بڕیار و ڕێکارەکانی ھەڵبژاردنی ئەنجومەنی نوێنەرانی عێراق، ٢٠٢١

ئەم وتارە سەبارەت بە بڕیار و ڕێکارەکانی ھەڵبژاردنی ئەنجومەنی نوێنەرانی عێراق،٢٠٢١ نووسراوە. بۆ زانیاری زیاتر، بڕوانە ھەڵبژاردنی ئەنجومەنی نوێنەرانی عێراق، ٢٠٢١.

بەپێی ئەو دەسەڵاتەی یاسا بەرکارەکانی عێراق بە کۆمیسیۆنی باڵای سەربەخۆی ھەڵبژاردنەکان بەخشراوە، کۆمیسیۆن بۆ ئەنجامدانی ھەڵبژاردنی ئەنجومەنی نوێنەرانی عێراق ژمارەیەک پەیڕەو و ڕێکار و بڕیاری دەرکردووە.

بڕیارەکانی ئەنجومەنی کۆمیسیاران

ڕۆژی ١٥ی کانوونی یەکەمی ٢٠٢٠، ئەنجومەنی کۆمیسیاران پێشنیاری یونامی بۆ بەکارھێنانی کارتی نیشتمانیی یەکگرتوو لەجیاتی کارتی ئەلیکترۆنیی دەنگدەری تاوتوێکرد.

ڕۆژی ٣٠ی کانوونی یەکەمی ٢٠٢٠، ڕێکارەکانی ھاوپەیمانی و یەکگرتن پەسەندکرا، پەیڕەوی سکاڵا و تانەی ھەڵبژاردن پەسەندکرا.

ڕؤژی ٥ی کانوونی دووەمی ٢٠٢١، ڕێنماییەکانی پشتبەستن بە چاودێرانی ناوخۆ و نوێنەرانی بریکارانی حیزبە سیاسییەکان پەسەندکرا.

ڕۆژی ١٠ی شوباتی ٢٠٢١، ماوەی تۆمارکردنی ھاوپەیمانێتی تا ٢٧ی شوبات درێژکرایەوە، لابردنی مەرجی پێشکەشکردنی سکاڵا لە ناوەندی وردبینی و ڕاگەیاندنی ئەنجامەکان و ڕاپۆرتەکان لە پەیڕەوی سکاڵای ھەڵبژاردن، ڕێنماییەکانی پشتبەستن بە چاودێرانی نێودەوڵەتی و ڕاگەیاندنکاران پەسەندکرا.

ڕۆژی ٢٤ی شوباتی ٢٠٢١، ڕێکارەکانی نوێکردنەوە و تۆمارکردنی دەنگدەرانی عێراقیی تاراوگەی پەسەند کرد، ھەرچەندە دواتر دەنگدانی تاراوگە ھەڵوەشێنرایەوە. دووبارە لێکۆڵینەوە لە نەخشەسازی و چاپکردنی پەڕەی دەنگدان.

ڕۆژی ٢٥ی شوباتی ٢٠٢١، ماوەی تۆمارکردنی ھاوپەیمانێتی تا ١ی ئایاری ٢٠٢١ و ماوەی پێشکەشکردنی لیستی پاڵێوراوان تا ١٧ی نیسانی ٢٠٢١ درێژکرایەوە، تا ئەم ڕێکەوتە تەنھا ١ ھاوپەیمانێتی و ١ حیزب لیستی پاڵێوراوانیان و ٨٦ پاڵێوراوی تاکەکەسی خۆیان تۆمارکردووە.

ڕۆژی ٣ی ئازاری ٢٠٢١، کارگێڕیی ھەڵبژاردن ڕاسپێردرا بۆ ڕێکخستنەوەی دەوامی ناوەندەکانی تۆمارکردن لەژێر ڕۆشنایی ڕێکارەکانی خۆپاراستن.

ڕۆژی ٨ی ئازاری ٢٠٢١، پەیڕەوی دەنگدان و ھەژمارکردن و جیاکردنەوە و ڕێکارەکانی دەنگدان و ھەژمارکردن و جیاکردنەوەی دەنگدانی گشتی و تایبەت پەسەند کران.

ڕۆژی ٢٢ی ئازاری ٢٠٢١، دەنگدانی دەنگدەرانی دەرەوە ھەڵوەشێنرایەوە، بەھۆی ئەوەی دەنگدانی تاراوگە بەکارتی بایۆمەتریی دەنگدەر دەبێت و ڕێکارەکانی کۆرۆنا و بچووکی ڕووبەری باڵیۆزخانە و کۆنسۆڵخانەکانی عێراق ڕێگرن لەجێبەجێکردنی ڕێکارەکانی دەنگدان.

ڕۆژی ٣٠ی ئازاری ٢٠٢١، درێژکردنەوەی ماوەی نوێکردنەوەی تۆماری دەنگدەران تا ١٥ی نیسانی ٢٠٢١.

ڕۆژی ١٤ی نیسانی ٢٠٢١، ڕێگەدان بە حیزبەکانی نێو ھاوپەیمانێتیەکان بەپارێزگاریکردن لەپاڵێوراوەکانیان، بەوەی مەرجەی نابێت ژمارەی پاڵێوراوانی ھاوپەیمانێتیەکە لە ژمارەی کورسیەکانی بازنەی ھەڵبژاردن زیاتر بێت.

ڕۆژی ١٥ی نیسانی ٢٠٢١، درێژکردنەوەی ماوەی پێشکەشکردنی لیستی پاڵێوراوان و تۆمارکردنی ھاوپەیمانی تا ١ی ئایاری ٢٠٢١.