کەریم شنگالی
| کەریم شنگالی | |
|---|---|
| وەزیری ناوخۆی ھەرێمی کوردستان | |
| لە پۆستدا بووە ٢٠٠١[١] – ٢٠١٩ | |
| پاشینە | ڕێبەر ئەحمەد |
| ڕاوێژکار لە سەرۆکایەتیی ھەرێمی کوردستان | |
| لە پۆستدا بووە ٢٠١٩[٢] – ١٠ی حوزەیرانی ٢٠٢٥[٣] | |
| بەڕێوەبەری گشتیی ئاسایشی ھەرێمی کوردستان | |
| لە پۆستدا بووە ١٩٩٣[٤] – ١٩٩٤[٤] | |
| وردەکاریی تاکەکەسی | |
| لەدایکبوون | عەبدولکەریم سوڵتان عەبدوڵڵا[١] 1ی کانوونی دووەمی 1950[٢] شنگال[٤] یان مووسڵ[٢]، عێراق |
| مردن | ١٠ی حوزەیرانی ٢٠٢٥ (٧٥ ساڵ ژیاوە)[٣] دوبەی، میرنشینە یەکگرتووە عەرەبییەکان[٥] |
| نەتەوە | عێراقی |
| پارتی سیاسی | پارتی دیموکراتی کوردستان[١] |
| خوێندن لە | زانکۆی بەغدا (کۆلێژی یاسا و ڕامیاری)[٦] |
| پیشە | |
| ئایین | ئیسلام[٥] |
عەبدولکەریم سوڵتان عەبدوڵڵا (١٩٥٠ لە شنگال،[٤] عێراق – ١٠ی حوزەیرانی ٢٠٢٥ لە دوبەی، میرنشینە یەکگرتووە عەرەبییەکان)، ناسراو بە کەریم شنگالی، کەریم سنجاری، حەسەن و حەسەن شنگالی،[١] سیاسەتوانێکی کورد و ئەندامی مەکتەبی سیاسیی پارتی دیموکراتی کوردستان بوو. وەزیری ناوخۆی ھەرێمی کوردستان بوو، لە کابینەکانی پێنجەم، شەشەم، حەوتەم، و ھەشتەمی حکوومەتی ھەرێمی کوردستان.
ژیاننامە
[دەستکاری]کەریم شنگالی لە ساڵی ١٩٥٠ لەدایک بووە؛ سەرچاوەکان لەسەر شوێنی لەدایکبوونی ناکۆکن، ھەندێکیان ئاماژە بە شنگال دەکەن[٤][٦] و ھەندێکی دیکەیان شاری مووسڵ بە شوێنی لەدایکبوونی دادەنێن.[٢][٧] لە ساڵی ١٩٧١ بڕوانامەی بەکالۆریۆسی لە بەشی یاسای کۆلێژی یاسا و ڕامیاری لە زانکۆی بەغدا بەدەست ھێناوە.[٦] لە نێوان ساڵانی ١٩٧١ بۆ ١٩٧٣ لە شاری بەغدا کاری پارێزەری کردووە.[٤]
دوای نسکۆی شۆڕشی ئەیلوول لە ساڵی ١٩٧٥، وەک پەنابەر ڕووی لە ئێران کرد و بووە ئەندامی لێژنەی سەرپەرشتیی ئاوارەکانی باشووری کوردستان.[١] لە ساڵی ١٩٧٦ وەک پەنابەری سیاسی ڕووی لە ئەورووپا کرد.[٢] شنگالی زمانەکانی کوردی، عەرەبی، فارسی و ئینگلیزی دەزانی.[١]
خەباتی سیاسی و پێشمەرگایەتی
[دەستکاری]کەریم شنگالی لە ساڵی ١٩٦٧ پەیوەندی بە ڕیزەکانی یەکێتیی قوتابیانی کوردستانەوە کرد و ساڵی دواتر، لە ١٩٦٨، بووە ئەندامی پارتی دیموکراتی کوردستان.[٦] لە ساڵی ١٩٦٩ وەک ئەندامی ناوچەی بەغدا لە لقی پێنجی پارتی دەستبەکار بوو. لە ئازاری ١٩٧٣ پەیوەندی بە ھێزی پێشمەرگەوە کرد.[١]
لە نیسانی ١٩٧٥، لەلایەن مەسعوود بارزانییەوە بۆ ئامادەکارییەکانی شۆڕشی گوڵان ڕاسپێردرا.[١] ھەر لەو مانگەدا، لەگەڵ چوار کەسایەتیی دیکە بانگھێشتی یەکەمین کۆبوونەوەی سەرکردایەتیی کاتیی پارتی کرا کە لە نزیک نەغەدە لە ڕۆژھەڵاتی کوردستان بەڕێوە چوو.[١] دوای ئاشکرابوونی لەلایەن دەزگای ساواکی ئێرانەوە، لەگەڵ جەوھەر نامیق سالم بە قاچاخ خۆی گەیاندە باکووری کوردستان و لەوێشەوە گەڕایەوە باشووری کوردستان.[١]
لە ساڵی ١٩٧٦ لە کۆنفرانسی بەرلین بە ئەندامی سەرکردایەتیی کاتیی پارتی ھەڵبژێردرا.[٨] ساڵی ١٩٧٧ بە ناوی نھێنی "حەسەن" و "حەسەن شنگالی" بەشداریی لە شۆڕشی گوڵاندا کرد و بووە جێگری بەرپرسی ھەرێمی یەکی سەرکردایەتیی کاتیی پارتی.[١]
لە ساڵی ١٩٧٩دا بۆ ماوەیەک وازی لە کاری حیزبی ھێنا، بەڵام لە ساڵی ١٩٨١ پەیوەندی بە ڕیزەکانی پارتی دیموکراتی گەلی کوردستانـەوە کرد.[١] لە ساڵی ١٩٩٠دا گەڕایەوە نێو ڕیزەکانی پارتی دیموکراتی کوردستان و وەک ئەندامی لێژنەی ڕێکخستنی ناوەندیی پارتی دەستنیشان کرا.[١] ساڵی ١٩٩١ بۆ مەکتەبی سەرۆکی پارتی گواسترایەوە.[١]
پۆستەکان
[دەستکاری]لە بواری حکوومیدا
[دەستکاری]- بەڕێوەبەری گشتیی ئاسایشی ھەرێمی کوردستان: لە ساڵی ١٩٩٣ تا ١٩٩٤.[٧]
- وەزیری ناوخۆ: لە ساڵی ٢٠٠١ەوە ئەم پۆستەی وەرگرت و لە کابینەکانی چوارەم، پێنجەم، شەشەم، حەوتەم و ھەشتەمی حکوومەتی ھەرێمی کوردستان بەردەوام بوو.[٩][٦]
- ڕاوێژکار لە سەرۆکایەتیی ھەرێمی کوردستان: دوای پێکھێنانی کابینەی نۆیەمی حکوومەتی ھەرێم، وەک ڕاوێژکار لە سەرۆکایەتیی ھەرێم دەستنیشان کرا.[١٠][١١]
- بەڕێوەبەری نووسینگەی سەرۆکی ھەرێمی کوردستان: بۆ ماوەیەک ئەم پۆستەشی بەڕێوە بردووە.[٨]
لە بواری حیزبیدا
[دەستکاری]- ئەندامی لیژنەی ئامادەکاری کۆنگرەی نۆیەم: لە ساڵی ١٩٧٩دا ئەندامی لیژنەی ئامادەکاریی کۆنگرەی نۆیەمی پارتی بووە.[١]
- ئەندامی لێژنەی باڵای ھەڵبژاردن: ساڵی ١٩٩٢ وەک نوێنەری پارتی لەلایەن بەرەی کوردستانییەوە بۆ ھەڵبژاردنی پەرلەمانی کوردستان دەستنیشان کرا.[١]
- ئەندامی کۆمیتەی ناوەندیی پارتی: لە کۆنگرەکانی یازدە (١٩٩٣) و دوازدە (١٩٩٩) ھەڵبژێردرا.[٨]
- ئەندامی مەکتەبی سیاسیی پارتی: لە کۆنگرەی سێزدەیەمی پارتی (٢٠١٠) وەک ئەندامی ئەنجومەنی سەرکردایەتی و دواتر مەکتەبی سیاسی ھەڵبژێردرا.[٤][١٢]
کۆچی دوایی
[دەستکاری]کەریم شنگالی لە ساڵی ٢٠٢٢ بە مەبەستی وەرگرتنی چارەسەری پزیشکی سەردانی دەرەوەی وڵاتی کرد و لەو کاتەوە لەژێر چاودێریی پزیشکیدا بوو.[١٣] دواجار لە ڕۆژی سێشەممە، ١٠ی حوزەیرانی ٢٠٢٥، بەھۆی نەخۆشییەوە لە تەمەنی ٧٥ ساڵیدا لە شاری دوبەی کۆچی دوایی کرد.[٣][٥]
ڕۆژی دواتر، چوارشەممە ١١ی حوزەیرانی ٢٠٢٥، تەرمەکەی لە ڕێگەی فڕۆکەخانەی نێونەتەوەییی ھەولێرەوە گەڕێنرایەوە بۆ هەرێمی کوردستان. لە مەراسیمێکی فەرمیدا بە ئامادەبوونی مەسعوود بارزانی، نێچیرڤان بارزانی، مەسرور بارزانی و ژمارەیەکی زۆر لە بەرپرسانی باڵای حیزبی و حکوومی و دیپلۆماتکاران، پێشوازی لە تەرمەکەی کرا.[١٤] دواتر لە مزگەوتی جەلیل خەیات نوێژی لەسەر کرا و لە ھەولێر بەخاک سپێردرا.[٥]
سەرچاوەکان
[دەستکاری]- 1 2 3 4 5 6 7 8 9 10 11 12 13 14 15 16 «کەریم شنگالی (١٩٥٠)». Partipedia. لە ١٥ی حوزەیرانی ٢٠٢٥ ھێنراوە.
- 1 2 3 4 5 «کەریم شنگالی کۆچی دوایی کرد». Kurdistan 24. لە ١٥ی حوزەیرانی ٢٠٢٥ ھێنراوە.
- 1 2 3 «تەرمی کەریم شنگالی گەیشتەوە هەرێمی کوردستان». Kurdistan 24. لە ١٥ی حوزەیرانی ٢٠٢٥ ھێنراوە.
- 1 2 3 4 5 6 7 «بە ئامادەبوونی سەرۆک بارزانی پێشوازیی لە تەرمی سیاسەتمەدار کەریم شنگالی کرا». KDP.info. لە ١٥ی حوزەیرانی ٢٠٢٥ ھێنراوە.
- 1 2 3 4 «تەرمی وەزیری پێشووی ناوخۆی هەرێم بەخاک سپێردرا». TEBA KURDİ. لە ١٥ی حوزەیرانی ٢٠٢٥ ھێنراوە.
- 1 2 3 4 5 «كەریم شنگالی وەزیری پێشووی ناوخۆی هەرێمی كوردستان كۆچی دوایی كرد». Xebat. لە ١٥ی حوزەیرانی ٢٠٢٥ ھێنراوە.
- 1 2 «كەریم شنگالی كۆچی دواییكرد». Esta Media Network. لە ١٥ی حوزەیرانی ٢٠٢٥ ھێنراوە.
- 1 2 3 «تەرمى کەریم شنگالى گەڕێندرایەوە هەولێر». Channel 8. لە ١٥ی حوزەیرانی ٢٠٢٥ ھێنراوە.
- ↑ «وەزیری ناوخۆی پێشووی هەرێمی کوردستان کەریم شنگالی کۆچی دوایی کرد». Anadolu Agency. لە ١٥ی حوزەیرانی ٢٠٢٥ ھێنراوە.
- ↑ «کەریم شنگالی کۆچی دوایی کرد». Kurdistan Bas. لە ١٥ی حوزەیرانی ٢٠٢٥ ھێنراوە.[بەستەری مردوو]
- ↑ «كەریم شنگالی كۆچی دوایی كرد». Wishe. لە ١٥ی حوزەیرانی ٢٠٢٥ ھێنراوە.
- ↑ «کەریم سنجاری کۆچی دوایی کرد». Politic Press. لە ١٥ی حوزەیرانی ٢٠٢٥ ھێنراوە.
- ↑ «تەرمی کەریم شنگالی گەیشتەوە هەرێمی کوردستان». Westga News. لە ١٥ی حوزەیرانی ٢٠٢٥ ھێنراوە.
- ↑ «كەریم شنگالی وەزیری پێشووی ناوخۆی هەرێمی كوردستان كۆچی دوایی كرد». Kurdistan TV. لە ١٥ی حوزەیرانی ٢٠٢٥ ھێنراوە.