ڤیان فایەق

ڤیان فایەق
مەرگ	٢٠١١ بەغدا، عێراق
نەتەوە	کورد
پیشە	گۆرانیبێژ، ژەنیاری گیتار
چالاکبوون	١٩٨٠–١٩٨٤
کارە ناودارەکان	ھەی مینە، خانە میری، ھۆپ زیندان

ڤیان فایەق ھونەرمەند، گۆرانیبێژ و ژەنیاری گیتاری کورد بوو، کە لە سەرەتای ساڵانی ھەشتاکانی سەدەی بیستەمدا وەک یەکێک لە دیارترین دەنگەکانی تیپی مۆسیقای خانزاد دەرکەوت.

ژیانی ھونەری

ڤیان فایەق لە ساڵی ١٩٨٠ پەیوەندی بە تیپی مۆسیقای خانزادەوە کرد، کە لەسەر داوای یەکێتیی ئافرەتان لەلایەن ھونەرمەند و مۆسیقازانی کورد وریا ئەحمەد لە شاری ھەولێر دامەزرابوو . ڤیان لەو تیپەدا نەک تەنیا وەک گۆرانیبێژی سەرەکی ڕۆڵی دەگێڕا، بەڵکوو ژەنیاری ئامێری گیتاریش بوو و لە زۆربەی چالاکییەکانی تیپەکەدا ئامادەیی ھەبوو.

لە ساڵی ١٩٨٢، ڤیان بەشداری لە «فیستیڤاڵی ھونەریی گۆرانی» کرد لە ئاستی عێراق و ئاستی تیپەکەیان بووە جێگەی سەرنجی ئامادەبووان و سەرپەرشتیارانی فیستیڤاڵەکە. دواتر لە ساڵی ١٩٨٣، کۆمەڵێک گۆرانییان بۆ تەلەڤیزیۆنی کەرکووک تۆمار کرد. ھەروەھا بەشدارییان لە بەرنامەی (سهرە ئەربیلییە - شەوانی ھەولێر) لە تەلەڤیزیۆنی عێراق کرد، کە بەشێکی لە ھاوینەھەواری سەری ڕەش وێنە گیرابوو .

لە بەناوبانگترین ئەو گۆرانییانەی کە ڤیان فایەق وتوویەتی یان بەشداری تێدا کردووە بریتین لە: «ھەی مینە عەمرم مینە»، «خانە میری»، «ھۆپ زیندان»، «دەک نەمینێم ئەلەززە»، «ئایشۆکی دەلالی»، «وەز تازەممە»، لەگەڵ گۆرانیی «پەشیمانی» کە ھۆنراوەی گۆران و ئاوازی وریا ئەحمەدە.

وازھێنان و مردن

لە ناوەڕاستی ھەشتاکاندا بەھۆی ھەڵگیرسانی شەڕی عێراق و ئێران و ئەو گوشارە زۆرەی لەلایەن ڕژێمی بەعسەوە خرایە سەر ھونەرمەندان بۆ ئەوەی خزمەت بە بانگەشەی جەنگ بکەن، تیپەکەیان لە چالاکی کەوت و ھەڵوەشایەوە. بەمەش کۆتایی بە کاری ھونەریی ڤیان فایەق ھات و بە یەکجاری لە کارکردن لەو بوارەدا دوورکەوتەوە.

ڤیان فایەق پاش چەندین ساڵ دوورکەوتنەوە لە ھونەر، لە ساڵی ٢٠١١ لە شاری بەغدا کۆچی دوایی کرد.