مەجید سەعید

مەجید سەعید

مەجید سەعید:(١٩٢١-١٩٩٥) نووسەر،چالاكی سیاسی، مامۆستا، ئەندازیار ،لەنەتەوەی كورد بووە.

سەرەتای ژیان و خوێندنی

مەجید کوڕی سەعید کوڕی ئەحمەد دزکوژە، ساڵی ١٩٢١ لە سلێمانی ھاتووەتە دنیاوە. قۆناغەکانی خوێندنی سەرەتایی و ناوەندیی لە سلێمانی تەواوکردووە و لە قوتابخانە (کۆلیج)ی ئەندازەی بەغدا وەرگیراوە، بەڵام لەبەر ئەوەی تەنیا بووە و لە ھاوڕێکانی دوورکەوتووەتەوە، لەوێ دەوامی نەکردووە و مەحموود حەسەنی پاشتر ئەندازیار چووەتە جێی و ئەویش لە (خانەی بەرزی مامۆستایان) خوێندوویە و بە نمرەیەکی زۆر دەرچووە. سەرەتا لە قوتابخانەی پێنجوێن دامەزراوە. پاشان ھێنراوەتە قوتابخانەی فەیسەڵییەی کوڕان و وەک مامۆستای زمانی ئینگلیزی دەستبەکار بووە. دوایی کراوە بە بەڕێوەبەری قوتابخانەی غازی. ئەو ساڵانە دەوری وەرگێڕێکی لە شاردا دیوە و بەردەوام سەری لە زانکۆی ئەمریکایی داوە لە بەیرووت و بەشداریی لە خولی پێشکەوتووی زمانی ئینگلیزیدا کردووە.

چالاكی سیاسی

ساڵی ١٩٤٥ عومەر عەلیی موتەسەڕیفی لیوا لەسەر داگرتنی وێنەی مەلیک لە کاتی بۆیاخکردنی بینای قوتابخانەی غازی دا، سزای داوە و دووری خستووەتەوە بۆ قەڵادزێ، دوو ساڵی لێ ماوەتەوە. چەند ساڵێکیش مامۆستای خانەی مامۆستایان بووە، ئەمجا ھێنراوەتەوە بۆ سلێمانی و لە چەند قوتابخانەیەکدا وەک بەڕێوەبەر و مامۆستا وەزیفەی دیوە، تا لە کۆتاییدا کە بەڕێوەبەری قوتابخانەی خالیدییە بووە، بە داوای خۆی خانەنشین بووە.

مەجید، عەرەبی و ئینگلیزیی بە باشی زانیون، وەک مامۆستایەکی گورج و گۆڵی دڵسۆزی کارامە بووە، ھەستێکی بەرزی کودایەتیشی ھەبووە و وەک چالاکێک لەو پێناوەدا تێکۆشاوە و چەند جارێک تووشی گرتن و لێپرسینەوە ھاتووە. پێوەندیی بە (پارتی دیموکراتی کوردستان)ەوە بووە و کاری لەگەڵ ئیبراھیم ئەحمەد کردووە لە "خەبات"دا. لە ڕەشبگیرەکەی ٩/٦/١٩٦٣ی بەعسییەکاندا، دەستگیرکراوە و ماوەیەکی درێژ ماوەتەوە و براوەتە بەغدا و لەوێ ئازادکراوە.

ژیانی هاوسەرگیریی

مەجید، ١٩٤٥ لەگەڵ خاتوو "واحیدەی فەخری بەگی واسیف بەگ" خێزانی پێک ھێناوە و دوو کوڕ (دلاوەر و کامەران) و چوار کچ (گوڵاڵە، ھێرۆ، چنوور، ئاشتی)ی لێ بووە.

كۆچی دوایی

ڕۆژی ٢٨/٣/١٩٩٥یش کۆچی دواییی کردووە و لە (گردی سەیوان) بە خاک سپێردراوە.