ھاینریش بۆڵ
| ھاینریش بۆڵ | |
|---|---|
| بە ئەڵمانی: Heinrich Böll | |
| لەدایکبوون | ٢١ی کانوونی یەکەمی ١٩١٧ کۆلن، ئەڵمانیا |
| مردن | ١٦ی تەممووزی ١٩٨٥ (٦٧ ساڵ ژیاوە) Langenbroich، ئەڵمانیا |
| ناوی کاتی لەدایکبوون | Heinrich Theodor Böll |
| شوێنی ناشتن | old cemetery Merten |
| ھاوسەر | Annemarie Böll |
| منداڵ | René Böll، Raimund Böll |
| خزمەکان | Aloys Böll |
| زمانەکانی ئاخاوتن | زمانی ئەڵمانی |
| زمانی نووسین | زمانی ئەڵمانی |
| بواری کار | fiction، نووسینی داھێنەرانە و پیشەیی، radio drama، وەرگێڕان |
| پۆستەکان | سەرۆک |
| پەروەردە | Universität zu Köln |
| شوێنی کار | کۆلن |
| نەژاد | ئەڵمانییەکان |
| ئایین | کڵێسای کاتۆلیک |
| ناکۆکی | جەنگی جیھانیی دووەم |
| ئەرشیڤەکان لە | Historisches Archiv mit Rheinischem Bildarchiv، Lilly Library |
| Documentation files at | SAPA Foundation, Swiss Archive of the Performing Arts |
ھاینریش تیۆدۆر بۆڵ (بە ئینگلیزی: Heinrich Theodor Böll) (٢١ی کانوونی دووەمی ١٩١٧ – ١٦ی تەممووزی ١٩٨٥) نووسەرێکی ئەڵمانی بوو. بە یەکێک لە گرنگترین نووسەرانی ئەڵمانیا لە دوای شەڕی جیھانیی دووەم دادەنرێت. بۆڵ لە ساڵی ١٩٦٧ خەڵاتی گیۆرگ بۆشنەر و لە ساڵی ١٩٧٢ خەڵاتی نۆبێلی وێژەی وەرگرت.[١]
ژیاننامە
[دەستکاری]بۆڵ لە شاری کۆلن لە ئەڵمانیا لە خێزانێکی کاتۆلیکی ڕۆمی و ئاشتیخواز لەدایک بوو؛ خێزانەکەی دواتر دژی نازیسم بوون. بۆڵ لە دەیەی ١٩٣٠دا ڕەتی کردەوە بچێتە ڕێکخراوی گەنجانی ھیتلەر.[٢] پێش ئەوەی لە زانکۆی کۆلن ئەڵمانیناسی بخوێنێت، لەلای کتێبفرۆشێک شاگرد بوو. بۆڵ بە زۆرەملێ بۆ سوپای ئەڵمانیا نێردرا و لە شەڕ لە پۆڵەندا، فەڕەنسا، ڕۆمانیا، مەجارستان و یەکێتیی سۆڤیەت خزمەتی کرد. لە ساڵی ١٩٤٢دا لەگەڵ ئانێ ماری چێخ ھاوسەرگیری کرد و سێ کوڕیان بوو؛ ئانێ ماری دواتر لە چەندین وەرگێڕانی وێژەی ئینگلیزی بۆ ئەڵمانی ھاوکاری لەگەڵ کرد. بۆڵ لە ماوەی خزمەت لە شەڕدا چوار جار بریندار بوو و تووشی تایفۆسیش ھات. لە نیسانی ١٩٤٥دا لەلایەن سەربازانی سوپای ئەمریکا دەستگیر کرا و نێردرا بۆ کەمپی دیلەکانی جەنگ.[٣] دوای شەڕ، گەڕایەوە کۆلن و لە دوکانی کابینەتسازیی خێزانەکەی دەستی بە کارکردن کرد. بۆ ماوەی ساڵێکیش لە بەشی ئامار و زانیاریی شارەوانی کاری کرد، بەڵام حەزی لە کارەکە نەبوو و وازی لێ ھێنا و بڕیاری دا ببێت بە نووسەر.[٤]
بۆڵ لە تەمەنی ٣٠ ساڵیدا بوو بە نووسەرێکی پیشەیی و تەواو-کات. یەکەم ڕۆمانی، «شەمەندەفەرەکە لە کاتی خۆیدا گەیشت» (Der Zug war pünktlich)، لە ساڵی ١٩٤٩ بڵاو کرایەوە. ھەمان ساڵ بانگھێشتی کۆبوونەوەی گرووپی ٤٧، کۆمەڵێک لە نووسەرانی ئەڵمانی، کرا و لە ساڵی ١٩٥١ کاری بۆڵ بە باشترین کاری پێشکەشکراو لەو کۆبوونەوەیە دانرا.[٥] لە دوای ئەوە، ڕۆمان و چیرۆکی کورت و نمایشنامەی ڕادیۆیی و کۆمەڵەوتار و بەرھەمی ئەدەبیی زۆری بڵاو کردەوە.
خەڵات، ڕێزلێنان و پۆستەکان
[دەستکاری]بۆڵ نووسەرێکی زۆر سەرکەوتوو بوو و لە چەندین بۆنەدا خەڵات و ڕێزلێنانی پێ بەخشرا. لە ساڵی ١٩٥٣ خەڵاتی کولتووری ئەڵمانی، خەڵاتی ڕادیۆی باشووری ئەڵمانی و خەڵاتی ڕەخنەگرانی ئەڵمانی وەرگرت. لە ساڵی ١٩٥٤ خەڵاتی تریبوونی پاریسی پێ بەخشرا. لە ساڵی ١٩٥٥ خەڵاتی فەڕەنسیی باشترین ڕۆمانی بیانی وەرگرت. لە ساڵی ١٩٥٨ خەڵاتی ئێدوارد ڤۆن دێر ھایدتی شاری ووپارتال و خەڵاتی ئەکادیمیای ھونەرە جوانەکانی باڤاریای بەدەست ھێنا. لە ساڵی ١٩٥٩ خەڵاتی ھونەری گەورەی ویلایەتی ڕاینی باکوور-وێستفالیا و خەڵاتی ئەدەبی شاری کۆلنی وەرگرت و بۆ ئەندامێتی ئەکادیمیای زانست و ھونەرەکانی ماینتس ھەڵبژێردرا.
لە ساڵی ١٩٦٠ بوو بە ئەندامی ئەکادیمیای ھونەرە جوانەکانی باڤاریا و خەڵاتی شارڵ ڤەیۆنی بەدەستھێنا.
لە ساڵی ١٩٦٧ خەڵاتی گیۆرگ بۆشنەری پێ بەخشرا.[٦]
لە ساڵی ١٩٧٢ خەڵاتی نۆبێلی وێژەی وەرگرت.[٧] تا کاتی مردنی، ژمارەیەک خەڵاتی ڕێزلێنان و پلەی ئەکادیمی وەرگرت؛ لەوانە ئەندامێتی ئەکادیمیای ھونەر و وێژەی ئەمریکا لە ساڵی ١٩٧٤ و مەدالیای ئۆسیێتسکی لە ھەمان ساڵ، کە بەھۆی بەرگریی لە مافەکانی مرۆڤ و بەشداریی لە پەرەپێدانی مافەکانی مرۆڤ لە سەراسەری جیھاندا پێی بەخشرا.
بۆڵ لە ساڵی ١٩٧١ تا ١٩٧٣ سەرۆکی پێن ئینتەرنەشناڵ بوو.[٨]
بۆڵ لە ساڵی ١٩٨٣ بۆ ئەنداماتی ڕێکخراوی فەلسەفیی ئەمریکا ھەڵبژێردرا و لە ساڵی ١٩٨٤یش بوو بە ئەندامی ئەکادیمیای ھونەر و زانستەکانی ئەمریکا.[٩][١٠]
بەرھەمەکان
[دەستکاری]بەرھەمەکانی بۆڵ بۆ زیاتر لە ٣٠ زمان وەرگێڕدراون و ئێستاش یەکێکە لە پڕخوێنەرترین نووسەرانی ئەڵمانیا. بەناوبانگترین بەرھەمەکانی بریتین لە:
- بیلیارد لە کاتژمێر نۆ و نیو (١٩٥٩)
- تەنانەت وشەیەکیشی نەگوت (١٩٥٣)
- نانی ساڵانی لاوی (١٩٥٥)
- ڕوانگەکانی گەپجاڕێک (١٩٦٣)
- پۆرترەی ژنێک لەنێو خەڵکدا (١٩٧١)
- شکۆی لەدەستچووی کاترینا بلوم (١٩٧٤)
- تۆڕی ئاسایش (١٩٧٩).
ئەگەرچی بابەت و ناوەڕۆکی بەرھەمەکانی بۆڵ جۆراوجۆرن، بەڵام ھەندێک شێواز و دەستمایە بەردەوام لە نووسینەکانیدا دووبارە دەبنەوە. بەشێکی زۆری بەرھەمەکانی ژیانی تایبەتی و ئاسایی مرۆڤ دەخاتەڕوو؛ ژیانێک کە تێیدا مرۆڤەکان ھەوڵ دەدەن لە شەڕ، تیرۆر، دابەشبوونە سیاسییەکان و گۆڕانکارییە قووڵە ئابووری و کۆمەڵایەتییەکاندا خۆیان بپارێزن. زۆرێک لە پاڵەوانە سەرەکییەکانی بەرھەمەکانی کەسانێکی سەرسەخت و تاکڕەو و تاڕادەیەک نامۆ و نائاسایین، کە لەبەرامبەر میکانیزمەکانی دەوڵەت یان دامەزراوە گشتییەکاندا خۆڕاگری دەکەن.[١١]
سەرچاوەکان
[دەستکاری]- ↑ Conard 1992، لاپەڕە xviii.
- ↑ Michael H KATER؛ Michael H Kater (30 April 2006). Hitler Youth. Harvard University Press. لاپەڕە 24–. ژپنک ٩٧٨-٠-٦٧٤-٠١٩٩١-١. لە 26 August 2012 ھێنراوە.
- ↑ Conard 1992، لاپەڕەکانی xvi–xvii.
- ↑ Steinhauer، Harry (1984). Deutsche Erzählungen. University of California Press. لاپەڕە 423. ژپنک ٠-٥٢٠-٠٥٠٥٤-١. لە 20 July 2014 ھێنراوە.
- ↑ Magill، Frank N.، ed. (2013). The 20th Century A-GI: Dictionary of World Biography, Volume 7. Routledge. لاپەڕە 349. ژپنک ٩٧٨-١-١٣٦-٥٩٣٣٤-٥. لە 29 June 2014 ھێنراوە.
- ↑ Conrad، Robert C. (1992). Understanding Heinrich Böll. University of South Carolina Press. لاپەڕە 14–15. ژپنک ٠-٨٧٢٤٩-٧٧٩-٨. لە 23 July 2014 ھێنراوە.
- ↑ «Nobel Prize in Literature 1972». NobelPrize.org.
- ↑ Conard 1992، لاپەڕە ١٥.
- ↑ «APS Member History». search.amphilsoc.org. لە 25 May 2022 ھێنراوە.
- ↑ «Heinrich Theodor Boll». American Academy of Arts & Sciences (بە ئینگلیزی). لە 25 May 2022 ھێنراوە.
- ↑ Draugsvold، Ottar G.، ed. (2000). Nobel Writers on Writing. McFarland. لاپەڕە 121. ژپنک ٠-٧٨٦٤-٠٦٢٩-١. لە 29 June 2014 ھێنراوە.