مامە ڕیشە

لە ویکیپیدیاوە، ئینسایکڵۆپیدیای ئازاد
باز بدە بۆ: ڕێدۆزی، گەڕان

نەجمەدین شکور ڕەئوف ناسراو بە مامە ڕیشە پێشمەرگەی یەکێتی نیشتمانی کوردستان بوو لە شۆڕشی نوێی گەلەکەماندا و سەر بە تیپی ٥٧ی سەگرمە بوو لەنێو پێکهاتەی ڕێکخستنەکانی شاخی یەکێتیی نیشتمانیی کوردستاندا.


ژیان[دەستکاری]

ساڵی ١٩٥٥ لە گوندی تاڵەبان-ی ناوچەی گەرمیان، لە بنەماڵەیەکی کوردپەروەر و لە ژینگەیەکی پاک و بێگەردی کوردایەتیدا ھاتۆتە دنیاوە، بۆیە ھەر زوو ھەستی نیشتمانپەروەرییەکی پێشکەوتنخواز لە دەروونیدا کڵپە دەسەنێت و لە ساڵی ١٩٧٠دا بە پێچەوانەی زۆربەی ھاوتەمەنەکانی خۆیەوە، پەیوەندی دەکات بە شۆڕشی فەڵەستین-ەوە و دەبێتە (فیدائی).

ساڵی ١٩٧٨ کە ڕژێم شاڵاوی تەعریب و ڕاگواستنی لە کوردستاندا گەیاندە ترسناکترین ئاست، کارەساتی گوندە کاولکراو و جوتیارە ڕاگوێزراوەکان مامە ڕیشەی وا لێکرد چەکی پێشمەرگایەتی لە شۆڕشی نوێدا بکاتە شان و لە ڕیزی ھەڤاڵەکانیدا دڕ بە شەوەزەنگی داگیرکردن بدات.

ڕیشەی قارەمان لە ماوەیەکی کەمدا بە چالاکییە پڕ جەربەزەکانی توانی نەک ھەر دڵسۆزی خۆی بۆ شۆڕش بسەلمێنێ، بەڵکو وەک پاڵەوانێکی کەموێنە ناوبانگی دەرکرد، لەو دەشتە کاکی بەکاکییانەی ناوچەکانی (ھەمەوەند و جەباری و قادرکەرەم و دەوروبەری شاری کەرکوکدا)، گورزە بەھێزەکانی مامە ڕیشە لە ھێزی داگیرکەر ھێندە کاریگەر بوون، کە ھەر ناوبردنی ئەو جەنگاوەرە جوامێرەی گەل بەس بوو بۆ زارەترەک کردنی لەشکری دوژمن.

لە ساڵی ١٩٧٩ەوە ئەم ئازایەتییە دەگمەنەی تێکەڵاوی کاری پێشمەرگانە و پێشخانی شۆڕش کردووە و لە کەرتی (٤)ی بازیان درێژەی بە خەباتی پێشمەرگایەتیدا. لەگەڵ ھەموو چالاکییەکدا ناوبانگی ئەم شۆڕەسوارە بەرزتر دەبووەوە و خۆشەویستییەکەی لە دڵی میللـەتدا زیاتر دەبوو.

ئەو سەردەمەش کە کرایە فەرماندەی کەرتی جەباری، ڕژێم لە ترسی شاڵاوی ئەم ھەڵۆیە ھەموو ھاتوچۆیەکی لە نێوان کەرکوک و بازیاندا قەدەغە کرد و ناوی مامە ڕیشە کەوتە ناو سروود و دروشمە جەماوەرییەکان.

زۆربەی داستانە پڕ سەروەرییەکانی ھێزی پێشمەرگەی کوردستان، ھەر لە شەڕی(تەپەی عەرەب)ەوە تا داستانی ڕزگار کردنی (بێتواتە) جێپەنجەی مامە ڕیشەی پێوە دیارە، ئەم پێشمەرگە چاونەترسە لە شەڕی پێشمەرگایەتیدا چوار جار بریندار کراوە و لەسەر ئەو ھەڵوێست و ناوبانگەش کاربەدەستانی ڕژێم باوکی مامەڕیشە و ئەحمەدی برایان شەھید کردووە.

دوژمن ھەر بەمەشەوە نەوەستا و رۆژی ٢٤ی کانونی دووەمی ساڵی ١٩٨٥ لە پیلانێکی ترسنۆکانەدا بە دەستی کۆمەڵێک بەکرێگیراو شەھیدی کرد.


سەرچاوەکان[دەستکاری]

ماڵپەڕی کوردیپیدیا