ڕووداو (تیۆریی ئەگەر)

دیاگرامی ڤەن، A ڕووداو و B بۆشاییی نموونە

ڕووداو (بە ئینگلیزی: Event)، ژێرکۆمەڵێک لە بۆشاییی نموونەیە کە لە ئەنجامێک یان زیاتر پێک دێت. دەشێت دوو ڕووداو سەربەخۆ (Independent)یان بەستراو (Dependent) بن. دوو ڕووداو سەربەخۆ دەبن کاتێک ھاتنەدی یەکێکیان کار نەکاتە سەر ھاتنەدی ئەویتریان.

نموونە

• دەرکەوتنی ژمارەیەکی تاک لە ئەنجامی ھەڵدانی بەردەزارێک بڕیتییە لە ڕووداوی:

$E1=\{1,3,5\}$

• سەرجەمی ئەو ژمارانەی لە ئەنجامی ھەڵدانی دوو بەردەزار دەردەکەون بکاتە ٦، بریتییە لە ڕووداوی:

$E2=\{(1,5),(2,4),(3,3),(4,2),(5,1)\}$

ڕووداوی سادە

ڕووداوی سادە یان بنەڕەتی ڕووداوێکە ئەنجامێک لە ئەنجامەکانی بۆشایی نموونە دەگرێتەخۆ. بۆ نموونە لە ئەنجامی ھەڵدانی بەردەزارێک دەرکەوتنی ژمارە ٦ ڕووداوێکی سادەیە. یان لە ئەنجامی ھەڵدانی دوو دراوی کانزایی بۆشاییی نموونە دەکاتە:

$S=\{TT,TH,HT,HH\}$

ھەر یەک لەو ڕووداوەنەی خوارەوە

$\{TT\}$ ، $\{TH\}$ ، $\{HT\}$ ، $\{HH\}$

ڕووداوێکی سادەن.

ڕووداوی تەواوکەر

ڕووداوی $A$ ڕووداوی تەواوکەرە بۆ ڕووداوی $B$ ئەگەر $A$ لە گشت ئەو ئەنجامانە پێک بێت کە لە توانادایە و سەر بە $B$ نییە. ڕووداوی تەواوکەری ڕووداوی $A$ بە $A^{c}$ (یا ′$A$) ھێما دەکرێت.