێککەوتننامەی پەیوەندییە دیپلۆماسییەکانی ڤیێنا بۆ پاراستنی باڵیۆزخانەکە لە ئەستۆ نەگرت. و لە ماددەی ٢٢ مەرجی ئەوە خراوەتەڕوو کە ڕێککەوتنەکە بەشێکی دەڵێت: «وڵاتی میواندار بەرپرسیارێتی پاراستنی بینای نێردراوانی لە ئەستۆیە لە ھەر دەستدرێژییەک یان زیانێک».

وتەبێژی فەرمیی حکوومەتی عێراق، باسم عەوادی لە بەیاننامەیەکی ڕۆژنامەوانیدا ڕای گەیاند: «محەممەد شیاع سوودانی سەرۆکوەزیرانی عێراق، ئاڕاستەی وەزارەتی دەرەوەی کرد بۆ کشانەوەی بەرپرسیارێتی کارووباری عێراق لە باڵیۆزخانەی کۆماری عێراق لە پایتەختی سوێد، ھەروەھا داوای لە باڵیۆزی سوێد کرد خاکی عێراق جێبھێڵێت». ئاماژەی بەوەشکرد، «ئەم ڕێنماییانە لە وەڵامی مۆڵەتی دووبارەی حکوومەتی سوێددا ھات بۆ سووتاندنی قورئان و سووکایەتیکردن بە پیرۆزییەکانی ئیسلام، و سووتاندنی ئاڵای عێراق».

پاشخان

لە ٢٨ی حوزەیرانی ٢٠٢٣، سەلوان مۆمیکا، پەنابەرێکی عێراقی لە سوێد و بە ڕەچەڵەک ئاشووری و پەیڕەوی ئایینی مەسیحییەت، چاپێکی قورئانی دڕاند، پاشان لە مزگەوتی ناوەندی ستۆکھۆڵم سووتاندی لە یەکەم ڕۆژی جەژنی قورباندا، دوای ئەوەی پۆلیسی سوێد پاش بڕیارێکی دادوەری مۆڵەتی ڕێکخستنی ناڕەزایەتییەکەی پێدا.

لە ٢٠ی تەمووزی ٢٠٢٣، سەلوان مۆمیکا سووتاندنی چاپێکی دیکەی قورئانی دووبارە کردەوە، جگە لەوەش ئاڵای عێراقی لە بەردەم بارەگای باڵیۆزخانەی عێراق لە سوێد سووتاند، ئەمەش توڕەیی گەلی عێراق و حکوومەتی عێراقی لێکەوتەوە، لە ئەنجامدا حکوومەتی عێراق بڕیاری دەرکردنی باڵیۆزی سوێد و پچڕاندنی پەیوەندییە دیپلۆماسییەکانی دا لەگەڵ ستۆکھۆڵم بە تەواوی.

کاردانەوەکان

• عێراق: وەزارەتی دەرەوەی عێراق بە توندی سەرکۆنەی ھێرش و سووتاندنی باڵیۆزخانەی سوێدی کرد لە بەغدا.
• سوێد: باڵیۆزی عێراقی لە ستۆکھۆڵم بانگھێشت کرد، و وەزارەتی دەرەوەی سوێد دەسەڵاتدارانی عێراقی بە بەرپرسیار زانی لە پاراستنی نوێنەرە دیپلۆماسییەکان و کارمەندەکانیان.
• ویلایەتە یەکگرتووەکان: وەزارەتی دەرەوەی ئەمریکا بە توندی سەرکۆنەی ھێرشی سەر باڵیۆزخانەی سوێدی کرد لە بەغدا.
• یەکێتیی ئەورووپا: یەکێتیی ئەورووپا ھێرشەکەی بۆ سەر باڵیۆزخانەی سوێد لە عێراق سەرکۆنە کرد.
• نێردەی ھاوکاری نەتەوە یەکگرتووەکان بۆ عێراق (یوونامی): نوێنەرایەتی نەتەوە یەکگرتووەکان لە عێراق ھێرشی سەر باڵیۆزخانەی سوێدیان سەرکۆنە کرد.