ئەم وتارە ھەتیوە. بە زیادکردنی بەستەرێک لە وتارێکی پەیوەندیدارەوە یارمەتی بدە

ھاوڕێکان (زنجیرەی تەلەڤیزیۆنی)

لە ئینسایکڵۆپیدیای ئازادی ویکیپیدیاوە
باز بدە بۆ: ڕێدۆزی، گەڕان
هاوڕێکان
دەرھێنان دەیڤد کرەین مارتا کاوفمان
چەشنی فیلم {{{چەشن}}}
کاست کۆرتێنی کۆکس ، جێنیفەر ئەنیستن ، لیزا کودرۆو ، مات لیبلانک ، مایۆ پێری ، دەیڤد شویمەر،
مۆسیقا مایکڵ سکلۆف ئالی ویڵز
ڕێکەوتی دەرچوون ١٩٩٤ - ٢٠٠٤
وڵات ویلایەتە یەکگرتووەکانی ئەمریکا
زمان ئینگلیزی

هاوڕێکان (بە ئینگلیزی Friends) زنجیرەیەکی ئەمریکی کۆمێدیای دۆخیە کە لە لایەن دەیڤد کرەین و مارتا کاوفمانەوە دروستکراوە و لە ساڵی ١٩٩٤ دەستی پێکردووە لە کەناڵی ئێن بی سی پەخش کراوە تا ساڵی ٢٠٠٤ و لە دە وەرز پێکهاتووە ، کۆرتێنی کۆکس و جێنیفەر ئەنیستن و لیزا کودرۆ و مات لیبلانک و ماسیۆ پێری و دەیڤد شویمەر ئەکتەرە سەرەکیەکانی زنجیرەکەن.

زنجیرەی هاوڕێکان بە یەکێک لە باشترین زنجیرەکان دادەنرێت لە مێژودا[١]، وە هەروەها لە ڕیزبەندی ٢١ دیاریکرا لە ڕێنیشاندەری مەزنترین ٥٠ زنجیرەی مێژوو[٢]،لە لایەن گۆڤاری ئیمپایەریشەوە وەک حەوتەمین باشترین زنجیرەی مێژوو دیاریکرا[٣]،هەروەها ٦٨ خەڵاتی بەدەستهێناوە لەنێویشیاندا خەڵاتێکی گۆڵدن گڵۆب[٤]

پوختە[دەستکاری]

ڕەیچڵ گرین دوای ئەوەی لە ئاهەنگی هاوسەرگیریەکەی هەڵدێت سەردانی هاوڕێ کۆنەکەی دەکات کە لە دواناوەندی پێکەوە بوون بە ناوی مۆنیکا گیلەر کە چێشتلێنەرەو پێکەوە دەبنە هاوماڵ ، ڕەیچڵ دەبێتە هاوڕێی هاوڕێکانی مۆنیگا کە پێکهاتون لە جۆیی تریبیانی ئەکتەر و چاندلەر بینگ کە پیشەکەی کەمێک هاوشێوەی ژمێریارە و فیبی بوفای کە گۆرانیبێژ و مەساجکەرە هەروەها ڕۆس گیلەریش کە برای مۆنیکایە و تازە لە هاوسەرەکەی جیابۆتەوە و لە مۆزەخانە کار دەکات

زنجیرەکە لە ساتە ڕۆمانتیک و کۆمیدیەکانی ئەم شەش هاوڕێیە پێکدێت و کە لە ماوەی دە وەرزی زنجیرەکەدا هەریەکێکیان زۆرجار دەکەونە خۆشەویستیەوە

کەسایەتییەکان[دەستکاری]

زنجیرەکە لە شەش کارەکتەری سەرەکی پێکهاتووە

  • مات لیبلانک لە ڕۆڵی جۆیی تریبیانی : جۆیی ئەکتەرێکە کە کێشەی دەرنەکەوتنی هەیە لە بوارەکەیدا و حەزی زۆر بە خواردنە، دوای ئەوەی لە زنجیرەی ڕۆژەکانی ژیانمان ڕۆڵێک دەگێڕێت بەناوبانگ دەبێت بەڵام بەهۆی ئەوەی جۆیی لەکاتی گێڕانی ڕۆڵەکەیدا وتەی خۆی تێکەڵی سیناریۆکە دەکات نوسەرانی زنجیرەکە بڕیار دەدەن بیکوژن لەناو زنجیرەکەدا ، جۆیی مێشکێکی سادەی هەیە و حەزی بە ئافرەتە بەڵام زۆربەی پەیوەندیەکانی ماوەکورتن
  • ماسیۆ پێری لە ڕۆڵی چاندلەر بینگ : شیکەرەوەی داتای کۆمپانیایەکی گەورەیە و ڕقی لە کارەکەیەتی دەیەوێت واز لە کارەکەی بهێنێت بەڵام دوای ئەوەی ئۆفیسێکی تایبەتی دەدەنێ و موچەکەی بەرزدەکەنەوە پەشیمان دەبێتەوە ، چاندلەر بە وتە و تانە تەنز ئامێزەکانی ناسراوە و زۆر نازانێت لەبارەی پەیوەندی لەگەڵ ئافرەتان بۆیە پەیوەندی ناسەرکەوتوی زۆری هەیە لەگەڵ ئافرەتان ، چاندلەر لە بنەماڵەیەکی سەیر و نامۆوە هاتووە دایکی نوسەری ڕۆمانە هەوەس جوڵێنەکانە و باوکیشی هاوڕەگەزبازە و خەڵكیش کاتێک بۆ یەکەمجار چاندلەر دەبینن پێیانوایە هاوڕەگەزبازە ، یەکێک لە پەیوەندیە هەمیشەییەکانی چاندلەر جانیسە کە بەردەوام پەیوەندی لەگەڵ یەک دەبەستن و لێکجیا دەبنەوە و جۆیی هاوڕێشی جانیسی خۆشناوێت ، ماسیۆ پێری لە دیمانەیەکدا ڕایگەیاند کەسایەتی چاندلەر لە چەندین لایەنەوە لە کەسایەتی ڕاستی خۆیەوە نزیکە بۆوێنە لە وتە تەنزئامێزەکانی و بوونی کێشەی پەیوەندی لەگەڵ ئافرەتان[٥]
  • دەیڤد شویمەر لە ڕۆڵی ڕۆس گیلەر : برای گەورەی مۆنیکایە پیشەی پاشماوەناسە و لە مۆزەخانە کار دەکات و کەسێكی ڕوخۆشە و سەرکەوتوە لە پیشەکەیدا و لە چاو هاوڕێکانیدا زیرەکترە و زانیاری زیاتری هەیە ، ڕۆس لە کاتی خوێندنی دواناوەندیەوە کەوتۆتە داوی خۆشەویستی ڕەیچڵی هاوڕێی مۆنیکای خوشکیەوە و بە درێژایی زنجیرەکە چەندین جار پەیوەندی دەبەستن لەگەڵ یەک و لێکجیا دەبنەوە ، ڕۆس یەکەمین هاوسەرگیری ناسەرکەوتو دەبێت دوای ئەوەی بۆی دەردەکەوێت هاوسەرەکەی هاوڕەگەزبازە و دواتریش شکستی دیکە دەهێنێت لە هاوسەرگیریدا و هەر لەسەرەتای زنجیرەکەوە دەبێتە خاوەنی منداڵێک لە هاوسەری یەکەمی کە لێی جیابۆتەوە و لەگەڵ ڕەیچڵیش دەبێتە خاوەنی منداڵێک
  • جێنیفەر ئەنستن لە ڕۆڵی ڕەیچڵ گرین : پیشەی ڕەیچڵ پەیوەندی بە جل و بەرگو دیزاینەوە هەیە و سەرەتا خزمەتکارە لە قاوەخانەکە ، هەر لە مناڵییەوە باشترین هاوڕێی مۆنیکا بووە و یەکەم دەرکەوتنی ڕەیچڵ کاتێکە دەچێتە ناو قاوەخانەکەوە و بە دوای مۆنیکا دەگەڕێت دوای ئەوەی ئاهەنگی هاوسەرگیریەکەی جێهێشتووە بەهۆی ئەوەی پێیوابووە دەسگیرانەکەی خۆش ناوێت ، ڕەیچڵ لەگەڵ ڕۆس چەندین جار پەیوەندی دەبەستن و جیا دەبنەوە و دەبێتە خاوەنی منداڵێک لە ڕۆس
  • کۆرتەینی کۆکس لە ڕۆڵی مۆنیکا گیلەر : چێشتلێنەرە وەکو دایکی گروپەکە وایە و کەسایەتیەکی هەیە حەز دەکات هەمیشە براوە بێت و سەرۆکانە مامەڵە دەکات ، مۆنیکا لە منداڵیدا قەڵەو بووە و هەر لەبەر ئەوە گاڵتەی زۆری پێکراوە بە تایبەت لە لایەن ڕۆسی برایەوە ، لە ماوەی زنجیرەکەدا مۆنیکا لە چەندین چێشتخانە کار دەکات و چەندین پەیوەندی جدی دەبەستێت کە یەکەمین پەیوەندی جدی مۆنیکا ڕیچاردە کە هاوڕێی خێزانەکەیانە و ٢١ ساڵ لە مۆنیکا گەورەترە بۆیە چاندلەر پێێ دەڵێت ''ڕیچارد تەمەنی لە زۆربەی خەڵکی زیاترە بەڵام تەمەنی لە هەندێک لە بیناکان کەمترە'' ، مۆنیکا حەزی بە منداڵە و هەر ئەوەش کێشەی بۆ دروست دەکات لەگەڵ ڕیچاردا ، مۆنیکا و چاندلەر لە کۆتایی وەرزی چوارەم لە لەندەن لە ئاهەنگی هاوسەرگیری ڕۆس دەکەونە پەیوەندیەوە لەگەڵ یەکترە و دواتر پەیوەندیەکەیان بە هاوسەرگیری کۆتایی دێت
  • لیزا کودرەو لە ڕۆڵی فیبی بوفای : مەساجکەرەو مۆسیقاش دەژەنێت و گۆرانیش دەڵێت ، فیبی بە منداڵی لەسەر شەقامەکان ژیاوە دوای ئەوەی دایکی خۆیکوشتووە بەڵام لەگەڵ ئەوەشدا زیرەکە و خۆی فێری گیتار کردووە و تواناشی هەیە بە زمانی فەڕەنسی قسە بکات و[٦] ، فیبی گۆشت ناخوات و هەندێک بیروباوەڕی سەیریشی هەیە و خوشکێکی دووانەی هەیە کە پەیوەندیان باش نییە پێکەوە ، فیبی بە درێژای زنجیرەکە سێ پەیوەندی جدی دەبێت یەکەمیان لە وەرزی یەک لەگەڵ دەیڤد کە کەسێکی زانستیە و دووهەمینیان لەگەڵ گاری کە پۆلیسە و سێهەمینیشیان لە وەرزی نۆهەمین لەگەڵ مایک هانیگن

کاست[دەستکاری]

لە وەرزی یەکەمی زنجیرەکە هەر یەکێک لە شەش ئەکتەرەکە ٢٢.٥٠٠ دۆلاریان وەردەگرت بۆ هەر ئەڵقەیەک[٧] لە وەرزی دووەم هەر کەسەو بڕەپارەیەکی جیای وەردەگرت بۆ هەر ئەڵقەیەک کە لە ٢٠٠٠٠ دۆلارەوە دەستی پێدەکرد تا ٤٠٠٠٠ دۆلار[٨] لە وەرزی سێیەم ئەکتەرەکان بڕیاریاندا بەقەدەر یەک پارە وەرگرن هەرچەندە کۆمپانیای وارنەر برۆز دەیویست هەر ئەکتەرەو بڕێکی جیا وەرگرێت[٩]  وەرزی سێیەم بۆ هەر ئەڵقەیەک ٧٥٠٠٠ دۆلاریان وەردەگرت . وەرزی چوار ٨٥٠٠٠ دۆلار ، وەرزی پێنج ١٠٠٠٠٠ دۆلار ، وەرزی شەش ١٢٥٠٠٠ دۆلار، وەرزی حەوت و هەشت ٧٥٠٠٠٠ دۆلار ، وەرزی نۆ و دە بۆ هەر ئەڵقەیەک یەک ملیۆن دۆلار کە بەم بڕە پارەیە ئەنیستن و کۆکس و کودرەو بوونە گرانترین ژنە ئەکتەرەکانی مێژووی تەلەڤیزیۆن[٧]

پەراوێزەکان[دەستکاری]

  1. ^ تایم : ؛ لیستی باشترین ١٠٠ زنجیرەی مێژوو- کۆتا سەردان ٢٢ی ٤ی ٢٠١٧
  2. ^ سی بی سی نیوز - مەزنترین ٥٠ زنجیرە،کۆتا سەردان ٢٢ی ٤ی ٢٠١٧
  3. ^ لیستاڵ - باشترین زنجیرەکان بەپێی گۆڤاری ئیمپایەر- کۆتا سەردان ٢٢ی ٤ی ٢٠١٧
  4. ^ براوەکانی خەڵاتی گۆڵدن گڵۆب ٢٠٠٣ - کۆتا سەردان ٢٢ی ٤ی ٢٠١٧
  5. ^ دیمانەی ماسیۆ پێری - یوتیوب - کۆتا سەردان ٢٥ی ٤ی ٢٠١٧
  6. ^ زنجیرەی هاوڕێکان وەرزی ١٠ ئەڵقەی ١٣
  7. ^ a b بزنس ئینسایدەر : کاستی هاوڕێیان چۆن گەیشتن بە ملیۆنێک دۆلار بۆ هەر ئەڵقەیەک- کۆتا سەردان ٢٧ی ٨ی ٢٠١٧
  8. ^ نیۆرک تایمس - معاشی کاستی هاوڕێیان- کۆتا سەردان ٢٧ی ٨ی ٢٠١٧
  9. ^ ئی دەبلوی - هاوڕێیان بەرزکردنەوە ڕەتدەکەنەوە - کۆتا سەردان ٢٧ی ٨ی ٢٠١٧