بەستەی فاتمە

لە ئینسایکڵۆپیدیای ئازادی ویکیپیدیاوە
Jump to navigation Jump to search
بەشێکی گۆرانیی فاتمە بە دەنگی عەلی مەردانەوە

شیعرێکی ئەحمەد ھەردی کە بە گۆتەی عەلی مەردان ناردوویە بۆ ئەو (عەلی مەردان) تا بیکاتە گۆرانی [١]. عەلی مەردانیش لەسەر مەقامی ئەسفەھان و مەقامی حەجاز کردوویە بە گۆرانی.

شیعری ئەم گۆرانییە بەم جۆرەیە: (ئەڵبەت عەلی مەردان بەشێک لەم شیعرەی کردوووە بە گۆرانی)[٢].


فاتمە! دووچاوی مەستت، پڕ تەلیسمی جوانییە

پڕ شەرابی خۆشەویست و ئارەقی یەزدانییە

بەژن و باڵاکەت نموونەی ھەیکەلی یۆنانییە

لار و لەنجەت مووسیقایە، بەستەیە گۆرانییە

بووکی ڕازاوەی خەیاڵم، گیانەکەم ست فاتمە

تاقە پرشنگێکی چاوت، ئەو پەڕی ئاواتمە


گەرچی دڵداری لە خاکی ئێمەدا ئەفسانەیە

ھەر بە تەنھا بۆ کۆڕی خاوەن تەلار و عانەیە

گیانەکەم ئەمما دڵی من لەو دڵە شێتانەیە

بێ ئەوەی ھیچ شک بەری کۆژراوی ئەو چاوانەیە

ھەر بە تەنھا خۆشەویستێ شک ئەبەم ست فاتیمە

سەروەتم ناوێ بزەی تۆ، ئەو پەڕی ئاواتمە


خۆشەویستی وا کە نامەی خوایە بۆ پێغەمبەران

بەرز و ناسک، وەک ھەناسەی پڕ گۆڵاوی دڵبەران

نەک وەک و ھەز کردنی دینار و گەوھەر پەروەران

ئەو کەسانەی بۆ قڕانێ چەندە دڵیان ھەڵوەران

خەڵقی تر پارەپەرستی با بکەن ست فاتیمە:

من بە تەنھا تۆ پەرستی، ئەو پەڕی ئاواتمە


زۆر کەڕەت ھانم ئەدا داخی دەروونی پرر گڕم

بۆتی ھەڵڕێم سکاڵای ناسکی گەرم و گۆڕم

داخەکەم کاتێ کە دێمە بەر دەمت واقی وڕم

وام ئەشێوێنێ بە جۆرێ نایەڵێ ھیچ دەربڕم

بووکی ڕازاوەی خەیاڵم گیانەکەم ست فاتیمە!

گوێی بۆ ئەم ڕازە شل کەی، ئەو پەڕی ئاواتمە

سەرچاوەکان[دەستکاری]

  1. ^ وتووێژ لەگەڵ ڕادیۆ عێراق
  2. ^ https://www.youtube.com/watch?v=gre85Ic8saQ