کاتێک نیچە گریا
چاپی یەکەم | |
| نووسەر | ئیرڤین دی. یالۆم |
|---|---|
| وڵات |  ویلایەتە یەکگرتووەکان |
| زمان | ئینگلیزی |
| بڵاوکەرەوە | ١٩٩٢ |
کاتێک نیچە گریا (بە ئینگلیزی: When Nietzsche Wept) یەکێکە لە ڕۆمانە دەروونییە بەناوبانگەکانی ئیرڤین دی. یالۆم، کە لە ساڵی ١٩٩٢ بە زمانی ئینگلیزی نووسراوە. ئیرڤین دی. یالۆم پزیشکی دەروونی ئیگسیتیالیست پرۆفیسۆری زانستی دەروونی زانکۆی ستانفۆرد و نووسەری ژمارەیەک لە ناسراوترین ڕۆمانە دەروونییەکانە. ساڵی ٢٠٠٧ فیلمێک بە ھەمان ناوی ڕۆمانەکە ، «کاتێک نیچە گریا» لە دەرھێنانی پینکاس پێری، دەرچوو.
ئاماژەدان بە کەسایەتییە بەناوبانگەکان
[دەستکاری]کتێبەکەی یالۆم خەیاڵییە بەڵام ئاماژەی زۆری تێدایە بۆ مێژوو و کەسایەتییە مێژووییەکان: جۆزێف و ماتیڵد برۆیەر، فریدریش نیچە، لوو سالۆمێ، سیگمۆند فرۆید، بێرتا پاپنھایم، پۆڵ ڕی ھەروەھا ئاماژە بە فرانتس ئۆڤەربێک، و ئاوازدانەر ڕیچارد ڤاگنەریش دەکات.
وەرگێڕانەکان
[دەستکاری]لە ساڵی ٢٠٠٧ ڕۆمانەکەی یالۆم لەلایەن دەرھێنەر پینچاس پێرییەوە کرا بە فیلم، بە بەشداری ئەکتەران ئارماند ئاسانتێ، بێن کرۆس و کاترین وینیک. ئەم دراما ئەمریکییە سەربەخۆیە لە بولگاریا وێنەی گیراوە.
ھەروەھا شانۆگەرییەکیش ھەیە کە لەسەر بنەمای ڕۆمانەکە وەرگیراوە، لەلایەن لوسیانۆ کازۆوە ئامادەکراوە. ڕۆڵەکانی فریدریش نیچە و جۆزێف برۆیەر لەلایەن ئەکتەران لوسیانۆ سواردی و کلاودیۆ دا پاسانۆوە نمایش دەکرێن. شانۆگەرییەکە کەشوھەوای فیکری و فەلسەفی ڕۆمانەکە دەردەخات، ھەندێکجار نزیک لە خەون. نموونەیەک لەو وردەکاریانە ئەوەیە کە کارەکتەرە ژنەکانی شانۆگەرییەکە جلوبەرگی ڕەنگاوڕەنگ لەبەردەکەن، لە کاتێکدا کارەکتەرە پیاوەکان قاتی ڕەش یان خۆڵەمێشی لەبەردەکەن؛ ئەمەش لەبەرئەوەی شانۆگەرییەکە ھەوڵدەدات واقیعی خۆی لە ڕووانگەی پیاوە ڕۆشنبیرەکانی ئەو سەردەمەوە نیشان بدات. شانۆگەرییەکە بە گشتی پێداچوونەوەی ئەرێنی وەرگرتووە، و ستایشی کاری ئەکتەرە پیاو و ژنەکانی کراوە.
لە ساڵی ٢٠١٢، بەبۆنەی ١٥٠ھەمین ساڵیادی لەدایکبوونی لوو سالۆمێ، ئەو ژنەی کە ڕۆڵێکی سەرەکی لە کتێبەکەدا دەگێڕێت، وەرگێڕانێکی شانۆیی تری ڕۆمانەکە لەلایەن شانۆناس و وەرگێڕی یالۆم بە زمانی یۆنانی، ئێڤانجلیا ئەندریتسانۆ، ئەنجامدرا. نمایشەکە تەنھا سێ ئەکتەری پیاوی تێدابوو (یەکێکیان، ھاریس فراگۆلیس، خەڵاتی ھۆرنی پێبەخشرا بۆ ڕۆڵگێڕانەکەی وەک سیگمۆند فرۆید) کە ژیانیان بە شانۆگەرییەکە بەخشی، ھەندێکجار وەک گێڕەرەوە و ھەندێکجاریش ڕۆڵیان دەگێڕا. سێ ژنەکە، لوو سالۆمێ، ئانا ئۆ، و خاتوو برۆیەر لە ڕووانگەی چاو و دەنگی پیاوەکانەوە پێشکەش دەکرێن.[١][٢]
وەرگێڕان
[دەستکاری]ئەم ڕۆمانە لەلایەن دڵشاد ھیوا وەرگێڕدراوەتە سەر زمانی کوردی.
سەرچاوەکان
[دەستکاری]- بەشداربووانی ویکیپیدیا، «When Nietzsche Wept»، ویکیپیدیای ئینگلیزی. سەردان لە ١٧ی ئایاری ٢٠٢١.
