شێخ مەلا عبدالقادر نەقشبەندی
ناوی تەواوی شێخ مەلا عبدالقادر نەقشبەندی پیر خضری چەمپاراوە، کوڕی سەیید محمد، کوڕی سەیید ئەحمەد، کوڕی سەیید مصطفى، لە نەوەى مامۆستا سەیید حسنە، کە مەزاری پیرۆزی لاى مەزاری پیرمەسورە لە گەڕەکی حاجی حان لە شاری سلێمانی. لە ساداتی پیر خضری شاهۆیە، لە نەسەبەوە ئەگەڕێتەوە بۆ ئیمام (رضا)ی مەشهەد. نازناوى عیرفان و تەریقەتی شاهی سیف الدینی و ڕابەرو مورشیدی گەورەی دیاری رێبازی پیرۆزی نەقشبەندی پێدراوە. لە ڕۆژی چوارممە 21/5/1862 ی زاینی، 10/12/1352 ی کۆچی، 31/2/1313 ی هەتاوی لە شاری سلێمانی، گەڕەکی مەڵکەندی لە دایک بووە.
بنەماڵەى حەزرەتی شێخ مەلا عبدالقادر نەقشبەندی پیر خچری چەمپاراوی
ئەم بنەماڵە پیرۆزە دەگەنەوە بە مامۆستا مەلا سەیید حەسەن کە لە حاجی تەکیەی قەیوانەوە هاتونەتە شارى سولەیمانی و دەچنەوە لە نەسەبا بۆ حەزرەتی ئیمام (رضا)ی مەشهەد لە ئێران.
ناوی کوڕ و کچەکانی
شێخ عزالدین، شێخ شمس الدین، شێخ محمد عمر (کۆچی دوایی کردووە)، شێخ فخر الدین، (کۆچی دوایی کردووە)، حەلاوە خان، رەحمە خان، زەینەب خان، شەمسە خان و نەجیبە خان .
زانست و خوێندنی حەزرەتی شێخ مەلا عبدالقادر نەقشبەندی پیر خچری چەمپاراوی
سەرەتا لە ساڵی 1872 ی زاینی ، دەستی بە خوێندن کردووە لە خزمەت مامۆستا مەلا رەسوڵی پلآوخۆر لە مزگەوتی حاجی حان، پاشان لە خزمەت حەزرەتی کاک ئەحمەدی شێخ لە مزگەوتی گەورەی سلێمانی، پاشان لە خزمەت شێخ مستەفا ناسراو بە موفتی بەرزنجی، لە خزمەت مامۆستا مەلا ئەحمەدی نۆدشی و لە خزمەت مامۆستا مەلا شێخ عبدالقادری موهاجیر، پاشان دەچێتە کۆیە لە خزمەت مامۆستا مەلا عبدالله ی جەلی زادە لە ساڵی 1878 ی زاینی و لە خزمەت مامۆستا مەلا عبدالله جەلی زادە لە ساڵی 1884 ی زاینی بڕوانامەى زانستی وەردەگرێت.
تەسەووف و تەریقەتی شاهی سیف الدین
لە دواى تەواوکردنی زانستی ئیسلامی، روودەکاتە مورشیدی گەورە و پەروەردەکاری بێ وێنە، قوتبی گەورە و خاوەن بەرەکات حەزەرتی شێخ عمر ضیاءالدین نەقشبەندی بیارە، لە دواى 7 ساڵ سەیر و سلوک و تەواو کردنی پلەکانی عیرفان و تەریقەتی نەقشبەندی لە رۆژی شەممە 15/8/1891 ی زاینی بڕوانامەى ئیرشاد لە تەریقەتی نەقشبەندی پێدەبەخشێت و ئەمری پێدەفەرمووێ کە بچێتە ناوچەی شارباژێڕ لە پارێزگای سولەیمانی و لە ساڵی 1894 ی زاینی دەست دەکات بە دروستکردنی خانەقا و مەدرەسەی دینی لە ناوچەکە و ئیرشاد و پەروەردەى موسوڵمانان لەسەر مەنهەجی پاکی ئیسلام و تەریقەتی نەقشبەندی. وەک مورشید و ڕابەرێکی بێ وێنەو بە ئیخلآس و بە توانا خەریک دەبێت تا ساڵی 1924- زاینی، پاشان ڕوو لە کوردستانی رۆژهەڵات دەکات و دەچێتە گوندی چەمپاراو لە ناوچەی شاری بانە، لەوێش خانەقاو مەدرەسەی دینی دروست دەکات، چەمپاراو دەکاتە مەرکەزی عیلم و عیرفان و پەروەردەى رۆحی موریدان، چراخانی چەمپاراو روناکی بەخش دەبێت بۆ کوردستانی ئێران و عێراق.
چەند فەرموودەیەکی شاهی سیف الدین
- هەر کەس چێژی خۆشەویستی خواى لەدڵدا بێت دڵی ئاودێر دەبێت.
- گەیشتن بە خوا دورییەکەى بەپێی نابڕێت، بەڵکو بە دڵ ئەبڕێت.
- ئینسان هەر کات خواى ناسی خۆشی ئەوێت، وە کە خۆشی ویست روو ئەکاتە خوا.
- بە دڵ هەمیشە لە خزمەت خوادا بن.
- دڵتان لە غەیر چوڵ کەن بە خواناسی و نهێنی پڕی کەن.
- زانا و عالمی بێ وەرع وەک چرایە خۆی ئەسوتێنێ و روناکی دەدات بەو شوێنە.
- نەمزانیوە هیچ هەڵەیەک ناشرینتر بێت لە وازهێنان لە زیکری خوا.
- بزانن کە زیکرو یادی خوا هۆکارە بۆ لابردنی خەفەت، کرانەوەى دەرگاى خۆشی و نەمانی ناخۆشی و گەیشتن بە مەبەست.
- هەر کەس دڵ و دەروونی خاوێن بێت زبانیشی راست و پاک دەبێت.
وەفات
فەوتی حەزرەتی شێخ مەلا عبدالقادر نەقشبەندی پیر خضری چەمپاراوی لە رۆژی دووشەممە 26/3/1934 ی زاینی ، 10/12/1352 ی کۆچی لە گوندی چەمپاراوی سەر بە شاری بانەى کوردستانی رۆژهەڵات لە حوجرەى نزدیک بە خانەقای خۆی بە خاک سپێردراوە لە کاتژمێر 6 ی ئێوارە.
چاوگەکان
- حضرة الشيخ الملا عبدالقادر النقشبندي الپيرخضري الچمپاراوي، وجهوده في الدعوة والأرشاد، الشيخ بهاء الدين النقشبندي.
- الوصايا السيفية لمرشد الطريقة النقشبندية، الشيخ بهاء الدين النقشبندي.
- چاوگەى تير ئاو مێژووی شيخانى نەقشبەندی چمپاراو ، شيخ بهاء الدين نەقشبەندی.
- خۆری ژين تەریقەتی نەقشبەندی نورين، شيخ بهاء الدين نەقشبەندی.
- قوتابخانەی شيخانى نەقشبەندی چەمپاراو و رۆڵی زانستی لە كوردستان، عمر أحمد خدر .
- چرای كۆڕی عاریفان چرای كۆڕی عاریفان، شيخ بهاء الدين نەقشبەندی.