کۆچی سلاڤییەکان بۆ بالکان

زێدی سلاڤی و کۆچکردن لە سەدەی شەشەم و حەوتەمدا (بەپێی Dvornik 1956; Váňa 1983; Sedov 1994, 1995; Barford 2001).

سلاڤە سەرەتایییەکان لە سەرەتای سەدەکانی ناوەڕاستدا، لە نێوان نیوەی یەکەمی سەدەی شەشەم و سەدەی حەوتەم، دەستیان بە کۆچێکی بەرفراوان کرد بۆ باشووری ڕۆژھەڵاتی ئەورووپا. ئەم بڵاوبوونەوە خێرا دیمۆگرافییەی سلاڤەکان، بووە ھۆی ئاڵوگۆڕی دانیشتووان، تێکەڵبوون، و گۆڕانی زمانیی لێکەوتەوە، کە بریتی بوو لە گۆڕینی زمانەکان بۆ سلاڤی و گۆڕانکاری لە خودی زمانی سلاڤیدا.

کەمبوونەوەی بەرچاوی دانیشتووانی باشووری ڕۆژھەڵاتی ئەورووپا بەھۆی تاعوونی یۆستینیانەوە، کارئاسانیی بۆ ئەم نیشتەجێبوونە کرد. ھۆکارێکی دیکە بریتی بوو لە سەردەمی سەھۆڵبەندانە بچووکەکەی کۆتایی سەردەمی کلاسیک (کە لە ٥٣٦ تا نزیکەی ٦٦٠ی زایینی بەردەوام بوو)، لەگەڵ زنجیرەیەک جەنگ لەنێوان ئیمپراتۆرییەتیی ساسانی و گەلە کۆچەرەکانی ستێپ دژی ئیمپراتۆرییەتیی ڕۆمیی ڕۆژھەڵات. دوای ھاتنی ئاڤارەکان بۆ پانونیا لە ناوەڕاستی سەدەی شەشەمدا، سلاڤەکان بەردەوام بوون لە ھێرشکردنە سەر خاکەکانی ڕۆم، کە زۆرجار ئەم ھێرشانە سەربەخۆ بوون لە جووڵەی ئاڤارەکان. دوای گەمارۆدانی شکستخواردووی قوستەنتینییە لە ھاوینی ساڵی ٦٢٦ و ڕاپەڕینێکی سەرکەوتوو دژی ئاڤارەکان، سلاڤەکان لە ناوچە فراوانەکانی باشووری ڕۆژھەڵاتی ئەورووپادا مانەوە. ئەوان لە پارێزگا بیزەنتییەکانی باشووری ڕووبارەکانی ساڤا و دانوب نیشتەجێ بوون، کە لە دەریای ئادریاتیکەوە درێژ دەبووەوە تا دەریای ئیجە و دەریای ڕەش.

ئیمپراتۆرییەتیی بیزەنتی بەھۆی چەند ھۆکارێکەوە لاواز ببوو و دەسەڵاتی تەنھا بەسەر ناوچە کەنارییەکانی بەڵکاندا شکایەوە. لەبەر ئەوەی نەیدەتوانی لە دوو بەرەی جیاوازدا شەڕ بکات و خاکە لەدەستچووەکانی وەربگرێتەوە، ناچار بوو لەگەڵ دامەزراندنی میرنشینە سلاڤییەکان (سکلاڤینیاکان) ئاشت بێتەوە و ھاوپەیمانییان لەگەڵ ببەستێت دژی خاگاناتەکانی ئاڤار و بولگار.