بزووتنەوەی ھاوکارینەکردن (٢٠٢٤)

خۆپیشاندەران دوای دەست لەکارکێشانەوەی شێخ حەسینە، لە کاتی ئاھەنگگێڕان لە بەرامبەر ئۆفیسی سەرۆکایەتیی وەزیران

بزووتنەوەی ھاوکارینەکردن (بە بەنگالی: অসহযোগ আন্দোলন)، ھەروەھا ناسراو بە بزووتنەوەی یەک خاڵە (بە بەنگالی: এক দফা আন্দোলন)، ناڕەزایەتییەکی دژی حکوومەتی بەنگلادێش بوو، کە لە چوارچێوەی خۆپیشاندانەکانی ٢٠٢٤دا لە بەنگلادێش دەستی پێکرد. تاکە داواکاری ئەم بزووتنەوەیە دەستلەکارکێشانەوەی سەرۆک وەزیران، شێخ حەسینە و کابینەکەی بوو.

ھەرچەندە ئامانجی سەرەتایی چاکسازی لە پشکەکانی ئیشە دەوڵەتییەکاندا بوو، بەڵام بزووتنەوەکە دوای کوژرانی ژمارەیەک لە خۆپیشاندەران بووە ڕاپەڕینێکی جەماوەریی دژی حکوومەت. ھەروەھا بزووتنەوەکە بەھۆی پرسە کۆمەڵایەتی، ئابووری و سیاسییە بەردەوامەکانەوە پەرەی پێدرا، لەوانە خراپ بەڕێوەبردنی ئابووری نیشتمانی لەلایەن حکوومەت، گەندەڵیی بەربڵاوی بەرپرسانی حکوومەە، پێشێلکردنی مافەکانی مرۆڤ، تۆمەتەکانی تێکدانی سەروەریی وڵات لەلایەن شێخ حەسینە و زیادبوونی تاکەڕەوی و پاشەکشەی دیموکراتیک.

لە ٣ی ئابی ٢٠٢٤، ڕێکخەرانی «بزووتنەوەی خوێندکارانی دژە جیاکاری» داواکارییەکی یەک خاڵییان بۆ دەستلەکارکێشانەوەی سەرۆک وەزیران ڕاگەیاند و داوای «ھاوکارینەکردنی ھەمەلایەنە»یان کرد. ڕۆژی دواتر شەڕ و پێکدادان بە شێوەیەکی توندوتیژ ڕوویدا و لە ئەنجامدا ٩٧ کەس کە قوتابیشی لەخۆ دەگرت گیانیان لەدەستدا. ڕێکخەران داوای ڕێپێوانێکی درێژخایەنیان لە ٥ی ئابدا بەرەو داکا کرد بۆ ئەوەی شێخ حەسینە لە دەسەڵات بکشێننەوە. لەو ڕۆژەدا جەماوەرێکی زۆر لە خۆپیشاندەران ڕێگەی خۆیانلەو پایتەخا گرتەبەر. دەوروبەری سەعات ٣:٠٠ی دوای نیوەڕۆ (بە کاتی بەنگلادێش)، شێخ حەسینە دەستی لە پۆستەکەی کێشایەوە و ڕای کردە ھیندستان. دواتر حکوومەتی کاتی بە سەرکردایەتیی محەممەد یوونس، ئابوورناس و براوەی خەڵاتی نۆبێل پێکھێنرا.