ئینستیتیوتی چاندی کوردیی ڤییەن
ئینستیتیوتی چاندی کوردیی ڤییەن | |
 ئینستیتیوتی چاندی کوردیی ڤییەن | |
| دامەزران | ٢٠١٧ |
|---|---|
| شوێن | |
| پۆتانەکان | 48°11′58″N 16°20′45″E / 48.1995763°N 16.3457779°Eپۆتانەکان: 48°11′58″N 16°20′45″E / 48.1995763°N 16.3457779°E |
| نوێنەر | سولەیمان مەحموود |
| وێبگە | پێگەی فەرمی |
ئینستیتیوتی چاندی کوردیی ڤییەن (بە ئەڵمانی: Kurdisches Kulturinstitut Wien) ڕێکخراوەیەکی سەربەخۆی کولتووریی کوردییە کە ساڵی ٢٠١٧ لەلایەن بەشێک لە ڕۆشنبیران و ھونەرمەندان و ئەکادیمیستەکانی کورد لە نەمسا بە ئامانجی پاراستنی چاند و زمانی کوردی دامەزراوە.[١] ئامانجە سەرەکییەکانی ئینستیتیوتی چاندی کوردی لە ڤییەنا ناساندنی کولتوور و ھونەر و زمانی کوردی بە خەڵکی نەمسا و دروستکردن و پتەوکردنی پەیوەندییەکانی نێوان ھاووڵاتیانی نەمسا و کوردە.[٢]
چالاکییەکان[دەستکاری]
گرنگترین چالاکییەکانی ئینستیتیوتی کوردی بریتین لە:
- خولی فێرکاریی زمانی کوردی بۆ کوردانی دانیشتووی نەمسا و خوێندکارانی کورد و بیانی زانکۆی ڤییەنا. کۆرسەکانی زمانی کوردیی ڕێکخراوەکە بە ھەردوو شێوەزاری کورمانجی و زازاکین و لە سێ ئاستاندا پێشکەش دەکرێن، تا ئێستا لەسەر دەستی ئەم ڕێکخراوەیە بە سەدان کەس فێری زمانی کوردی بوون.
- ئینستیتیوتی کوردی جگە لە خولی زمان، چالاکی فەرھەنگی و ھونەریش ساز دەکات، وەک: ناساندنی کتێبی نوێی کوردی و بەڕێوەبردنی گفتوگۆ لەسەریان.
- ئینستیتیوتی کوردی میوانداریی نووسەران، شاعیران، ڕۆماننووسان و ڕۆژنامەنووسانی کورد دەکات و دەرفەتیان بۆ دەڕەخسێنێت کە لە ڕێگەی کۆڕ و کۆبوونەوەکانەوە بەرھەمەکانیان لەگەڵ کوردانی دیاسپۆرا ھاوبەش بکەن.
- ھەروەھا سینەمای کوردی لە کارەکانی ئینستیتیوتی کوردیدا جێگایەکی گرنگی ھەیە. ھەندێک فیلمی کوردی لەلایەن ئینستیتیوتی کوردییەوە نمایش دەکرێن؛ جگە لەوەش ئینستیتیوتی کوردی پاڵپشتی ئەو ئەکتەر و دەرھێنەرە گەنجە کوردانە دەکات کە دەیانەوێت بە فیلم و بەرھەمەکانیان سینەمای کوردی بەرەوپێش ببەن.
- ساڵانە ئەنستیتۆی کوردی بە مەبەستی دروستکردنی پەیوەندی لە نێوان گەلی کورد و یەکڕیزی نێوان خێزانە کوردەکان، بۆ کوردانی تاراوگە ئاھەنگ و کۆنسێرت ساز دەکات.
- گرووپی توێژینەوەی ڤییەنا یەکێکە لە پرۆژەکانی ئینستیتیوتی کوردی؛ مەبەست لەم گرووپە پەرەپێدانی پەروەردەیە لە نێوان کچان و کوڕانی کورد لە نەمسا. ھەروەھا ئینستیتیوتی کوردی بۆ خوێندنی باڵا لە زانکۆکانی نەمسا پاڵپشتی گەنجانی کورد دەکات.
خەڵاتی شەرەفنامە[دەستکاری]
ئەم خەڵاتە ساڵانە دەدرێتە نووسەرێکی کورد کە خزمەتی زمان و فەرھەنگی کوردی کردووە. شایەنی باسە ئەم خەڵاتە لە خولی یەکەمی واتە ساڵی ٢٠١٨ بەخشراوەتە دکتۆر جەلیلی جەلیل، و لە خولی دووەمی واتە ساڵی ٢٠١٩ بەخشراوەتە نووسەر شاھین بەکر سۆرەکلی. ڕێکخراوەی چاندی کوردیی ڤییەن ساڵی ٢٠٢٠ خەڵاتی شەرەفنامە بۆ زمان و چاندی کوردی، بەخشیوەتە نووسەر و شاعیر کۆنێ ڕەش، بۆ خزمەتەکانی لە پێناو زمان و کلتووری کوردی. خەڵاتەکە لە ناوەندی کافێی قەڵا لە قامیشلۆ بە ئامادەبوونی کۆمەڵێک نووسەر و ڕۆشنبیر، لەلایەن نووسەر و توێژەر دەھام عەبدولفەتاح بە ناوی ئینستیتیوتی چاندی کورد لە ڤییەننا پێشکەشی ناوبراو کراوە.[٣]
ساڵی ٢٠٢١ نووسەری کورد جان دۆست خەڵاتی شەرەفنامەی لە ئیدارەی ئینستیتیوتی فەرھەنگی کوردی لە ڤییەنا بۆ خزمەتەکانی لە بواری زمانی کوردی، بەدەست ھێناوە.[٤]
سەرچاوەکان[دەستکاری]
- ^ Kurdish Cultural Institute of Vienna - Kurdisches Kulturinstitut Wien، سەردان لە ١٢ی کانوونی دووەمی ٢٠٢٤
- ^ Li bajarê Viyenayê zarokên Kurd û biyanî fêrî Kurdî dibin، سەردان لە ١٢ی کانوونی دووەمی ٢٠٢٤
- ^ بطاقة شکر لإدارة المعھد الثقافی الکردی فی فیینا، سەردان لە ١٢ی کانوونی دووەمی ٢٠٢٤
- ^ جائزة شرفنامە للغة والثقافة الکوردیة لعام 2021 تذھب للکاتب الکوردی جان دوست[بەستەری مردوو]، سەردان لە ١٢ی کانوونی دووەمی ٢٠٢٤