ھیوا سەعید

ھیوا سەعید نووسەر و ھۆنراوەنووسێکی کوردە. لە ساڵی‌ ١٩٨٣ لە شاری‌ ھەولێر لەدایکبووە. بە زاراوەی سۆرانی دەنوسی، ئێستا لە باشووری کوردستان لە ھەولێر دەژیت.

https://hiwaseid.blogspot.com/

نیو تەمەن

-١-

بۆ ئەوەی دەڵێ ژیان لەسەر کەس ناوەستێت:

ئەوکاتەی مێژو چەق دەبەستێ

لەسەر قارەمانێک وەستاوە!

-٢-

هەندێک لەدایکبون هەیە

بەستراوەتەوە بە ڕزگاربونی هەزاران قوربانی،

هەندێک مردنیش

یەکسانە بە لەناوچونی هەزاران جەلاد،

قارەمانیش کەسێکە

سەرەتا دەمرێ، ئینجا لەدایک دەبێت!

-٣-

مێژوگۆڕین

خولاندنەوەی نیوەبازنەیەکی ئاگرینە لە تاریکییەوە

نەمری خەڵاتە

بۆ ئەو قارەمانەی لە جوانترین تەمەنی لاوەتی

زو پیر و هیچ خۆشییەک لەخۆی نەبینێت

شایەت ئەو مردوەیە

ئاگری لە چارەنوسێکی وەها بەردا!

هیوا سەعید