عومەر حەسەن

عومەر حەسەن

عومەر حەسەن (١٩٢٢–١٩٩٨) مامۆستا و نووسەری کوردە.

سەرەتای ژیان

عومەر کوڕی حەسەن‌ئاغا کوڕی مەحموودئاغای بچکۆلە کوڕی حەمەئاغای کوڕی مستەفائاغای زەنگەنە و دایکی لە تیرەی سێتەبەسەری ھەمەوەند و بنەماڵەکەی ناسناوی دەوڵەتی ھەیە، ساڵی ١٩٢٢ لە گەڕەکی شێخانی شاری سلێمانی ھاتووەتە دنیاوە. بە شەش ساڵی خراوەتە حوجرەی شێخ حسێنی شێخ مارفی بەرزنجی و فێری قورئان و خوێندنەوە و نووسین بووە. ١٩٣٠ چووەتە قوتابخانەی سەرەتاییی دووەم (پاشتر ئەیووبییە) و ١٩٣٨ تەواوی‌کردووە.

ئەرکی لە دەوڵەت

١٩٤٢–١٩٤٣ کارمەندی دائیرەی پۆستە و تەلەفۆنی سلێمانی بووە. ١٠ی تشرینی یەکەمی ١٩٤٣یش کراوە بە کاتبی تەحریر لە قایمقامییەتی قەزای شارباژێڕ و لەپاڵ وەزیفەکەی‌دا درێژەی بە خوێندن داوە، ١٩٤٦ گەواھینامەی ناوەندیی لە ئامادەییی سلێمانیی ئێواران بەدەست‌ھێناوە. ١٩٤٩ بە پلەی کاتب کارمەندی موتەسەڕیفێتیی لیوای سلێمانی بووە. ئەمجا بووەتە کاتبی تەحریری دووەم لە قایمقامێتیی مەرکەزی سلێمانی. ساڵانی ١٩٥٠–١٩٥٤ کاتب بووە لە بەڕێوەبەرێتیی گشتیی تووتن. ١٩٤٣ خوێندنی ئامادەییشی تەواوکردووە. ١٩٥٤–١٩٥٦ کاتبی مودەقیق بووە لە بەڕێوەبەرێتیی تووتنی کەرکووک.

ژیانی ھاوسەرگیری

١٩٥٥ ڕەسمییەی مستەفای ئەحمەد ئاغای زازاکیی لە مووسڵ ھێناوە و ژیانی خێزانیی پێکەوەناوە.

بەڕێوبەری سەرتێبین

ساڵانی ١٩٦٦–١٩٦٧ لە مووسڵ ژیاوە. لە ١٩٦٨یشەوە ھاتووەتەوە بۆ سلێمانی و پلەی وەزیفەکەی بووەتە سەرتێبینەر و تا ١٩٧٢ پشکنینی تووتنی لە ماوەت، قەڵادزێ و ڕانیە لە ئەستۆ بووە. ١٩٧٣ خۆی خانەنشین‌کردووە.

کتێبخانەی زانستی

١ی تەمووزی ١٩٧٣ (کتێبخانەی زانستی)ی لەسەر شەقامی پیرەمێرد داناوە و پاشان گواستوویەتییەوە بۆ بەرامبەری ئامادەییی پیشەسازیی سلێمانی لە گەڕەکی عەقاری؛ بەڵام لەبەرئەوەی بەخێوکردنی خێزانێکی گەورەی لەسەر شان بووە، ١٠ی تەمووزی ١٩٨٠ جارێکی‌تر چووەتەوە سەر وەزیفە و بووە بە مولاحیزی بەشی تەکنیکی لە بەڕێوەبەرێتیی بانکەکان

مامۆستایەتی

١٠ی شوباتی ١٩٨١ گواستراوەتەوە بۆ سەرنووسەریی بەشی ئەوراقی شارەوانیی سلێمانی. ١٩٨٢ بۆ یەکەمین جار بووە بە مامۆستای قوتابخانەی سەرەتاییی زانا، پاشتر قوتابخانەی یادگار و قوتابخانەی نەخشینی تێکەڵ و ١٠ی ئازاری ١٩٨٦ لە تەمەنی ٦٤ ساڵی‌دا خانەنشین‌بووەتەوە

کۆچی دوایی

پێ‌بەپێ درێژەی بە کتێبفرۆشی داوە، تا لە ڕۆژی ١٥ی ئابی ١٩٩٨دا کۆچی‌دواییی کردووە.

نووسینەکانی

عومەر حەسەن، نووسینی لە گۆڤار و ڕۆژنامەی دیکەی وەک (ھیوا، ڕۆژی نوێ، ھاوکاری، کوردستانی نوێ، وڵات ..)دا بڵاوبووەتەوە.