تومۆرۆ سپێکیولەیتیڤ فیکشن
 یەکەم ژمارە (کانوونی دووەمی ١٩٩٣)؛ وێنەکێشان لەلایەن ئەلێکس شۆمبێرگەوە | |
| سەرنووسەر | ئەلگیس بودریس |
|---|---|
| یەکەم بڵاوکردنەوە | کانوونی دووەم ١٩٩٣ |
| دوایین ژمارە | شوبات ١٩٩٧ |
| کۆمپانیا | پەڵپھاوس، یوونیفۆنت |
| وێبگە | Archived home page |
تۆمۆرۆ سپێکیولەیتیڤ فیکشن (کوردی: خەیاڵی گریمانەییی سبەی) (بە ئینگلیزی: Tomorrow Speculative Fiction) گۆڤارێکی زانستی خەیاڵی بوو کە لەلایەن ئەلگیس بودریسەوە سەرنووسەری بۆ دەکرا و لە نێوان ساڵانی ١٩٩٢ تا ١٩٩٩ لە ویلایەتە یەکگرتووەکانی ئەمریکا بە شێوەی چاپکراو و ئۆنلاین بڵاو دەکرایەوە. سەرەتا لەلایەن دەزگای بڵاوکردنەوەی پەڵپھاوسەوە دەستی پێکرد، وەک بەشێک لە ھەوڵەکانی بۆ گواستنەوە لە چاپکردنی کتێبەوە بۆ گۆڤار؛ بەڵام کێشەی دارایی وای کرد بودریس دوای یەکەم ژمارە گۆڤارەکە بکڕێت و خۆی بڵاوی بکاتەوە.
لە نێوان ساڵانی ١٩٩٣ تا ١٩٩٧، ٢٤ ژمارەی چاپکراو بڵاو کرایەوە، زۆربەی جار بە شێوەی دوومانگ جارێک. گۆڤارەکە زیانی دەکرد، بۆیە لە ساڵی ١٩٩٧دا بودریس بڕیاری دا بیکاتە گۆڤارێکی ئۆنلاین و ناوی گۆڕی بۆ «تۆمۆرۆسف». کاتێک گۆڤارەکە بە خۆڕایی لەسەر ئینتەرنێت بەردەست بوو، ژمارەی خوێنەرانی زیادی کرد، بەڵام کاتێک بودریس دەستی کرد بە وەرگرتنی پارە بۆ بەشداریکردن، ژمارەی خوێنەران بە خێرایی دابەزی. لە ساڵی ١٩٩٨دا بودریس وازی لە وەرگرتنی بابەتی نوێ ھێنا و تەنھا چیرۆکە دووبارە بڵاوکراوەکانی خۆی بڵاو دەکردەوە. لە ساڵی ١٩٩٩دا گۆڤارەکەی داخست.
تۆمۆرۆ سپێکیولەیتیڤ فیکشن زۆر نووسەری نوێی بڵاو کردەوە، ھەرچەندە کەمیان توانییان ببنە نووسەری سەرکەوتوو. لە نێو نووسەرە ناودارەکان کە لە گۆڤارەکەدا بابەتیان بڵاو کرایەوە، بریتیین لە: جین وۆڵف، ئۆرسۆلا کەی لێ گووین و ھارلان ئێلیسۆن. بەپێی ئینسایکڵۆپیدیای خەیاڵی زانستی، ڕۆمانی «کانەکانی بێھیمۆت»ی مایکڵ شی و چیرۆکی «چیرۆکێکی دیکە»ی لی گوین لە باشترین کارەکانی گۆڤارەکە بوون؛ بەڵام ھەر ئەم سەرچاوەیە دەڵێت کە تۆمۆرۆ سپێکیولەیتیڤ فیکشن «کەمتر لەوە ڕازیکەر بوو کە چاوەڕوان دەکرا لە بودریس: تێکەڵەیەکی ناڕێک لە نێوان کاری باش و کاری ئاسایی».[١] مارک ئاڕ کێلی، ھەڵسەنگێنەری گۆڤاری لۆکەس، چیرۆکەکانی بە «پیشەگەرانە» وەسف کرد.[٢] تۆمۆرۆ سپێکیولەیتیڤ فیکشن لە ساڵانی ١٩٩٤ و ١٩٩٥دا بووە کاندیدی خەڵاتی ھیوگۆ بۆ باشترین نیمچە-گۆڤاری پیشەیی.