گەرمکەرەوەی کارەبایی

کۆیلی گەرمکردنی بەرگریی ٣٠ کیلۆوات

ئەم گەرمکەرەوە تیشکدەرەوەیە چرای تەنگستن ھالۆجین بەکاردەھێنێت.

گەرمکردنی کارەبایی پرۆسەیەکە کە تێیدا وزەی کارەبایی ڕاستەوخۆ دەگۆڕدرێت بۆ وزەی گەرمی. بەکارھێنانە باوەکانی بریتین لە گەرمکردنی بۆشایی، چێشتلێنان، گەرمکردنی ئاو و پرۆسە پیشەسازییەکان. گەرمکەرەوەی کارەبایی ئامێرێکی کارەبایییە کە تەزوویەکی کارەبایی دەگۆڕێت بۆ گەرما. توخمی گەرمکەرەوە لەناو ھەموو گەرمکەرەوەیەکی کارەباییدا بەرگریکارێکی کارەبایییە، و لەسەر بنەمای گەرمکردنی جووڵ کاردەکات: تەزوویەکی کارەبایی کە بەناو بەرگریکارێکدا تێدەپەڕێت، ئەو وزە کارەبایییە دەگۆڕێت بۆ وزەی گەرمی. زۆربەی ئامێرە گەرمکەرەوە کارەبایییە مۆدێرنەکان وایەری نیکرۆم وەک توخمی چالاک بەکاردەھێنن؛ توخمی گەرمکەرەوەکە، کە لە لای ڕاستدا نیشان دراوە، وایەری نیکرۆم بەکاردەھێنێت کە لەلایەن داپۆشەری سیرامیکییەوە پاڵپشتی کراوە.

لە لایەکی ترەوە، پەمپێکی گەرمی دەتوانێت کارایییەکی نزیکەی ١٥٠٪ – ٦٠٠٪ بۆ گەرمکردن بەدەستبھێنێت، یان ھاوکۆلکەی کاراییی ١٫٥–٦٫٠، چونکە توانای کارەبایی تەنھا بۆ گواستنەوەی وزەی گەرمیی بوونیار بەکاردەھێنێت. پەمپی گەرمی بزوێنەرێکی کارەبایی بەکاردەھێنێت بۆ بەڕێوەبردنی سووڕێکی ساردکردنەوەی پێچەوانە، کە وزەی گەرمی لە سەرچاوەیەکی دەرەکییەوە وەک زەوی یان ھەوای دەرەوە (یان ناوەوەی ساردکەرەوەیەک) ڕادەکێشێت و ئەو گەرمییە ئاراستەی ئەو بۆشایییە دەکات کە دەبێت گەرم بکرێت (لە حاڵەتی ساردکەرەوەدا، چێشتخانەکە). ئەمە بەکارھێنانێکی زۆر باشتری وزەی کارەبایییە وەک لە گەرمکردنی کارەباییی ڕاستەوخۆ، بەڵام پێویستی بە ئامێری زۆر گرانتر و ھەروەھا بۆری ھەیە. ھەندێک سیستەمی گەرمکردنەوە دەکرێت بە پێچەوانەوە بۆ فێنککردنەوە کار پێ بکرێن، بە شێوەیەک کە بۆشاییی ناوەوە فێنک دەکرێتەوە و ھەوا یان ئاوی گەرمتر فڕێ دەدرێتە دەرەوە یان ناو زەوی.