مستەفا سائیب
مستەفا سائیب :(١٩٠٤) نووسەر ، چالاكی سیاسی ، ئەندازیار ، لەنەتەوەی كورد بووە.
سەرتای ژیان و خوێندنی[دەستکاری]
مستەفا کوڕی مەلا ئەحمەد کوڕی مەلا قادری قەرەداغییە، ١٩٠٤ لە کفری ھاتووەتە دنیاوە، کاتێک باوکی قازیی ئەوێ بووە. خوێندنی سەرەتاییی لە کفری دەست پێ کردووە و پاشان سەرەتایی و ناوەندیی لە سلێمانی و کەرکووک و ١٩٢٦ قوتابخانەی ئەندازە (مدرسة الهندسة)ی لە بەغدا تەواوکردووە.[١][٢]
چالاكی سیاسی[دەستکاری]
لە دامەزرێنانی (کۆمەڵی لاوانی کورد)ە کە سەرەتای ساڵانی بیست قوتابیانی کورد لە کەرکووک پێکیانھێناوە. پاشان بووە بە ئەندازیار لە دائیرەی ئەشغاڵی سلێمانی، بەڵام لەبەر چالاکیی سیاسیی لە (جەمعییەتی زەردەشتی- ١٩٢٦)دا کە دامەزرێنێکی بووە، دوورخراوەتەوە بۆ ڕەواندز و دیسان لەبەر سەربزێویی سیاسی براوە بۆ مووسڵ. ئەو ماوەیە موعتەمەدی لقی سلێمانیی (جەمعییەتی خۆیبوون) بووە. لەوێ لەگەڵ کۆمەڵێک ڕۆشنبیری دیکەی کورد (کۆمەڵی پێشکەوتنی کوردن- ١٩٢٩)ی پێک ھێناوە. کە دەستیان کەوتووەتە ڕوو، دوورخراوەتەوە بۆ بەسرە و لەوێیشەوە بۆ حللە و پاشان شاری بەغدا.[١][٢]
کۆمەڵی سەربەخۆییی کوردستان[دەستکاری]
پڕۆژەی (نەشرییاتی کوردی- مەریوانی)ی لەگەڵ تاھیر بەھجەت مەریوانی دامەزراندووە، کە ١٤ نامیلکە و کتێبی لە چاپ داوە. ئەندامی دامەزرێنی (کۆمەڵی سەربەخۆییی کوردستان)، (کۆمەڵی پێشکەوتنی کوردان- مووسڵ)، موعتەمەدی لقی سلێمانیی (جەمعییەتی خۆیبوون) بووە.[١][٢]
بەرهەمەكانی[دەستکاری]
یەکەم نووسینی بڵاوکراوەی (بۆچرووک)ە، کە لە پێشبڕکێیەکی ڕۆژنامەی "پێشکەوتن"دا سێیەم بووە. دواتر نووسینی لە "ژیان" و "گەلاوێژ"دا بڵاوکردووەتەوە. سەرجەمی نووسینەکانی کۆکراوەتەوە و لە چاپ دراوە.[١][٢]
سەرچاوەکان[دەستکاری]
- ^ ئ ا ب پ گۆڤاری گەلاوێژ (بەرگی یازدەهەم / بەشی یەكەم ) ژیاننامە و پێڕست ، ئامادەكردنی ( سدیق ساڵح ، ڕەفیق ساڵح ، عبدوڵڵا زەنگەنە ) لە بڵاوكراوەكانی بنكەی ژین بۆ بووژاندنەوەی كەلەپووری و بەڵگەنامەیی و ڕۆژنامەوانیی كوردی .ل8219-8220
- ^ ئ ا ب پ جمال بابان، أعلام الکرد، ج٢، ط٢، ص٤٧١-٤٧٣؛ پێشکەوتن یەکەمین ڕۆژنامەی سلێمانی، ژمارە (١-١١٨) ٢٩/٤/١٩٢٠-٢٧/٧/١٩٢٢، ئامادەکردنی ڕەفیق ساڵح و سدیق ساڵح، (لە بڵاوکراوەکانی بنکەی ژین)، چاپخانەی شڤان- سلێمانی، ٢٠١٢، ل١٦.