ڕێکخراوی ئازادیی ژنان (عێراق)

ڕێکخراوی ئازادیی ژنان لە عێراق ڕێکخراوێکی ناحکوومییە و تایبەتمەندە لە داکۆکیکردن لە مافەکانی ژنان لە عێراق. لە مانگی حوزەیرانی ساڵی ٢٠٠٣ لەلایەن یەنار محەممەد و ناسیق ئەحمەد و نادیە مەحموود دامەزراوە. ئەو داکۆکی لە عەلمانییەت و یەکسانی تەواوەتی جێندەری دەکرد و دژی بناژۆخوازی ئیسلامی و داگیرکاری ئەمریکا شەڕی دەکرد. سەرۆکی ڕێکخراوەکە یەنار محەممەدە و وتەبێژی نێونەتەوەیی لە ساڵانی پێشوودا ھۆزان مەحموود بووە.

سەرچاوەی ئەم ڕێکخراوە لە ڕێکخراوێکی دیکەدایە، ڕێکخراوی سەربەخۆی ژنان لە ھەرێمی کوردستان، کە لە نێوان ساڵانی ١٩٩٢ بۆ ٢٠٠٣ بوونی ھەبووە، سەرەڕای سەرکوتی حکوومەت و ئیسلامییەکان، ھەروەھا ھاوپەیمانی بۆ داکۆکیکردن لە مافەکانی ژنانی عێراق کە لە ساڵی ١٩٩٨ لەلایەن ژنانی دەربەدەری عێراقەوە دامەزراوە. ڕێکخراوەکە چالاکییەکانی لەسەر ڕووبەڕووبوونەوەی یاسای شەریعەت و ڕفاندن و تیرۆرکردنی ژنان و کوشتن لەسەر شەرەف چڕدەکاتەوە. ڕێکخراوەکە ھەزاران ئەندامی ھەیە و تۆڕێکی پشتیوانی دەرەکی ھەیە، بە تایبەت لە ئەمریکا. چالاکوان و بەڕێوەبەرەکانی لەلایەن ڕێکخراوە ئیسلامییەکانەوە چەندین ھەڕەشەی تیرۆرکردنیان بەرکەوتووە.

سەرچاوەکان

‌