عەلی عیرفان

عەلى عيرفان:(١٨٨٢-١٩٦٨) نووسەر و مامۆستا و چالاكی سیاسی

سەرەتای ژیان و خوێندنی

عەلى عيرفان

کوڕی مەلا عەبدوڵڵای عیرفان کوڕی مەلا ڕەسووڵ کوڕی مەلا مەمەندە، ١٨٨٢ لە گەڕەکی (کانێسکان)ی سلێمانی ھاتووەتە دنیاوە. خوێندنی حوجرەی لای بابی و قوتابخانەی ڕوشدییەی عەسکەریی لە سلێمانی تەواوکردووە.

ئەركی لە دەوڵەت

ئەم وەزیفانەی ھەبوون:

• مامۆستا لە ھەڵەبجە
• کاتب لە دادگای سلێمانی
• کاتب عەدلی دادگای کۆیە. ساڵی ١٩٤٢ خانەنشین بووە.

جەمعییەتی مودافەعەی وەطەن

١٩٢٥ بووە بە ئەندامێکی دامەزرێنی (جەمعییەتی مودافەعەی وەطەن)، کە بۆ پشتیوانیی لکاندنی کوردستانی جنووبی بە عیراقەوە دامەزرێندراوە.

جەمعییەتی زەردەشتی

ئەندامێکی دامەزرێنی (جەمعییەتی زەردەشتی- ١٩٢٦) و دواتر ئەندامی لقی سلێمانیی (جەمعییەتی خۆیبوون) بووە.

ڕۆژنامەی "ژیان"

لە ئەیلوولی ١٩٢٧ەوە کراوە بە بەڕێوەبەری چاپخانەی شارەوانیی سلێمانی و بەرپرسی ژمارەکانی (٨٢-٢٥٩)ی ڕۆژنامەی "ژیان".

پێوەندیی كردن بە ڕووسەوە بۆ مەسەلەی کورد

بە ھۆی شەڕی بەردەرکی سەرای سلێمانییەوە لە ٦/٩/١٩٣٠دا گیراوە و چەند مانگێک لە زیندانێکی کەرکووک توندکراوە. ١٩٤٢ چەند مانگێک بە ڕاسپێریی شێخ لەتیفی حەفید چووەتە ئێران و گەیشتووەتە شاری باکۆی یەکێتیی سۆڤێت، پێوەندیی بە ڕووسەوە کردووە بۆ مەسەلەی کورد. پاشتر ماوەیەک لە پێنجوێن وەکیلی شێخ لەتیف بووە.

ژیانی هاوسەرگیریی

لە خاتوو "خەیرییە حەسەن ڕەفعەت"ی ئامۆزای خۆی؛ ھۆشیار، سەڵاح، زێبا و سەبیحەی ھەن.

كۆچی دوایی

ساڵی ١٩٦٨ کۆچیدواییی کردووە.

نووسینەكانی

یەکەم نووسینی لەپاڵ دوو بابەتی دیکەدا لە ڕۆژنامەی "ژیانەوە"دا بڵاوبووەتەوە.

جگە لە وتاری بڵاوکراوەی ناو (ژیانەوە، ژیان، گەلاوێژ)، ھەر نامیلکەیەکی لە تورکییەوە وەرگێڕدراوی ھەیە:

- ڕۆبن پاشا، کورد لە کەیەوە خەریکە، چاپخانەی فورات - بغداد، ١٩٢٧.

ئەلبوومی وێنەكانی

• 
  عەلی عیرفان و منداڵەکانی
• 
  ١. عادل جەمال عیرفان، ٢. عەلی عەبدوڵڵا عیرفان، ٣. فوئاد ڕەشید بەکر، ٤. عەبدولمەجید ڕەشید بەکر
• 
  عەلی عیرفان، سلێمانی، ١٩٥٠