لە ئینسایکڵۆپیدیای ئازادی ویکیپیدیاوە
نازناوی «پاشای خاکەکان» لەلایەن پاشای ئاشووریی نوێ ئاشوورناسیرپاڵی دووەم (ناوەڕاست) بە شێوەی «پاشای شکۆداری خاکەکان» ناسێندرا.
پاشای خاکەکان (ئەکەدی: «šar mātāti-شەڕ ماتیاتی»)، کە ھەروەھا تەنھا وەک پاشای وڵاتان یان بە شێوەیەکی پۆز لێدەرانەتر وەک پاشای ھەموو وڵاتەکان لێکدراوەتەوە، نازناوێکی خاوەن شکۆیەکی گەورە بوو کە لەلایەن فەرمانڕەوا بەھێزەکانەوە لە مێزۆپۆتامیای کۆندا بانگەشەی بۆ دەکرا. ئەم نازناوە لە سەردەمی ئیمپراتۆریەتیی ئاشووریی نوێدا (٩١١ی پ.ز–٦٠٩ی پ.ز) ناسێندرا، زاراوەی «ماتیاتی» بە ڕاشکاوی ئاماژە بۆ خاکە بیانییەکان (بۆ نموونە نائاشوورییەکان) دەکات، کە زۆرجار لە دەرەوەی سنوورەکانی خودی مێزۆپۆتامیا بوون (بە پێچەوانەی وشەی «ماتوو» کە ئاماژە بۆ خودی خاکی ئاشوور دەکات)، ئەمەش ئەوە دەگەیەنێت کە پاشای ئاشوور مافی فەرمانڕەواییکردنی خاکە بیانییەکان و ھەروەھا خاکی خۆشی ھەبووە.
