پێکدادانەکانی ئەنبار

پێکدادانەکانی ئەنبار
بەشێکە لە	شەڕ لە عێراق
وڵات	عێراق
جێ	پارێزگای ئەنبار
ڕێکەوتی دەستپێکردن	٣٠ی کانوونی یەکەمی ٢٠١٣
ڕێکەوتی کۆتاییھاتن	٢٥ی حوزەیرانی ٢٠١٤
لە ویکیدراوە دەستکاریی زانیارییەکان بکە

پێکدادانەکانی ئەنبار لە ٣٠ی کانوونی یەکەمی ٢٠١٣ دەستیپێکرد، دوای ئەوەی ھێزە ئەمنییەکان کەمپی ناڕەزایەتییان لە ڕەمادی بڵاوەپێکرد و ئەندامێکی پەرلەمانیان بە ناوی ئەحمەد ئەلوانی دەستگیرکرد و براکەی بەناوی عەلی ئەلعەلوانی کوشت و یاریکردن بە جەستەی. پێکدادانەکان درێژکراوەی خۆپیشاندانەکانی ناوەڕاست و باکووری عێراق بوو کە لە کانوونی یەکەمی ٢٠١٢ەوە بەردەوام بوون. کاتێک گروپە خێڵەکییە چەکدارەکان چەکەکانیان لە دژی سوپای عێراق وەرگێڕا. دوای ئەوەی لە ٣١ی کانوونی یەکەمدا سوپا لە پارێزگای ئەنبار کشایەوە بۆ ھێورکردنەوەی دۆخەکە، داعش بەشێک لە شارەکانی فەللووجە و ڕەمادی داگیرکرد کە دەکەونە پارێزگای ئەنبار کە زۆرینەی سوننەنشینە و ڕێکخراوەکە ناوچە داگیرکراوەکانی بە دەوڵەتی سەربەخۆ ڕاگەیاند. حکوومەت گەنجانی بێکار و بێ مەشق و ڕاھێنانی سەربازی وەرگرت بۆ ئەوەی بەشداری شەڕەکە بکەن.

دوابەدوای بڵاوەپێکردنی دانیشتنەکە، نووری مالیکی سەرۆک وەزیرانی عێراق فەرمانی بە ھێزەکانی سوپا کرد لە شارەکانی ئەنبار بکشێنەوە و ئیدارەی خۆیان ڕادەستی پۆلیسی ناوخۆیی و فیدراڵی بکەن. لە بەیاننامەیەکدا کە لەلایەن نووسینگەکەیەوە بڵاوکراوەتەوە، ئاماژەی بەوە کردووە، ئۆپەراسیۆنەکانی سوپا لەدژی «حەشارگەکانی ئەلقاعیدە» لە بیابانی ئەنبار بەردەوام دەبێت. ئاماژەی بەوەشکردووە، بڵاوەپێکردنی دانیشتنەکە لە وەڵامی ئەوەی ناوی بردووە «بانگەوازی زۆر لەلایەن شێخەکانی خێڵ و کەسایەتییە ئاینییەکان و حکومەتی ناوخۆییەوە بووە، کە گەیشتووەتە ڕادەی بەھاناوەچوون».

لە ٢ی ١ی ٢٠١٤ سەرچاوەیەکی فەرمی لە وەزارەتی ناوخۆی عێراق ڕای گەیاند، داعش نیوەی فەللووجەی کۆنترۆڵکردووە. لە ٥ی ١، فڕۆکە سەربازییەکانی عێراق بۆردوومانی چەکدارەکانی لە قەزای ڕەمادییان کرد، لە ٦ی ١، سەرۆکوەزیرانی عێراق، فەرماندەی پۆلیسی پارێزگای ئەنبار ھادی ڕەزیجی لە کارەکەی دوورخستەوە و ژەنەڕاڵ ئیسماعیل مەحلاوی لە شوێنی ئەو دانا. لە ٦ی ١، نوری مالیکی بانگەوازێکی کورتی ئاراستەی دانیشتوانی فەللوجە کرد و داوای لە «خەڵکی فەللووجە و ھۆزەکانی کرد تیرۆریستان لە شارەکە دەربکەن بۆ ئەوەی گەڕەکەکانی بەر مەترسییەکانی ڕووبەڕووبوونەوەی چەکداری نەبن». فەرماندەی ھێزی ئاسمانی عێراق ڕای گەیاند، ھێزی ئاسمانی لە یەک ڕۆژدا ٤٠٠ گەشتی دژی چەکدارانی ئەنبار ئەنجامداوە.