ڕاژەی پێڕست

ڕاژەی پێڕست (directory service) سیستەمێکی نەرمەکاڵایییە کە زانیارییەکانی ناو پێڕستێک (دایرەکتۆرییەک) کۆگا دەکا، ڕێکیان دەخا و، دەیانخاتە بەردەست. لە ئەندازیاریی نەرمەکاڵادا، پێڕست ھاوجووتییەکە لەنێوان ناوەکان و نرخەکاندا؛ وەکوو وشەنامەیەک، ڕێگە بۆ گەڕان بەدوای نرخی ناوێکی پێدراو دەکاتەوە. ھەروا کە لە وشەنامەیەکدا لەوانەیە وشەیەک چەندین پێناسەی بێ، لە پێڕستێکیشدا لەوانەیە ناوێک چەندین زانیاریی جۆربەجۆر بدرێتە پاڵی (چەندین نرخی پێوە گرێ بدرێ)، یان خاوەنی چەندین جۆرە-داتا بێ.

بۆ نموونە، سیستەمی ناوی پاوان (DNS) جۆرێک دایرەکتۆرییە. چونکە ئەو سیستەمە ھاوجووتییەکە لەنێوان پاوانەکان (ناوەکان) و ناونیشانەکانی IP -دا (نرخەکان).

لە تۆڕێکی کۆمپیوتەریدا ڕاژەی پێڕست ڕاژەیەکە کە ھەموو کەرەستەکانی سەر ئەو تۆڕە (بریتی لە ناونیشانەکانی ئیمەیل، کۆمپیوتەرەکان، چاپگەرەکان، و ...) دەناسێ و شیاوی دەستپێگەیشتنیان دەکا بۆ بەکارھێنەران و بەرنامەکان. دەشێ ڕاژەی پێڕست تۆپۆلۆژیای تۆڕە فیزیکییەکە و پرۆتۆکۆلەکان بشارێتەوە و ناپەیدایان بکا، تاکوو بەکارھێنەرێکی سەر ئەو تۆڕە بتوانێ بەبێ ئاگاداری لە چۆنیەتیی بەسترانی تۆڕەکە دەستی خۆی بگەیێنێتە ھەر کەرەستەیەک.