جوگرافیای نیوزیلاند
جوگرافیای نیووزیلاند (بە ئینگلیزی: Geography of New Zealan) نیووزلەندا وڵاتێکی دوورگەیییە و دەکەوێتە باشووری ڕۆژاوای زەریای ھێمن و نزیک لە ناوەندی نیوەگۆی ئاو. وڵاتەکە لە ژمارەیەکی زۆر دوورگە پێکھاتووە کە بە نزیکەی ٦٠٠ دوورگە مەزەندە دەکرێت کە زۆربەیان پاشماوەی زەوییەکی گەورەترن کە ئێستا لەژێر دەریادا نوقم بووە. دوو دوورگەی سەرەکی لە ڕووی قەبارەوە بریتین لە دوورگەی باکوور و دوورگەی باشوور کە بە گەرووی کوک جیا دەکرێنەوە. سێیەم گەورەترین دوورگە دوورگەی ستیوارتە، کە دەکەوێتە ٣٠ کم لە نوکی دوورگەی باشوورەوە، لە تەنیشت گەرووی فوڤو. سێ دوورگەی گەورەی ئەم وڵاتە ١٥٠٠ کم لە نێوان پانییەکانی ٣٤ بۆ ٤٧ باشوور درێژ دەبنەوە. نیووزلەندا بە ڕووبەری ٢٦٧ ھەزار و ٧١٠ کیلۆمەتر چوارگۆشە شەشەم وڵاتی دوورگەیییە لە جیھاندا.[١] نزیکەی دوو لەسەر سێی زەوی نیووزلەندا لە ڕووی ئابوورییەوە سوودی ھەیە و ئەوەی دیکەش شاخاوییە.[٢] زۆربەی زۆری دانیشتووانی نیووزلەندا لە دوو دوورگەی سەرەکی باکوور و باشوور دەژین. گەورەترین ناوچەی شارستانی ئۆکلاندە لە باکووری دوورگەی باکوورە. ئەم وڵاتە نزیکەی ٢٠٠٠ کم لە باشووری ڕۆژھەڵاتی ئوسترالیا بەسەر دەریای تاسماندا ھەڵکەوتووە، نزیکترین دراوسێکانی نیووزلەندا لە باکوورەوە بریتین لە نیو کالیدۆنیا، تۆنگا و فیجی.
سەرچاوەکان[دەستکاری]
 |
کۆمنزی ویکیمیدیا، میدیای پەیوەندیدار بە جوگرافیای نیوزیلاند تێدایە. |